யாழ். குடாநாட்டில் தொடர்ந்தும் பிரச்சினைகள் இருக்கின்றதெனக் காட்டுவதற்காக பாதுகாப்புத் தரப்பினரின் ஏற்பாட்டில் செயற்பட்டு வந்த குழுவே தற்பொழுது கைது செய்யப்பட்டுள்ள ஆவா குழுவாகும் எனக் குற்றம் சாட்டியுள்ள வடக்கு மாகாண சபை உறுப்பினரும் முன்னாள் பாராளுமன்ற உறுப்பினருமான எம்.கே.சிவாஜிலிங்கம், இதுபோன்று வடக்கில் பாதுகாப்புத் தரப்பினரின் உதவியுடன் செயற்படுகின்ற ஆயுதக்குழுக்களின் செயற்பாடுகளை உடனடியாகக் கட்டுப்படுத்த வேண்டுமெனவும் தெரிவித்தார்.
யாழ்.குடாநாட்டில் இடம்பெற்ற பல்வேறு குற்றச் செயல்களுடன் தொடர்புடையவர்கள் எனச் சந்தேகிக்கப்படுகின்ற ஆவா குழுவினர் தொடர்பாகக் கருத்துத் தெரிவிக்கும் பொழுதே அவர் இவ்வாறு கூறினார்.இவ்விடயம் தொடர்பாக அவர் மேலும் தெரிவிக்கையில்,
வடக்கில் தொடர்ந்தும் இராணுவத்தினரை நிறுத்தி வைத்திருப்பதற்கு இங்கே சட்ட ஒழுங்கு சீரழிந்துள்ளது என வெளிக்காட்ட வேண்டிய தேவை அரசாங்கத்திற்கு இருக்கின்றது. இதற்காக பாதுகாப்புத் தரப்பினர் வடக்கில் செயற்படுகின்ற ஆயுதக் குழுக்களுக்கு பக்கபலமாகவும் பின்னணியாகவும் உள்ளனர்.
இதுபோன்றதொரு குழுவாகவே இந்த ஆவா குழு காணப்படுகின்றது. இதனை வழிப்படுத்தியுள்ள ஆவா என்று அழைக்கப்படுகின்ற வினோதன் 21 வயதுடைய இளைஞனாகக் காணப்படுகின்றார். இவர்களிடமிருந்து அண்மையில் தயாரிக்கப்பட்ட கைக் குண்டுகள் மீட்கப்பட்டுள்ளன. மீட்கப்பட்ட கைக்குண்டுகள் தமிழீழ விடுதலைப் புலிகளின் காலத்தில் கையாளப்பட்ட கைக்குண்டுகளாக இருந்திருந்தால் அவை மிகவும் பழமையானவையாக இருந்திருக்கும். ஏனெனில் விடுதலைப் புலிகளின் செயற்பாடுகள் இலங்கையிலிருந்து அற்றுப்போய் நான்கு வருடங்கள் கடந்துள்ளன.
எனவே மீட்கப்பட்ட கைக்குண்டுகள் நிச்சயமாக பாதுகாப்புத் தரப்பினருடையதாக இருக்கவேண்டும். இதனால் நாம் குறித்த ஆவாக் குழுவுக்கும் வடக்கில் செயற்படுகின்ற பாதுகாப்புத் தரப்பினருக்குமிடையில் நெருக்கமான தொடர்புகள் இருக்கின்றதென்பதை ஊகித்துக் கொள்ளமுடிகின்றது.
0 comments:
Post a Comment