பிரதமர் ஜயரத்ன பதவி விலக வேண்டுமென்று கொழும்பில் ஆர்ப்பாட்டம் - பிக்குகளுக்கு காயம்!

சஹாப்தீன்;
பிரதமர் டி.எம். ஜயரத்ன, புத்தசாசன அமைச்சு பதவியிலிருந்து உடனடியாக விலகுமாறு வலியறுத்தி கொழும்பு விஹாரமாதேவி பூங்காவிற்கு அருகில்; ஆர்ப்பாட்ட பேரணியொன்று இன்று காலை நடைபெற்றது.

சிங்கள ராவய அமைப்பின் ஏற்பாட்டில் இடம்பெற்ற இவ்வார்ப்பாட்டத்தில் பிரதமருக்கு எதிரான கோசங்கள் எழுப்பட்டன.

பிரதமர், மகா சங்கத்தினரை பகிரங்கமாக விமர்சித்தமையை கண்டித்தே இந்த ஆர்ப்பாட்டத்தை மேற்கொள்வதாக ஆர்ப்பாட்டக்காரர்கள் தெரிவித்தார்கள். இதற்காக பிரதமர், நாட்டு மக்களிடம் மன்னிப்பு கோர வேண்டும் எனவும் ஆர்ப்பாட்டக்காரர்கள் தெரிவித்தார்கள்.

கொழும்பு விஹாரமாதேவி பூங்காவிற்கு அருகில் ஆரம்பமான ஆர்ப்பாட்ட பேரணி, கொழும்பு-07, பிளவர் வீதியிலுள்ள பிரதமரின் அலுவலகத்துக்குள் ஆர்ப்பாட்டக்காரர்கள் நுழைய முற்பட்டனர். இதனால், அங்கு பதற்ற நிலைமை ஏற்பட்டது.

பிரதமர் அலுவலகத்திற்கு பிரவேசிக்க முற்பட்ட வேளையில் ஏற்பட்ட அமைதியின்மையை கட்டுப்படுத்துவதற்காக பொலிஸார் நடவடிக்கைகளை மேற்கொண்டனர். கொழும்பு, பிளவர் வீதியை பொலிஸார் தற்காலிகமாக மூடினார்கள்.
பிரதமர் அலுவலகத்திற்குள் நுளைவதற்கு முற்பட்ட ஆர்ப்பாட்டக்காரர்களை பொலிஸார் தடுக்க முற்பட்ட போது, பொலிஸாருக்கும், பிக்குமார்களுக்கும் இடையே ஏற்பட்ட பிரச்சினையில் பிக்குகளில் ஒரு சிலருக்கு காயம் ஏற்பட்டது.

ஜாதிக ஹெல உறுமய கண்டனம்

இதே வேளை, சிங்கள ராவய அமைப்பின் மீது நடத்தப்பட்ட தாக்குதலை பிரதமர் டி.எம். ஜயரத்ன பொறுபேற்க வேண்டும் என ஜாதிக ஹெல உறுமய தெரிவித்துள்ளது.

இது குறித்து அந்த கட்சியின் ஊடகப் பேச்சாளர் நிஷாந்த ஸ்ரீ வர்ணசிங்க வெளியிட்டுள்ள அறிக்கையில் தெரிவிக்கப்பட்டுள்ளதாவது, கொழும்பில் உள்ள பிரதமரின் அலுவலகத்திற்கு எதிரில் சிங்கள ராவய அமைப்பினர் அமைதியான ஆர்ப்பாட்டத்தை நடத்தியுள்ளனர். அண்மையில் கைப்பற்றப்பட்ட ஆசியாவில் மிகப் பெரிய ஹெரோயின் தொகை தொடர்பில் ஓமல்பே சோபித தேரர் உட்பட பௌத்த மதத் தலைவர்கள் வெளியிட்டுள்ள கருத்துக்களுக்கு பிரதமர் தெரிவித்திருந்த கருத்துக்கள் குறித்து எதிர்ப்பை வெளிகாட்டுவதற்காகவே சிங்கள ராவய அமைப்பு இந்த ஆர்ப்பாட்டத்தை நடத்தியுள்ளது.

பௌத்த மதத் தலைவர்களுக்கு அவதூறு ஏற்படும் வகையில் பேசிய பிரதமர் புத்தசாசன அமைச்சர் பதவியில் இருந்து விலக வேண்டும் என இந்த அமைப்பு கோரிக்கை விடுத்து ஆர்ப்பாடத்தை நடத்தியுள்ளது. அமைதியாக நடைபெற்ற இந்த ஆர்ப்பாட்டத்தில் பொலிஸாரை பயன்படுத்தி பிக்குமார் மீது தாக்குதல் நடத்தப்பட்டுள்ளது. பிரதமரோ அல்லது அவரது செயலாளரோ ஆர்ப்பாட்டகார்களை சந்தித்து பேசாது, அவர்கள் மீது தாக்குதலை ஏவி பிக்குமார் இரத்தம் சிந்த காரணமான பிரதமரும் புத்தசாசன அமைச்சருமான டி.எம்.ஜயரத்ன இந்த பாவத்திற்கான பொறுப்பை ஏற்கவேண்டும். அகிம்சையான போராட்டத்தின் மீது நடத்திய தாக்குதலுக்கான பொறுப்பையும் பிரதமர் ஏற்கவேண்டும். ஆர்ப்பாட்டத்தின் மீது நடத்தப்பட்ட தாக்குதலை ஜாதிக ஹெல உறுமய வன்மையாக கண்டிக்கின்றது என வர்ணசிங்க தெரிவித்துள்ளார்.