நிந்தவூரின் பாதுகாப்புக்கு பொலிஸார் விசேட ஏற்பாடு

சுலைமான் றாபி;
அண்மைக் காலமாக நிந்தவூரில் ஏற்பட்டுள்ள அசாதாரண சூழ்நிலை காரணமாக  ஏற்பட்டிருக்கும் நிலைமையினைக் கருதிற்கொண்டு நேற்று இரவு விஷேட பாதுகாப்புக் கூட்டமொன்று நிந்தவூர்  ஜும்மா பள்ளிவாசல் காரியாலயத்தில் நடைபெற்றது. மட்டக்களப்பு - அம்பாறை மாவட்டங்களுப்   பொறுப்பான பிரதி பொலிஸ் மா அதிபர் திரு. இந்திரன் தலைமையில் இடம்பெற்ற இந்த கூட்டதிற்கு சிரேஷ்ட பொலிஸ் அத்தியட்சகர் திரு மஹகெதர, உதவிப் பொலிஸ் அத்தியட்சகர், தலைமையக பொலிஸ் பரிசோதகர் (HQI ) M ஹபார், சம்மாந்துறை நிலைய பொறுப்பதிகாரி M. தஹனக மற்றும் ஜும்மா பள்ளிவாசல் நிர்வாக சபை உறுப்பினர்கள் ஆகியோர்கள் கலந்து கொண்டனர்.

இக்கூட்டத்தில் நிந்தவூரின் பாதுகாப்பு நலன் கருதி அவற்றை 08 வலயங்களாக பிரிக்கப்பட்டுள்ளன. நிந்தவூரில் உள்ள ஒவ்வொரு பிரதான நுழைவாயில்களிலும் பொலிஸார் கடமைகளில் நிறுத்தப்பட உள்ளனர். அவர்கள் வாகன நடமாட்டங்களை அவதானிப்பதோடு, பாதுகாப்பு நலன் கருதி இரவு வேளைகளில் பொலிஸார் ரோந்து நடவடிக்கையில் ஈடுபடுவதோடு, பொது மக்களின் நடமாட்டங்களையும் அவதானிப்பர். தேவை ஏற்பட்டால் பரிசோதனைக்கும் உட்படுத்துவர்.

ஊரின் பிரதான சந்திகளில் பொலிஸ் குறிப்பு புத்தகம் நடைமுறையில் பேணப்படும் என்றும் இந்தக்கூட்டத்தில் தீர்மானிக்கப்பட்டதாக நிந்தவூர்  ஜும்மா பள்ளிவாசல் நம்பிக்கையாளர் சபையின் செயலாளர் M.A.M.றசீன்  தெரிவித்தார். 

மேலும். அவர்  தெரிவிக்கையில்  நிந்தவூரில் அண்மையில் நடைபெற்ற ஆர்ப்பாட்டத்தின் போது பொலிசாரினால் கைப்பற்றப்பட்ட துவிச்சக்கர வண்டிகளை இன்று (26.11.2013) சம்மாந்துறை பொலிஸ் நிலையத்தில் பெற்றுக்கொள்ள முடியுமென்றும்,  மோட்டார் சைக்கிள்களை நீதிமன்றத்தின் மூலம் அடையாளங்களை உறுதிப்படுத்தி பெற்றுக்கொள்ள முடியுமெனவும் தெரிவித்தார்.

1:39 PM