ரணிலை விரட்ட தீர்மானம் நிறைவேற்றம்!

மேல் மாகாண சபையின் ஐக்கிய தேசியக் கட்சியின் உறுப்பினர்கள் குழு நேற்று (24) ஐக்கிய தேசியக் கட்சியின் தலைவர் ரணில் விக்ரமசிங்கவின் செயற்பாடுகளுக்கு கடும் விமர்சனங்களை முன்வைத்துள்ளதுடன், விக்ரமசிங்க உடனடியாக ஐக்கிய தேசியக் கட்சியின் தலைமை பதவியில் இருந்து விலகவேண்டுமெனவும் ஏகமனதாக ஆலோசனையொன்றையும் நிறைவேற்றுள்ளதாக நாடாளுமன்ற உறுப்பினர் டிராண் அலஸின் 'மவ்பிம' பத்திரிகை செய்தி வெளியிட்டுள்ளது.

ஐக்கிய தேசியக் கட்சியின் நாடாளுமன்ற உறுப்பினர் ஜோசப் மைக்கல் பேரேராவின் மகன் மேல் மாகாண சபையின் உறுப்பினர் ஸ்ரீநாத் பெரோவினால் முன்வைக்கப்பட்ட இந்த யோசனைக்கு அனைத்து உறுப்பினர்களும் ஆமோதித்து ஏகமனதாக தீர்மானம் நிறைவேற்றியுள்ளதாக அந்த பத்திரிகையில் குறிப்பிடப்பட்டுள்ளது.

அந்த செய்திகுறிப்பின்படி, மேல் மாகாண சபையின் எதிர்க்கட்சித் தலைவரான மஞ்சூ ஸ்ரீ அரங்கல உள்ளிட்ட மாகாண சபை உறுப்பினர்கள் சிலரும் விக்ரமசிங்கவின் நடவடிக்கைகளுக்கு எதிர்ப்பு தெரிவித்துள்ளதுடன் கட்சியின் ஐக்கியத்தைக் கருத்திற் கொண்டும் கட்சியை வெற்றியை நோக்கி முன்னெடுப்பதற்கு விக்ரமசிங்கவினால் ஏற்படுகின்ற இடையூறுகள் தொடர்பாகவும் பல்வேறு கருத்துக்களை முன்வைத்துள்ளனர்.

எதிர்வரும் ஒக்டோபர் மாதம் 7ஆம் திகதி நடைபெறவுள்ள ஐக்கிய தேசியக் கட்சியின் செயற்குழுக் கூட்டத்தின் போது இதுதொடர்பாக மேலும் விடயங்களை முன்வைக்கவுள்ளதாக எதிர்க்கட்சித் தலைவர் மஞ்சூ ஸ்ரீ அரங்கல உறுதிபூண்டுள்ளதாக 'மவ்பிம' பத்திரிகையில் குறிப்பிடப்பட்டுள்ளது.

5:39 PM