முதலமைச்சர் பதவியும் மு.காவின் முன்னுள்ள சவால்களும்

எஸ்.றிபான் -
கிழக்கு மாகாண சபையின் முதலமைச்சர் விடயத்தில் தமிழ்த் தேசிய கூட்டமைப்புக்கும், முஸ்லிம் காங்கிரஸிற்குமிடையே காணப்பட்ட முரண்பாட்டு நிலைமைகளுக்கு மத்தியில், முஸ்லிம் காங்கிரஸின் பிரதித் தலைவரும், துஆ கட்சியின் தலைவருமான ஹாபிஸ் நசீர் அஹமட் முதலமைச்சராக நியமிக்கப்பட்டுள்ளார். ஆயினும், முஸ்லிம் காங்கிரஸிற்கும் அதன் உயர்பீட உறுப்பினர்களுக்கும், கிழக்கு மாகாண சபை உறுப்பினர்களுக்குமிடையே பலத்த கருத்து முரண்பாடுகள் தோன்றியுள்ளன. இக்கருத்து முரண்பாடுகளை ரவூப் ஹக்கீம் கட்சியில் தமக்குள்ள நிறைவேற்று அதிகாரத்தினை பயன்படுடுத்தி அடக்கி வைத்துள்ளார்.

கிழக்கு மாகாண சபையின் முதலமைச்சர் பதவியை மு.காவிற்கு அதிகபட்ச ஆதரவையும், பேரம் பேசும் சக்தியையும் வழங்கிக் கொண்டிருக்கும் அம்பாரை மாவட்டத்திற்கே வழங்க வேண்டுமென்று மு.காவின் ஆதரவாளர்கள் பலரும் கேட்டுக் கொண்ட போதிலும், ரவூப் ஹக்கீம் மட்டக்களப்பு மாவட்;டத்தைச் சேர்ந்த ஹாபிஸ் நசீர் அஹமட்டுக்கு வழங்கியுள்ளார். ரவூப் ஹக்கீம் தமது முடிவுக்கான சரியான காரணத்தை இன்னும் வழங்கவில்லை. ரவூப் ஹக்கீமின் முடிவால் அம்பாரை மாவட்ட மு.காவின் ஆதரவாளர்கள் தாங்கள் ஏமாற்றப்பட்டுள்ளதாக தெரிவிக்கின்றார்கள்.

இதே வேளை, கிழக்கு மாகாண சபையின் முதலமைச்சராக நசீர் அஹமட் நியமிக்கப்படுவதற்கு கிழக்கு மாகாண சபையில் உள்ள 20 உறுப்பினர்கள் ஒப்புதல் அளித்துள்ளார்கள். இவர்களில் தவம் என்பவர்தான் நசீர் அஹமட் முதலமைச்சராக நியமிக்கப்படுவதற்கு ரவூப் ஹக்கீம் எடுத்த முடிவுக்கு முதலாவதாக ஒப்பமிட்டுள்ளார். இதன் மூலமாக தன்னை ரவூப் ஹக்கீம் நம்பிக்கைக்குரியவராக தவம் காட்டியுள்ளார். ஆயினும், அவர் அம்பாரை மாவட்ட முஸ்லிம்களின் அபிலாசைகளுக்கு எதிராக செயற்பட்டவராகவும் உள்ளார். இவரைத் தொடர்ந்து ஏனைய உறுப்பினர்கள் தங்களின் சம்மத ஒப்பந்தத்தை இட்டுள்ளார்கள்.

கிழக்கு மாகாண சபையின் முதலமைச்சராக நசீர் அஹமட் நியமிக்கப்பட்டுள்ளமைக்கு அம்பாரை மாவட்டத்தில் உள்ள மு.காவின் ஆதரவாளர்களிடையே அதிருப்பி காணப்படுவதனாலும், ஜனாதிபதித் தேர்தலில் இறுதி வரைக்கும் மஹிந்தராஜபக்ஷவை ஆதரிப்பதற்கு மு.கா திருகுதாளங்களை செய்து கொண்டிருந்ததனாலும், அக்கட்சியின் மூலமாக தெரிவு செய்யப்பட்டுள்ள பாராளுமன்ற உறுப்பினர்கள், மாகாண சபை உறுப்பினர்கள் போன்றவர்களின் பச்சை சுயநலப் போக்குகளினாலும், கட்சியை அழிப்பதற்கு தடிகளை எடுத்துச் செயற்பட்ட மாற்றுக் கட்சிக்காரர்களை, கட்சியில் இணைத்து அவர்களுக்கு (கட்சிக்காக நீண்ட காலம் உழைத்தவர்களை புறந்தள்ளி) பதவிகளை வழங்கி வருகின்றமையாலும், முஸ்லிம் சமூகத்தின் குரலாக இல்லாது அமைச்சர் பதவிகளில் மாத்திரம் நாட்டங் கொண்டு சமூகத்தினையும், கட்சியையும் விலை பேசி வயிறு வளர்த்துக் கொண்டிருப்பதனாலும் எதிர்வரும் பொதுத் தேர்தலில் மு.காவுக்கு பாடம் புகட்ட வேண்டுமென்ற சிந்தனை அரபு வசந்தம் போல் அம்பாரை மாவட்ட முஸ்லிம்களிடையே மிகவும் வேகமாக கருத்துக்கள் பரவிக் கொண்டிருக்கின்றன.

இதே வேளை, அம்பாரை மாவட்டத்தில் உள்ள மு.காவின் பாராளுமன்ற உறுப்பினர்கள் எவரும் கிழக்கின் முதலமைச்சர் பதவிக்கு அம்பாரை மாவட்டத்தைச் சேர்ந்தவர்தான் நியமிக்கப்பட வேண்டுமென்று கட்சியின் தலைமையிடம் கோரிக்கைகளை விடுக்கவில்லை. மத்திய அரசாங்கத்தில் அமைச்சர் பதவிகளை தர வேண்டுமென்று தலைமைக்கு நெருக்கடிகளை கொடுத்த இவர்கள், கிழக்கின் முதலமைச்சர் பதவி அம்பாரைக்கு வேண்டுமென்று கோராது இருந்தமையும் ரவூப் ஹக்கீம் முதலமைச்சர் பதவியை மட்டக்களப்பு மாவட்டத்திற்கு வழங்குவதற்கு சாதகமாக அமைந்து விட்டது. கிழக்கின் முதலமைச்சர் ஒருவர் அம்பாரையில் நியமிக்கப்படும் பட்சத்தில் தங்களின் அரசியல் முகவரிகளுக்கு ஆபத்தாக அமைந்திடுமென்று பாராளுமன்ற உறுப்பினர்கள் கருதிக் கொண்டார்கள் போலும்.

அம்;பாரை மாவட்டத்திற்கு கிழக்கின் முதலமைச்சர் கிடைக்கும் என்றும், அதுவும் ஏ.எம்.ஜெமீலுக்கு தலைவர் வழங்குவார் என்று எதிர்பார்த்த சாய்ந்தமருது மு.கா ஆதரவாளர்கள் ரவூப் ஹக்கீமின் முடிவால் ஆத்திரமடைந்து கடந்த 06.02.2015 வெள்ளிக்கிழமை சாய்ந்தமருது ஜும்ஆப்பள்ளிவாசலுக்கு முன்பாக எதிர்ப்பு ஆர்ப்பாட்டத்தில் ஈடுபட்டார்கள். இதன் போது ரவூப் ஹக்கீமின் கொடும்பாவியை எரிக்கமுற்பட்ட வேளை, பொலிஸார் தடுத்துள்ளார்கள். இச்சம்பத்தினால் ஆத்திரமடைந்த ரவூப் ஹக்கீம் அதிரடியாக ஜெமீலை கட்சியில் இருந்து இடைநிறுத்தி வைத்தார். ஆயினும், ரவூப் ஹக்கீமின் இந்த அறிவிப்பு தமக்கு எதிரான இந்நடவடிக்கை அம்பாரை மாவட்டத்தில் ஏனைய பிரதேசங்களுக்கும் பரவாது இருப்பதற்கானதொரு அணையாகவே எம்மால் பார்க்கப்படுகின்றது. ஜெமீலை கட்சியிலிருந்து நீக்காது இருந்திருந்தால், அம்பாரை மாவட்டத்தில் மு.காவின் ஆதரவாளர்கள் எல்லா பிரதேசங்களிலும் எதிர்ப்பு நடவடிக்கைகளில் ஈடுபட்டிருப்பார்கள்.

தமக்கு எதிராக எதிர்ப்பு நடவடிக்கைகளில் ஜெமீலின் ஆதரவாளர்கள் ஈடுபட்டதற்காக ஜெமீலை கட்சியிலிருந்து இடைநிறுத்தி வைத்த ரவூப் ஹக்கீம், ஜனாதிபதித் தேர்தலில் மு.கா மைத்திரிபால சிறிசேனவுக்கு ஆதரவு வழங்குவதற்கு தீர்மானித்த போதிலும், ஹாபிஸ் நசீர் அஹமட், பசீர் சேகுதாவூத் ஆகியோர்கள் கட்சியின் தீர்மானத்தை ஏற்று மைத்திரிபால சிற்சேனவின் வெற்றிக்கு உழைக்கவுமில்லை. வாக்களிக்கவுமில்லை. கட்சியின் முக்கிய பதவிகளில் உள்ள இருவர் இவ்வாறு நடந்து கொண்டமை கட்சியின் கட்டுக்கோப்புக்கு அச்சுறுத்தலாகும். கட்சி யாருடைய கட்டுப்பாட்டில் உள்ளதென்றும் கேட்க வேண்டியுள்ளது. ஆனால், இவர்களுக்கு எதிராக ரவூப் ஹக்கீம் எந்த ஒழுக்காற்று நடவடிக்கைகளையும் எடுக்கவில்லை. இது பற்றி ரவூப் ஹக்கீம் தெரிவித்துள்ளதாக ஊடகங்களில் வெளிவந்த செய்தியொன்று சிரிக்கும் படியாக உள்ளது. அதாவது, இவர்களின் இந்நடவடிக்கை பாரதூரமானதல்ல என்றுள்ளார்.

இதே வேளை, மு.காவின் தவிசாளர் பசீர் சேகுதாவுத்திற்கு எதிராக நிந்தவூரில் கொடும்பாவி எரிக்கப்பட்டது. இதன் பின்னணியிலும் அரசியல்வாதிகள் உள்ளார்கள். ஆனால், இதற்கு எதிராக ரவூப் ஹக்கீம் நடவடிக்கை எடுக்கமுமில்லை. அதனை கண்டித்து அறிக்கையிடவுமில்லை. கட்சியின் செயலாளர் ஒரு சிறு அறிக்கையை விட்டிருந்தார்.

மு.கா மைத்திரிபால சிறிசேனவுக்கு ஆதரவளிக்க வேண்டுமென்பதும், கிழக்கின் முதலமைச்சர் நசீர் அஹமட் என்பதும் கட்சியின் முடிவாகும். இதற்கு கட்சியில் உள்ள அனைவரும் கட்டுப்பட வேண்டும். அதுதான் ஒரு ஒழுக்கமுள்ள கட்சியின் இலக்கணமாகும். ஆனால், கட்சியின் முடிவுக்கு கட்டுப்பாடாது இருந்தமையை ஜனநாயகம் என்றும், கருத்துச் சுதந்திரம் என்றும் ரவூப் ஹக்கீம் தெரிவித்துக் கொண்டிருப்பது அவரின் ஆளுமையில் உள்ள குறைபாடாகவே கருத வேண்டியுள்ளது.

ஜனாதிபதித் தேர்தலில் கட்சியின் முடிவுக்கு மாற்றமாக செயற்பட்டது பாரிய குற்றமல்ல அல்லது இதுவொரு ஜனநாயகக் கட்சி என்று தெரிவிக்கும் ரவூப் ஹக்கீம், சாய்ந்தமருதில் நடைபெற்றதனையும் ஜனநாயகமாக பார்க்க வேண்டும். மேலும், ஜனாதிபதி தேர்தலில் கட்சியின் முடிவுக்கு மாற்றமாக உரியவர்கள் நேரடியாகவே செயற்பட்டார்கள். ஆனால், ஜெமீல் களத்தில் நின்று நேரடியாக ரவூப் ஹக்கீமுக்கு எதிராக எதிர்ப்பு நடவடிக்கைகளில் ஈடுபடவில்லை.

மேலும், ஜனாதிபதித் தேர்தலில் தபால் மூல வாக்களிப்பில் மு.காவின் ஆதரவாளர்கள் தங்களின் விருப்பம் போல் நடந்து கொள்ளலாமென்று ரவூப் ஹக்கீம் அறிவித்தார். அத்தோடு, தேர்தலுக்கான இறுதிக் கட்டம் வரைக்கும் இருந்து விட்டு, றிசாட் பதியுதீன் மைத்திரிக்கு ஆதரவு என்று அறிவித்துவிட்டு, கல்முனைக்கு விஜயம் செய்தார். இதன் போது மு.காவின் ஆதரவாளர்கள் உட்பட முஸ்லிம்கள் றிசாட்டுக்கு பெரும்வரவேற்று அளித்தார்கள். இதனால் நடுங்கிப் போன மு.கா இறுதியில் மக்களின் மனங்களில் ஏற்பட்ட ஆட்சி மாற்றம் என்ற வசந்தத்திற்கு கட்டுப்பட்டார்கள்.

இந்தப் பின்னணியில் ஜனாதிபதித் தேர்தலின் பின்னர் மு.காவின் நடவடிக்கைகளை அவதானிக்கும் போது மக்களை சமாளிப்பதற்காக மைத்திரிபால சிறிசேனவுக்கு ஆதரவு என்ற முடிவும், சில வேளை, மஹிந்தராஜபக்ஷ வெற்றி பெற்றால், நாங்கள் மைத்திரிக்கு ஆதரவு என்று முடிவு செய்தமை மக்களை திருப்திப்படுத்துவதற்கு, ஆனால், எங்களின் முக்கிய உறுப்பினர்கள் இருவர் மைத்திரிக்கு ஆதரவு வழங்கவில்லை. அத்தோடு, நாங்கள் வீடுவீடாகச் சென்று வாக்களிக்குமாறு கேட்கவுமி;ல்லை என்று மஹிந்தவுடன் கதைப்பதற்கு ஏதுவாக நசீர் அஹமட்டையும், பசீர் சேகுதாவூத்தையும் இவ்வாறு இருங்கள் என்று ரவூப் ஹக்கீம்தான் முடிவு எடுத்தாரோ என்று எண்ணவும் வேண்டியுள்ளது.

ஏனெனில், ஜனாதிபதித் தேர்தலில் ஐக்கிய மக்கள் சுதந்திரக் கூட்டமைப்பின் வேட்பாளர் மஹிந்தவை தோற்கடிப்பதற்கு சிறு முயற்சியும், கிழக்கின் முதலமைச்சரைப் பெறுவதற்கு ஐக்கிய மக்கள் சுதந்திரக் கூட்டமைப்புடன் தமது பழைய உடன்படிக்கையை அமுல்படுத்தியுள்ளேம் என்ற கருத்தும் மு.கா இரண்டு தோணிகளிலும் கால்களை வைத்தாகவே உள்ளது.

முஸ்லிம் சமூகத்தின் விடிவுக்கு உழைப்பவர்கள், உரிமையின் குரல் என்றெல்லாம் முஸ்லிம் கட்சிகள் தெரிவித்துக் கொண்டாலும், அவை முஸ்லிம் சமூகத்தினை விற்று ஒரு சிலர் பதவிகளைப் பெறுவதற்கும், பணங்களை உழைப்பதற்கும் மக்களை ஏமாற்றிக் கொண்டிருக்கின்றது என்பதே உண்மையாகும்.

ஏனெனில், கடந்த ஊவா மாகாண சபைத் தேர்தலில் முஸ்லிம் பிரதிநிதித்துவத்தை உறுதி செய்வதற்காக மு.காவும், அ.இ.ம.காவும் துஆ கட்சியின் இரட்டை இலைச் சின்னத்தில் போட்டியிட்டன. இதன் போது, முஸ்லிம் சமூகத்தினை அரசியல் ரீதியாக ஒற்றுமைப்படுத்தி, முஸ்லிம்களுக்கு எதிராக பேரினவாதிகள் மேற்கொள்ளும் அனைத்து சவால்களையும் முறியடிப்பதற்கான ஒரு ஆரம்பா நடவடிக்கை என்று தெரிவித்துக் கொண்டார்கள். ஆனால், இப்பத்தியில் நாம் இந்தக் கூட்டு முஸ்லிம்களின் வாக்குகள் ஐ.தே.கவுக்கு செல்லாதிருப்பதற்காக மஹிந்தராஜபக்ஷவின் திட்டத்திற்கு அமைவாகவே இரு முஸ்லிம் கட்சிகளும் இணைந்து போட்டியிடுகின்றன. தேர்தல் முடிந்ததும் இக்கூட்டும் முறிந்துவிடுமென்று தெரிவித்தோம். அதுதான் இப்போது நடந்து கொணடடிருக்கின்றது.

ஒரு கட்சியின் உறுப்பினரை மறு கட்சியினர் இழுத்துக் கொண்டிருக்கின்றார்கள். பொதுத் தேர்தல் வருவதற்கு முன்னரே ஆளுக்கு ஆள் குற்றப்பத்திரிகைகளை மக்கள் மன்றத்தில் வைத்துக் கொண்டிருக்கின்றர்ர்கள். எங்களை அடிக்க சமூகவாதிகள் யாருமில்லை என்று தெரிவித்துக் கொண்டிருக்கின்றார்கள். கட்சியிலிருந்து நீக்குகின்றார்கள். பின்னர் சேர்க்கின்றார்கள். கட்சியை புரனமைப்பு செய்வோம் என்கின்றார்கள். அம்பாரையிலும் எங்கள் கட்சி கால்பதிக்கும் என்று அறிக்கைவிடுகின்றார்கள்.

இதே வேளை, ஜனாதிபதி தேர்தலில் இறுதியில் வந்த மு.கா அமைச்சர் பதவிகளை முதலில் பெற்றுக் கொள்ள வேண்டும். எல்லோருக்கும் அமைச்சர் பதவிகள் வேண்டுமென்று ஆசைப்பட்டார்கள். ஆனாலும், ரணில் விக்கிரமசிங்க மு.காவுக்கு ஒரு கெபினட் அமைச்சரும், ஒரு இராஜாங்க அமைச்சரும், ஒரு பிரதி அமைச்சரும் வழங்க முன்வந்தார். இந்த அமைச்சர் பதவிகளை யாருக்கு வழங்குவதென்று ஆலோசிக்கப்பட்ட போது, பசீர் சேகுதாவூத்தையும் அமைச்சர் பதவியை பெறுமாறு ரவூப் ஹக்கீம் கேட்டுக் கொண்டதாகவும், அதற்கு பசீர் அமைச்சர் பதவிகளை திருகோணமலை, அம்பாரை மாவட்டங்களுக்கு வழங்குமாறு ஆலோசனை சொன்னதாகவும் தெரிவிக்கப்படுகின்றது.

ஆட்சி மாற்றத்தில் இரு வாரங்கள் மாத்திரம் அமைச்சர் பதவிகளில்லாது இருந்து முஸ்லிம் கட்சிகள் மத்திய அரசாங்கத்தில் அமைச்சர் பதவிகளையும், கிழக்கு மாகாண சபையில் முதலமைச்சர் பதவியையும் பெற்றுள்ளது. மத்திய அரசாங்கத்தில் பெற்றுக் கொண்ட அமைச்சர் பதவிகள் 100 நாட்களின் பின்னர் காலவதியாகிப் போய்விடும். ஆனால், முதலமைச்சர் பதவி பெரும்பாலும் இன்னும் 30 மாதங்களுக்கு இருக்கப் போகின்றது. இதனால், புதிய முதலமைச்சர் பலத்த எதிர்ப்புக்களுக்கு மத்தியில முதலமைச்சராகியுள்ளார். இந்த எதிர்ப்பினை அவர் தமது நடவடிக்கைகளின் மூலமாக கட்டுப்படுத்தி, மூவின மக்களும், மூன்று மாவட்டமும் திருப்திபடும் வகையில் தமது நடவடிக்கைகளை அமைத்துக் கொள்ள வேண்டும். அம்பாரை மாவட்டத்தில் கடந்த மூன்று வருடங்களுக்கு முன்னர் மட்டக்களப்பு மாவட்டத்தில் இடமாற்றம் பெற்றுள்ள மு.காவின் ஆதரவாளர்கள் என்ற போர்வையில் அரசியல் பலிவாங்கலால் இடமாற்றம் செய்யப்பட்டுள்ள ஆசிரியர்களுக்கு நீதியை பெற்றுக் கொடுக்க வேண்டும். இவர்களில் அதிகமானவர்கள் பெண் ஆசிரியைகள் என்பது குறிப்பிடத்தக்கது. இதே போன்று திருகோணமலை மாவட்டத்திலும் ஆசிரியர்கள் உள்ளார்கள். ஆதலால், ஆசிரியர்களின் இடமாற்றத்தில் ஒரு சமநிலையையும், நீதியையும் பேணும் வகையில் நடவடிக்கைகளை எடுக்க வேண்டும்.

மட்டுமல்லாது, கடந்த காலங்களில் மாகாண சபையினாலும், மத்திய அரசாங்கத்தினாலும் சில பிரதேசங்கள் அபிவிருத்திகளைப் பெற்றுக் கொண்ட போதிலும், சில பிரதேசங்கள் திட்டமிடப்பட்ட வகையில் புறக்கணிக்கப்பட்டுள்ளன. மேலும், தற்போது கிழக்கு மாகாண சபையின் முதலமைச்சராக நியமிக்கப்பட்டுள்ள நசீர் அஹமட் மு.காவின் அடுத்த தலைவர் என்பதற்கானதொரு அங்கிகாரமும் ரவூப் ஹக்கீமினால் வழங்க்கப்பட்டுள்ளதாகவே உள்ளது. ஊவா மாகாண சபையில் துஆவின் இரட்டை இலையில் தேர்தலில் போட்டியிட்டமை. கிழக்கின் முதலமைச்சர் பதவியை வழங்கியமை, மட்டக்களப்பு மாவட்டத்தில் மு.காவுக்கு ஏற்பட்டுள்ள சரிவினை தடுத்து நிறுத்தி கட்சியை வளர்க்கக் கூடியவர் என்ற எதிர்பார்ப்பு, மேலும், அண்மைக்காலமாக தாம் மேற்கொள்ளும் உள்நாட்டு, வெளிநாட்டு பிரதானிகளுடனான பேச்சுவார்த்தைகளில் நசீர் அஹமட்டையும் இணைத்துக் கொண்டமை, மட்டுமல்லாது, கிழக்கு மாகாண சபையில் முதலமைச்சரைப் பெற்றுக் கொள்வதற்கு போதிய ஆசனங்கள் இல்லாருந்தது. இதனால், முதலமைச்சரை பெறுவதற்கான ஆட்களை திரட்டுகின்ற பணியும் இவரிடம் வழங்கப்பட்டன. இவைகள் புதிய முதலமைச்சருக்கான ஆற்றல்களாக உள்ளன. ஆதலால், தம்முன்னால் உள்ள சவால்களை வெற்றி கொள்வாரா என்பதனை பொறுத்திருந்து பார்ப்போம்.

3:41 PM