வடக்கில் இடம்பெற்று வருகின்ற படுகொலைகள், வன்முறைகள் மற்றும் அச்சுறுத்தல்களின் பின்னணி என்ன இதற்கு அரசாங்கத்தால் பதில் கூற முடியுமா எனக் கேள்வியெழுப்பிய சுமந்திரன் எம்.பி. தமிழ் மக்களின் கடும் போக்கினை ஆதரித்து மிதவாதப் போக்கினை எதிர்க்கும் சூழல் ஒன்று உருவாகியிருக்கின்றது என்றும் கூறினார்.
இதேவேளை இறந்தவர்கள் புலிகளாகவே இருந்தாலும் அவர்களுக்கு அஞ்சலி செலுத்துகின்ற உரிமை இருக்க வேண்டும் என்றும் சுமந்திரன் எம்.பி. சுட்டிக் காட்டி வலியுறுத்தினார்.
பாராளுமன்றத்தில் நேற்று வெள்ளிக்கிழமை இடம்பெற்ற 2014 ஆம் ஆண்டுக்கான வரவு செலவுத்திட்டத்தின் இரண்டாம் வாசிப்பு மீதான இறுதி நாள் விவாதத்தில் கலந்துகொண்டு உரையாற்றுகையிலேயே அவர் இதனைத் தெரிவித்தார்.
சுமந்திரன் எம்.பி. இங்கு மேலும் கூறுகையில்,
கடந்த 26 ஆம் திகதி தமிழ்த் தேசியக் கூட்டமைப்பின் யாழ். மாவடட எம்.பி.யான எஸ்.சிறிதரன் உரையாற்றிய போது சில கருத்துக்களை வெளியிட்டிருந்தார். அதன் பின் இரு தினங்களாக அவரது உரை தொடர்பில் இங்கு கருத்துக்கள் முன் வைக்கப்பட்டன.
அவரது உரையில் எந்தவித குறைபாடும் இருக்க வில்லை. எனினும் ஆக்ரோஷம் தென்பட்டது. இவரது உரையினை இந்த சபையில் அன்று எந்த உறுப்பினரும் எதிர்த்திருக்கவில்லை.
எனினும் நேற்று (நேற்று முன்தினம்) கூட்டமைப்பின் தலைவரான இரா.சம்பந்தன் உரையாற்றும் போது கடும் எதிர்ப்புக்கள் கிளம்பின. நாட்டினது நல்லிணக்கம் தொடர்பில் பெரும்பான்மையினரிடம் வேண்டுகோள்களை விடுத்துக் கொண்டிருந்த சந்தர்ப்பத்தில் தான் இவ்வாறு இடையூறுகள் குறுக்கீடுகள் ஏற்படுத்தப்பட்டன. இவை கவலையளிக்கும் விடயங்களாக அமைந்து விட்டன. சிறுபான்மையினருக்கு இந்த சபையில் இவ்வாறு இடம்பெறுகின்றதென்றால் இந்நாட்டில் எவ்வாறு இருக்கும் என்பதை உணர முடிகின்றது.
ஆக்ரோஷமான உரைக்கு ஆதரவளித்து மிதவாதக் கருத்துக்களுக்கு எதிர்ப்புகள் எழுகின்றன. நாம் நல்லிணக்கம் தொடர்பிலான கருத்துக்களை முன்வைக்கையில் ஏன் தடை ஏற்படுத்தப்பட வேண்டும்.
மாவீரர் தினம் என்பது பல வருட காலமாக அனுஷ்டிக்கப்பட்டு வருகின்ற ஒரு விடயமாகும். குறிப்பாக இம்மாவீரர் தினமானது வரவு செலவுத்திட்டத்தின் போது தான் இடம்பெறுகின்றது.
மரணித்தவர்கள் புலிகளாக இருந்தாலும் இராணுவத்தினராக இருந்தாலும் பொதுமக்களாக இருந்தாலும் யாராக இருந்தாலும் அவர்களுக்கு அஞ்சலி செலுத்துகின்ற உரிமை இருக்க வேண்டும். நாகரிக நாட்டில் உரிமைகளுக்கு மதிப்பளிக்க வேண்டும். அதை விடுத்து நாட்டை மோசமான நிலைக்கு இட்டுச் செல்லக்கூடாது. அடிப்படை உரிமைகள் மறுக்கப்படுகின்ற வகையில் உணர வைக்க வேண்டாம்.
வடக்கில் 25 வீத வளர்ச்சி ஏற்பட்டிருப்பதாக கூறப்படுகின்றது. இது முற்றிலும் புறம்பான தகவலாகும். வடக்கில் தங்கியுள்ள இராணுவத்துக்கு வழங்கப்படுகின்ற சம்பளமும் இந்த வளர்ச்சியில் தங்கியிருக்கின்றது. அதேபோன்று இராணுவம் மேற்கொள்கின்ற விவசாயம்இ உற்பத்தி விற்பனைஇ ஹோட்டல் நடத்துகை ஆகிய அனைத்தும் இந்த வளர்ச்சியில் தான் உள்ளடக்கப்படுகின்றது. வடக்கின் விருத்தி அல்லது வளர்ச்சி எனும் வடக்கு மக்கள் தமது சொந்தக் காலில் எழுந்து நிற்கும் நிலைமை உருவாக்கப்பட வேண்டும். ஆகவே இராணுவத்தினரால் மேற்கொள்ளும் நடவடிக்கைகளை வைத்து வடக்கின் பொருளாதார வளர்ச்சியை மதிப்பிட முடியாது.
தற்போது வடக்கில் நெடுந்தீவு பிரதேச சபைத்தலைவர் சுட்டுக்கொலை செய்யப்பட்டுள்ளார். முதலில் அது தற்கொலை என்றே கூறப்பட்ட போதிலும் பின்னர் அது கொலை என்று ஊர்ஜிதப்படுத்தியுள்ளது. அதே போன்று வடக்கில் தமிழ்த் தேசியக் கூட்டமைப்பின் உள்ளூராட்சி மன்ற உறுப்பினர்களது வீடுகள் தாக்குதல்களுக்கிலக்காகியுள்ளன.
வட மாகாண அமைச்சர் ஐங்கரநேசனின் வீட்டின் மீதும் தாக்குதல் நடத்தப்பட்டுள்ள அதேவேளை வட மாகாண சபை உறுப்பினர் எம்.கே. சிவாஜிலிங்கத்தின் வீட்டு வாயிலில் மலர் வளையம் வைக்கப்பட்டுள்ளது.
என்ன காரணத்திற்காக இவ்வாறு இடம் பெறுகின்றன. மாவீரர் தின நினைவு கூரல்களுக்கு பழிவாங்கும் நோக்கிலேயே இவை இடம்பெற்றிருக்கின்றன. இவையனைத்தும் யாரால் இடம்பெறுகின்றன என்பது தான் பாரிய கேள்வியாக இருக்கின்றது.
அரசாங்கத்தைச் சேர்ந்த எவருக்காவது இந்த கேள்விக்கு பதில் கூற முடியுமாக இருக்கின்றதா?
மேலும் உயர் பாதுகாப்பு வலயம் என்ற அடிப்படையில் வலி. வடக்கில் நடேஸ்வரா கல்லூரி அம்மன் ஆலயம் மற்றும் பிள்ளையார் கோவில் என்பன உடைத்து தரை மட்டமாக்கப்பட்டுள்ளன.
இதனை அறிந்து அங்கு நிலைமைகளை அவதானிப்பதற்குச் சென்ற வடமாகாண முதலமைச்சர் சம்பவ இடத்திற்கு செல்ல விடாது தடுக்கப்பட்டுள்ளார். முதலமைச்சர் ஒருவர் தமது பிரதேசத்தில் ஓரிடத்திற்கு செல்வதனைத் தடுப்பதற்கு சட்டத்தில் எங்கும் இடம் இல்லை. வடக்கில் நிலைமை இவ்வாறு தான் என்றால் வடமாகாணத்தை ஆட்சி செய்வது யார் என்ற கேள்வி எழுகின்றது. கட்டடங்களை அகற்றும் அதிகாரம் இராணுவத்துக்கு கிடையாது. வடக்கில் ஜனநாயகம் மிளிர்வதாக சர்வதேசத்துக்கு கூறி மார் தட்டிக் கொள்ளப்படுகின்றது.
எனினும் ஒரு இலட்சத்துக்கும் அதிகமான வாக்குகளைப் பெற்று முதலமைச்சராக தெரிவு செய்யப்பட்டுள்ள ஒருவர் தமது மக்களின் வாழ்விடப் பகுதிகளுக்கு செல்ல முடியாத நிலை உருவாக்கப்பட்டுள்ளது. இது தான் இராணுவ ஆட்சிக்கு முன்னுதாரணமாக அமைந்திருக்கின்றது. வடக்கில் தற்போது இடம்பெற்று வரும் சம்பவங்கள் அனைத்தும் அங்கு இராணுவ ஆட்சி இடம் பெறுவதை எடுத்தியம்பி நிற்கின்றன. வடக்கைப் பொறுத்த வரையில் அங்கு சட்டத்துக்கு இடமில்லை.
பிரித்தானிய பிரதமரின் வருகை மற்றும் அவரது கருத்துக்கள் தொடர்பில் இங்குள்ள எண்ணங்களைப் புரிந்து கொள்ள முடிகின்றது. எனினும் தமக்காக இரந்து பேசிகின்றனரே என்ற எண்ணம் வடக்கு மக்களிடத்தில் இருக்கின்றது.
கடந்த காலங்களில் தமிழ் மக்கள் மட்டுமல்லாது முஸ்லிம்களும் சிங்களவர்களும் கூட பாதிக்கப்பட்டனர். இதனை நான் மறுக்கவில்லை. இருந்த போதிலும் யுத்தம் நிறைவுக்கு கொண்டு வரப்பட்டு நான்கு வருடங்கள் கழிந்து விட்ட பின்னரும் வடக்கு கிழக்கைச் சேர்ந்த எமது மக்கள் மிக மோசமான கஷ்டங்களுக்கு முகம் கொடுத்து வருகின்றனர்.
இந்நாட்டில் சகலரும் ஒன்றிணைந்து செயற்படுவோம் என்பதையே தமிழ்த் தரப்பு வலியுறுத்திக் கொண்டிருக்கின்றது. எமது எண்ணங்களை ஏன் மறுக்கின்றீர்கள்?
கடும் போக்கான வாதங்களை ஆதரிக்கின்ற அரசாங்கம் ஏன் மிதவாத கருத்துக்களுக்கு எதிர்ப்புத் தெரிவிக்கின்றது. மித வாத குரல்களுக்கு மதிப்பளியுங்கள் என்று சிரேஷ்ட அமைச்சர்களிடம் வேண்டுகோள் விடுக்கிறேன்.
மீண்டும் ஓர் தடவை இந்த நாட்டை அதல பாதாளத்துக்குள் தள்ளி விடுவதற்கு எவரும் முயற்சிக்கக்கூடாது. அதேபோன்று கடும்போக்குகளுக்கும் இடமளிக்கக்கூடாது. இந்நிலையில் நாடு அதல பாதாளத்துக்கு இட்டுச் செல்வதை தடுக்கும் வகையில் தமிழ்த் தரப்பினரின் பொறுப்பினை தமிழ்த் தேசியக் கூட்டமைப்பு சரியாக நிறைவேற்றும் அதேபோன்று அரசாங்கமும் இவ்விடயத்தில் தனது கடமையையும் பொறுப்பினையும் நிறைவேற்றுவது அவசியமாகும் என்றார்.
0 comments:
Post a Comment