சிரியாவில் தலைநகர் டமாஸ்கஸ் அருகே கடந்த ஆகஸ்டு மாதம் 21–ந்தேதி ரசாயன
குண்டுகள் வீசப்பட்டு 1,400–க்கும் மேற்பட்ட மக்கள் கொல்லப்பட்டனர். இதை
அதிபர் பஷார் அல்–ஆசாத்தின் ராணுவமே செய்தது என்று அமெரிக்கா புகார்
கூறியதுடன் ராணுவ நடவடிக்கை எடுக்க முடிவு செய்தது. ஆனால் சிரியாவின்
நட்புநாடுகளான ரஷியா, சீனா, ஈரான் ஆகியவை எதிர்ப்பு தெரிவித்தன.
இந்நிலையில் ஜெனிவாவில் அமெரிக்க, ரஷிய மந்திரிகள் நடத்திய பேச்சுவார்த்தையில் உடன்பாடு ஏற்பட்டது. சிரியாவிடம் இருக்கும் ரசாயன ஆயுதங்களை கைப்பற்றி அழிக்க தீர்மானிக்கப்பட்டது. அதற்கு சிரியாவும் ஒப்புக் கொண்டது. இதனால் போர் பதற்றம் சற்று தணிந்தது.
ஆனாலும் இந்த ரசாயன ஆயுதங்களை அழிப்பது தொழில்நுட்ப ரீதியில் சவால் மிகுந்த பிரச்சினை என்று நிபுணர்கள் கருதுகிறார்கள்.
இதற்கிடையில் சிரியா அதிபர் ஆசாத் தொலைக்காட்சிக்கு பேட்டி அளிக்கையில் இது குறித்து கருத்து வெளியிட்டார். அவர் கூறியதாவது:–
இது மிகவும் சிக்கலான தொழில்நுட்பம் சார்ந்த பெரிய பிரச்சினையாகும்.
நிறைய பணம் தேவைப்படும். சிரியா வசம் இருக்கும் இந்த ஆயுதங்களை அழிக்க ரூ.6
ஆயிரம் கோடி வரை செலவாகும். அதை நிறைவேற்ற ஓராண்டு காலம் ஆகலாம். இவ்வாறு
அவர் கூறினார்.
மேலும் ரசாயன ஆயுதங்களை சிரியா ராணுவம் பயன்படுத்தவில்லை என மறுத்த
அவர், ‘இந்த குற்றச்சாட்டை அமெரிக்காவே கூறுகிறது. அந்த நேரத்தில்
எங்களுடைய ராணுவம் முன்னேறி வந்தது. எனவே ரசாயன குண்டுகளை வீச அவசியம்
இல்லை. ரசாயன ஆயுதங்களை நாங்கள் மக்களுக்கு எதிராக பயன்படுத்தவில்லை என்று
தெரிவித்தார். ஐ.நா. நிபுணர் குழு அறிக்கை குறித்து கருத்து தெரிவிக்க இது
தகுந்த நேரம் இல்லை என்றும் அவர் கூறிவிட்டார்.
இந்த ரசாயன ஆயுதங்களை அமெரிக்காவிடம் ஒப்படைக்க தயாராக இருக்கிறீர்களா?
என கேட்டதற்கு அவர் பதில் அளிக்கையில், ‘இந்த செலவு, பொறுப்பு ஆகியவற்றை
ஏற்க அமெரிக்கா விருப்பம் தெரிவிக்க வேண்டும். இந்த பணியை ஏன் இவர்கள்
செய்யக்கூடாது’ என்று கூறினார்.
இதற்கிடையில் சிரியா விவகாரம் குறித்து ஐ.நா. பாதுகாப்பு சபையில் இடம்
பெற்றுள்ள அமெரிக்கா, ரஷியா, இங்கிலாந்து, பிரான்சு, சீனா தூதர்கள் அவசர
ஆலோசனை நடத்தி வருகிறார்கள். அத்துடன் ஐ.நா.வின் ஆயுத தடுப்பு அமைப்பும்
இன்று கூடி விவாதிக்கிறது.
0 comments:
Post a Comment