புதிய நீதிமன்ற கட்டிடத் தொகுதி திறப்பு விழாவில் வடமாகாண முதலமைச்சர் கலந்து கொள்ளவில்லை!

யாழ். சாவகச்சேரியில் நிர்மாணிக்கப்பட்டுள்ள புதிய நீதிமன்ற கட்டடத் தொகுதியை பிரதம நீதியரசர் மொஹான் பீரிஸ் இன்று (09) உத்தியோகபூர்வமாக திறந்துவைத்தார்.

சாவகச்சேரி நீதிமன்ற நீதவான் ஸ்ரீநிதி நந்தசேகரன் தலைமையில் நடைபெற்ற இந்த நிகழ்வில், பிரதம நீதியரசர் மொஹான் பீரிஸ், நீதி அமைச்சர் ரவூப் ஹக்கீம், அமைச்சர் டக்ளஸ் தேவானந்தா வடமாகாண ஆளுனர் ஆகியோர் கலந்து கொண்டனர்

இந்தக் கட்டடத் தொகுதியில் மாவட்ட நீதிமன்றமும் நீதவான் நீதிமன்றமும் இயங்கவுள்ளன.

அத்துடன், இலவச சட்ட உதவி மன்றம், சமுதாய சீர்திருத்தப் பிரிவு என்பனவும் இயங்கவுள்ளன.

கடந்த யுத்தத்தால் பாதிக்கப்பட்ட இந்த நீதிமன்ற கட்டிடத் தொகுதியானது ஆசிய அபிவிருத்தி வங்கியின் நிதியுதவியுடன் பொருளாதார அபிவிருத்தி அமைச்சினால் 159 மில்லியன் ரூபா செலவில் நிர்மாணிக்கப்பட்டது.

அதேவேளை இன்றைய தினம் 175 மில்லியன் ரூபா செலவில் நிர்மாணிக்கப்பட்ட மல்லாகம் நீதிமன்ற கட்டிடத் தொகுதியும், 127 மில்லியன் ரூபா செலவில் நிர்மாணிக்கப்பட்ட ஊர்காவற்றுறை நீதிமன்றத் தொகுதியும் திறந்து வைக்கப்பட்டன.

இதேவேளை, நீதிமன்ற திறப்பு விழாவுக்கு, உயர்நீதிமன்ற முன்னாள் நீதியரசரும் வடமாகாண சபை முதலமைச்சருமான சி.வி. விக்னேஸ்வரனுக்கு முதலில் அழைப்பு விடுக்கப்படவில்லை எனத் தெரிகிறது.

பின்னர் சட்டத்தரணிகள் பலர் எதிர்ப்பு தெரிவித்ததனால் நேற்று மாலை அவருக்கு அழைப்பு விடுக்கப்பட்ட, போதிலும் இன்றைய தினம் நடைபெற்ற நிகழ்வில் அவர் கலந்து கொள்ளவில்லை.

6:19 PM