அபூ ஐனி-
கடந்த பாராளுமன்றத் தேர்தலுக்குப் பின்னர் எதிர்பார்க்கப் பட்டது போன்று தேசியப் பட்டியல் விவகாரம் சூடுபிடித்துள்ளது.
குறிப்பாக கிழக்கு மாகாணத்தில் உள்ள அதிக முஸ்லிம் மக்கள் ஆதரவினைப் பெற்ற கட்சி என்ற வகையில் முஸ்லிம் காங்கிரஸ் கட்சிக்கு வழங்கப்பட்ட தேசியப்பட்டியலே அதிகளவில் சர்ச்சைக்குட்பட்டுள்ளது
குறிப்பாக அம்பாறை மாவட்டத்திலிருந்து அட்டாளைச்சேனைக் கிராமம் சார்பில் தேசியப்பட்டியலைக் குறிவைத்து பலர் களமிறங்கியிருந்த நிலையில் தேசியப்பட்டியலுக்கான பெயர்கள் அறிவிக்கப்பட்டிருக்கின்றன.
ஆயினும் அதில் அட்டாளைச்சேனைக்கு இடம் வழங்கப்பட்டிருக்கவில்லை.
இதற்கு இரண்டு பிரதான காரணங்கள் இருக்க முடியும் என்று கருதப்படுகின்றது
ஒன்று அதே ஊரில் பல தரப்பினர் அதனைக் கோரும் போது ஒரு அணிக்கு வழங்கினால் அடுத்த அணிகளின் அதிருப்தி தவிர்க்கமுடியாதது. அவர்களுக்கிடையில் ஒற்றுமையில்லாத போது அதனை வழங்குவதும் சிக்கலானதாகும்
அடுத்தது கட்சி திருமலை வன்னி ஆகிய இடங்களில் ஆசனங்களை இழந்திருப்பதும் புத்தளம் குருநாகல் மற்றும் கொழும்பு களுத்துறை உள்ளிட்ட பிரதேசங்களில் கட்சியை வலுவூட்ட வேண்டிய தேவைப்பாடுமுள்ளதால் அதற்காக இந்தத் தேசியப்பட்டியல்களை பயன்படுத்த வேண்டியிருப்பதுமாகும்
அத்துடன் பொத்துவில் தொகுதியில் ஒரு பாராளுமன்ற உறுப்பினர் மக்கள் தெரிவின் மூலம் கிடைக்கப்பெற்றிருப்பதாலும் மீண்டும் அதே தொகுதிக்கு தேசியப்பட்டியல் தேவைதானா என்ற நிலைப்பாட்டை தோற்றுவித்திருக்கலாம்.
அதுதவிரவும் அந்தத் தொகுதியில் தெரிவு செய்யப்பட்டுள்ள பாராளுமன்ற உறுப்பினருக்கு அட்டாளைச் சேனை பிரதேசத்தின் அட்டாளைச் சேனை பாலமுனை ஒலுவில் பகுதி மக்கள் விஷேடமாக கணிசமான விருப்பு வாக்குகளை குறித்த பாராளுமன்ற உறுப்பினரின் இலக்கத்திற்கு மாத்திரம் வழங்கி முன்னுரிமைப்படுத்தியிருப்பதானது அப்பாராளமன்ற உறுப்பினர் எந்தளவுக்கு அப்பகுதி மக்களை நிறைவாக கவனித்து வந்துள்ளார் என்பதை பறைசாற்றுகிறது.
இவ்வாறு பொத்துவில் தொகுதியை நிறைவாக கவனித்துவருகின்ற பாராளுமன்ற உறுப்பினராக பைசால் காசிமை அப்பகுதி மக்கள் முன்னுரிமைப்படுத்தியிருப்பதால் அத்தொகுதிக்கு இன்னொரு பாராளுமன்ற உறுப்பினர் அவசியமில்லை என்பதை உணர முடிகிறது.
அத்துடன் அவ்வாறு வழங்கினால் அது அந்த தொகுதியில் அதிகாரப் போட்டியினைத் தோற்றுவிக்கக் கூடும் என்பது மற்றொரு உண்மையாகும் என்பதால் தெரிவு செய்யப்பட்டுள்ள பாராளுமன்ற உறுப்பினர் இத்தகைய தேசியப்பட்டியல் அதிகாரத்தை தனது தொகுதிக்கள் வழங்குவதை விரும்ப மாட்டார் என்பதும் இங்கு கவனிக்கத்தக்கதாகும்.
எனவே மேற்கூறிய காரணங்ளின் அடிப்படையில் பார்க்கும்போது இந்தப் பாராளுமன்ற காலத்தில் பொத்துவில் தொகுதியின் எந்த கிராமத்திற்கும் பாராளுமன்ற வாய்ப்பு வருவதற்கு எந்த சாத்தியமுமில்லை என்பதே உண்மையாகும். அத்தூடன் ஒரே தொகுதிக்குள் இரண்டு பாராளுமன்ற உறுப்பினர்களை வழங்குமளவுக்கு மு கா தன்னிறைவில் இல்லை என்பதை அப்பகுதி மக்கள் உணர்ந்துகொள்ளவேண்டும்
அதேபோன்று திருகோணமலையிலும் வன்னியிலுமா மு கா சார்பில் பாராளுமன்ற உறுப்பினருக்கான தேவை இருக்கிறது. இது கட்சியின் எதிர்காலத்திற்கும் ஆரோக்கியமானதாகும் என்று பார்க்கப்படுகிறது.
இவ்வாறான பலமுனைச் சூழ்நிலைக்கு மத்தியில் தற்போதைக்கு தேசியப்பட்டியல்கள் இரண்டையும் சேமித்துவைப்பதே சிறந்த வழியென்று தலைமை உணர்ந்திருக்கக் கூடும்.
-
0 comments:
Post a Comment