பாதாள குழுக்களுக்கு எதிராக அரசாங்கம் சட்டத்தின் பிரகாரம் கடுமையான நடவடிக்கை எடுக்க வேண்டும் இல்லாவிட்டால் நாட்டில் சட்டமொன்று இல்லாத நிலை ஏற்படும். என்றாலும் பாதாள குழுக்களை கட்டுப்படுத்துவதற்கு அரசாங்கத்திடம் ஏற்றுக்கொள்ளப்பட்ட வேலைத்திட்டம் இல்லையென பிரதான எதிர்க்கட்சியான ஐக்கிய மக்கள் சக்தியின் பாராளுமன்ற உறுப்பினர் அஜித் பி பெரேரா தெரிவித்தார்.
பாராளுமன்றத்தில் சனிக்கிழமை (22) இடம்பெற்ற 2025ஆம் ஆண்டுக்கான வரவு, செலவு திட்டத்தின் இரண்டாம் வாசிப்பு மீதான ஐந்தாம் நாள் விவாதத்தில் கலந்துகொண்டு உரையாற்றுகையிலேயே இவ்வாறு தெரிவித்தார்.
அவர் அங்கு தொடர்ந்து உரையாற்றுகையில்,
நாட்டு மக்களின் உரிமைகளை பாதுகாப்பதற்கு அரசாங்கம் கடமைப்பட்டுள்ளது. பாராளுமன்றத்தில் நீண்டகாலம் எதிர்க்கட்சி உறுப்பினராக இருந்த அநுரகுமார திசாநாயக்க நாட்டின் ஜனாதிபதியாக தெரிவு செய்யப்பட்டுள்ளார். அது தொடர்பில் நாங்கள் மகிழ்ச்சியடைகிறோம்.
அவர் எதிர்க்கட்சியின் பொறுப்புக்களை முறையாக நிறைவேற்றி மக்களின் நம்பிக்கையை வெற்றிபெற்றுக்கொண்டு நாட்டின் ஜனாதிபதியாகி இருக்கிறார். கடந்த அரசாங்க காலத்தில் நாட்டில் குற்றங்கள் அதிகரிக்கும் போது, அந்த பாதாள குழுக்களை அடக்குவதற்கு பொலிஸாரின் நடவடிக்கைகளை சரியான முறையில் முன்னெடுக்க முடியாமல் போன போது, அது தொடர்பில் நடவடிக்கை எடுக்க முடியாமல் போன அரசாங்கங்களினால் கைது செய்யப்படும் சந்தேக நபர்களை கொலை செய்துவிடும் நடவடிக்கை ஆரம்பிக்கப்பட்டது. இந்த அரசாங்கத்துக்கு பாதாள குழுக்களை கட்டுப்படுத்துவதற்கு ஏற்றுக்கொள்ளப்பட்ட வேலைத் திட்டம் இல்லை.
வெள்ளிக்கிழமை (21) இடம்பெற்ற சம்பவத்தில் பொலிஸார் குற்றவாளிகளை கைது செய்தார்கள். உயிருடன் அவர்களை காட்டுகிறார்கள். அது சமூக வலைத்தலங்களில் பகிரப்பட்டது. இரவாகும் போது அந்த குற்றவாளிகள் பொலிஸ் பாதுகாப்பில் இருந்த நிலையில் மரணிக்கின்றனர்.
பொலிஸ் கைதில் இருப்பவர்கள் மரணிப்பதாக இருந்தால் அந்த அரசாங்கம் எதற்கு? கைது செய்யப்பட்டிருக்கும் சந்தேக நபர்களை பாதுகாக்க முடியாது என்றால் எதற்கு அந்த அரசாங்கம்? பாதாள குழுக்களை கட்டுப்படுத்த சட்டத்தின் பிரகாரம் நடவடிக்கை எடுக்க முடியாவிட்டால் அந்த அரசாங்கம் எதற்கு என்றே அன்று அநுரகுமார எதிர்க்கட்சியில் இருந்து தெரிவித்தார்.
அதனால் பாதாள குழுக்களுக்கு எதிராக அரசாங்கம் கடுமையான நடவடிக்கை எடுக்க வேண்டும். பாதாள குழுக்களில் இருக்கும் குற்றவாளிகள் யாரும் வெளியில் இருக்கக் கூடியவர்கள் அல்ல. நாட்டின் சட்டத்தின் பிரகாரம் பாதாளக் குழுக்களின் குற்றங்களின் பிரகாரம் அவர்கள் தண்டிக்கப்பட வேண்டும். அவர்களுக்கு எதிரான வழக்கு விசாரணைகளை துரிதப்படுத்த வேண்டும்.
ஆனால் அநுரகுமாரவின் அரசாங்கம் சட்டத்தின் ஆட்சியை மறந்து, 76 வருட பழமை வாய்ந்த முறைமையை பின்பற்றி செல்கிறது. மக்கள் விடுதலை முன்னணியின் உறுப்பினர்களை கைது செய்து முறைகேடாக கொலை செய்த போது அதற்கு நாங்கள் எதிராக செயற்பட்டோம்.
இன்றும் நாங்கள் எதிராக இருக்கிறோம். அதனால் பாதாள குழுக்கள் அடக்கப்பட வேண்டும். ஆனால் அது சட்டத்தின் பிரகாரம் அடக்கப்பட வேண்டும். அவ்வாறு இல்லாவிட்டால் நாட்டில் சட்டம் ஒன்று இல்லாத நிலை ஏற்படும் என்றார்.
0 comments:
Post a Comment