தமிழர்களும், முஸ்லிம்களும் இணைந்து செயற்படுவதனை தடுக்க சூழ்ச்சி?

சஹாப்தீன் -
தமிழர்களும், முஸ்லிம்களும் ஒற்றுமைப்பட்டால் மாத்திரம்தான், இரு சமூகங்களும் எதிர்கொண்டிருக்கும் பிரச்சினைகளுக்கு தீர்வுகளை காண முடியுமென்று அடிக்கடி தெரிவிக்கப்படுகின்றது, அதற்கான முயற்சிகள் இடம்பெற்றுக் கொண்டாலும், ஏதோவொரு மூலையில், இவ்விரு இனங்களும் ஒற்றுமையுடன் செயற்படுவதனை தடுப்பதற்கான சூழ்ச்சிகளும் நடைபெற்றுக் கொண்டுதான் இருக்கின்றன. இதனைச் செய்கின்றவர்களாக தமிழர் தரப்பிலும், முஸ்லிம் தரப்பிலும் ஒரு சிலர் உள்ளார்கள்.

தமிழ் பேசும் இரு சமூகங்களும் எதிர்கொள்ளுகின்ற பிரச்சினைகள் அடிப்படையில் ஓரே மாதிரியாகவே இருக்கின்றன. எல்லைப்பிரச்சினை, காணி பிரச்சினை, பாதுகாப்பு பிரச்சினை, மீள்குடியேற்ற பிரச்சினை என பல பிரச்சினைகள் உள்ளன. இவற்றில் பெரும்பான்மை பேரினவாதிகளினால் இரு சமூகங்களுக்கும் செய்யப்படுகின்ற அநீயாங்களும் உள்ளன. தமிழர்கள் முஸ்லிம்களுக்கும், முஸ்லிம்கள் தமிழர்களுக்கும் செய்கின்ற அநீயாங்களும் உள்ளன.

இவ்வாறு நடைபெற்றுக் கொண்டிருக்கும் அநீயாயங்களுக்கு முடிவுகளை காண வேண்டுமாயின், பேச்சுவார்த்தைகள் நடைபெற வேண்டும். ஒவ்வொரு சமூகமும ஒற்றுமைப்பட வேண்டும். நிம்மதியாக வாழ, தர்மத்தின் படி விட்டுக் கொடுப்புக்களுக்கு தயாராக வேண்டும். எங்கு விட்டுக் கொடுப்புக்கும், ஒத்துழைப்புக்கும் மறுக்கப்படுமோ, அங்கு சந்தேகங்களும், குழப்பங்களும் ஏற்படுவதனை தவிர்க்க முடியாது.

அந்த வகையில் ஒரே மொழியை பேசுகின்ற தமிழர்களும், முஸ்லிம்களும் தங்களுக்கிடையே உள்ள பிரச்சினைகளை பேச்சுவாhர்த்தைகளின் மூலமாக தீர்த்துக் கொள்வதற்கு முன்; வருதல் வேண்டும். பேச்சுவார்த்ததைகளின் மூலமாக எட்டப்படுகின்ற தீர்வுகள் முழு தமிழர்களையும், அதே போன்று முஸ்லிம்களையும் திருப்திபடுத்த வேண்டுமென்று எதிர்பார்க்க முடியாது. அத்தகைய எதிர்பார்ப்புக்கள் தீர்வுகளுக்கு தடையாகவே அமையும். இதனை கருத்திற் கொள்ளாது,  எங்களின் பிரதேசம் பாதிக்கப்பட்டுள்ளதெனத் தெரிவித்து, பேச்சுக்களுக்கு எதிர்ப்புக்கள் காட்டப்படுமாயின,; அதனை இரு சமூகங்களின் ஒற்றுமைக்கு எதிரான நடவடிக்கையாகவும், பௌத்த பேரினவாதிகளின் திட்டங்களுக்கு துணை போகின்ற செயலாகவும்தான் கருத வேண்டும்.

இலங்கையில் காணப்படும் இன அடிப்படையிலான  பிரச்சினைகளுக்கு, அரசியல் அதிகாரங்களை இனங்களுக்கு இடையே பகிர்ந்து கொள்வதன் ஊடாகவே தீர்வுகளை காண முடியுமென்று உள்நாட்டிலும், வெளிநாடுகளிலும், சர்வதேச அமைப்புக்களும் வலியுறுத்திக் கொண்டிருக்கின்றன. அதனால், அதிகார பகிர்வுக்கான நகர்வுகள் இலங்கை அரசாங்கத்தின் மீது அழுத்தங்களாக மாறிக் கொண்டிருக்கின்றன. இந்த அழுத்தங்களில் இருந்து இலங்கை அரசாங்கம் விடுபட முடியாத நிலை தோன்றியுள்ளன.

இந்தப் பின்னணியில், சிறுபான்மைச் சமூகம் அரசியல் அதிகாரங்களை பெற்றுக் கொள்ள வேண்டுமாயின், தமிழர்களும், முஸ்லிம்களும் தங்களிடையே ஒற்றுமையுள்ளதென்று அரசாங்கத்திற்கும், சர்வதேசத்திற்கும் காட்ட வேண்டியுள்ளது. இதனை உணர்ந்து கொண்ட தமிழ், முஸ்லிம்களின் பிரதான அரசியல் கட்சிகள் ஒரு கூட்டு முயற்சியின் பிரகாரம் இனப்பிரச்சினைக்கான தீர்வுகளை முன் வைப்பதற்கு தயாராகிக் கொண்டிருக்கின்றன. முஸ்லிம்களின் பெரும்பான்மை ஆதரவைப் பெற்றுள்ள முஸ்லிம் காங்கிரஸும், தமிழர்களின் பெரும்பான்மை ஆதரவைப் பெற்றுள்ள தமிழ்த் தேசிய கூட்டமைப்பும் பேச்சுவார்த்தைகளை மேற்கொள்வதற்கு எடுக்கப்பட்டு வருகின்ற நடவடிக்கைகளுக்கு கல்முனையில் தமிழர்கள் தரப்பில் காட்டப்பட்ட எதிர்ப்புக்களுக்கு பௌத்த பேரினவாதிகளின் பின்னணி இருப்பதாக தெரிவிக்கப்படுகின்றன.

1990ஆம் ஆண்டுகளின் பின்னர் தமிழர்களும், முஸ்லிம்களும் இன மோதல்களில் ஈடுபட்டதன் பின்னணியில் பேரினவாதிகள் இருந்துள்ளார்கள் என்பதனை இரு சமூகங்களும் நன்கு அறிந்துள்ளன. ஆயினும், அதிலிருந்து படிப்பினை பெற்றவர்களாக இல்லாதிருப்பது வேதனைக்குரியதாகும்.

கல்முனையில் தமிழர்களுக்கும், முஸ்லிம்களுக்கும் இடையே ஒரு சில பிரச்சினைகள் உள்ளன. அதில் கல்முனை தமிழ் உபபிரதேச செயகத்தினை தரம் உயர்த்த வேண்டுமென்ற கோரிக்கை முக்கியமானதாகும். இந்த பிரதேச செயலகத்தினை தரம் உயர்த்துவதற்கு முஸ்லிம் அரசியல்வாதிகள் குறிப்பாக முஸ்லிம் காங்கிரஸார் தடையாக இருப்பதாக தமிழர் தரப்பினர் கூறிக் கொண்டிருக்கின்றார்கள்.

இதுபற்றி முஸ்லிம் அரசியல் தலைமைகளுடன் நாம் கேட்ட போது, குறிப்பிட்ட பிரதேச செயலகத்தினை தரம் உயர்த்திக் கொள்வதற்கு நாங்கள் ஒரு போதும் எதிர்ப்பு இல்லை. ஆனால், எல்லைகளை நிர்ணயம் செய்து கொள்வதில்தான் பிரச்சினைகள் உள்ளதென்று முஸ்லிம் காங்கிரஸாரும், ஏனைய கட்சிகளின் அரசியலவாதிகளும் தெரிவிக்கின்றார்கள்.

கல்முனை நகரைப் பொறுத்தவரை, முஸ்லிம்களின் வர்த்தக நிலையங்கள்தான் அதிகம் உள்ளன. அவற்றை தங்களின் எல்லைக்குள் இணைத்துக் கொள்வதற்கு முயற்சிகளை எடுப்பது, தீர்வாக அமையாது. அது தொடரான பிரச்சினைகளாகவே அமையும் என்ற யதார்த்திற்கு மாற்றமாக செயற்பட நினைப்பது சுமூகமான முடிவுகளை பெற்றுத்தராது.

கல்முனையில் உள்ள இந்த முக்கிய பிரச்சினைகளுக்கு பேச்சுவார்த்தைகளின் மூலமாக தீர்வுகளை காண முடியுமென்று நம்பிக்கை வைத்து, இரு சமூகங்களின் பிரதிநிதிகளும் பேச்சுக்களில் ஈடுபடுதல் வேண்டும். பேசுவதற்கு முன்னமே, தீமைகள் வருமென்று முடிவுகளை எடுத்துக் கொண்டு, பேசக் கூடாதென்று வரிந்து கட்டிக் கொண்டிருப்பது, சிறுபான்மையினருக்கு அரசியல் அதிகாரங்கள் வழங்கக் கூடாதென்று, நாளாந்தம் கருத்துக்களை முன் வைத்துக் கொண்டிருக்கும் கடும்போக்கு பௌத்த அமைப்புக்களின் சதி வலைக்குள் மாட்டிக் கொண்டதற்கு சமமாகும்.
கடந்த 23.10.2014 வியாழக்கிழமை கல்முனை மாநகர சபையில் கரையோர மாவட்ட பிரேரணை ஒன்று கொண்டு வரப்பட்டது. இதற்கு தமிழ்த் தேசிய கூட்டமைப்பின் உறுப்பினர்கள் எதிராக வாக்களித்துள்ளார்கள். 

முஸ்லிம்களை பெரும்பான்மையாகக் கொண்ட, கரையோர மாவட்டம் அமைந்தால், முஸ்லிம் பேரினவாதத்தின் நெருக்குதல்களுக்கு நாங்கள் உட்பட வேண்டி ஏற்படும். நாங்கள் வேண்டி நிற்கும் பிரதேச செயலகத்தினை தரம் உயர்த்துவதற்கு முஸ்லிம் காங்கிரஸ் தடையாக இருக்கின்றது. அதனால், நாங்கள் இப்பிரேரணையை எதிர்க்கின்றோம் என்று கூறியுள்ளார்கள்.

இந்த நாட்டில், சிங்களவர்களை பெரும்பான்மையாகக் கொண்ட மாவட்டங்களும், தமிழர்களை பெரும்பான்மையாகக் கொண்ட மாவட்டங்களும் பல உள்ளன. ஆனால், முஸ்லிம்களை பெரும்பான்மையாகக் கொண்ட, அம்பாரை மாவட்டம் சிங்களக் குடியேற்றங்களின் காரணமாக முஸ்லிம்களிடம் இருந்து பறிபோய்க் கொண்டிருக்கின்றது. இதனால், அம்பாரை மாவட்டத்தில் உள்ள பொத்துவில், சம்மாந்துறை, கல்முனை ஆகிய மூன்;று தொகுதிகளையும் உள்ளடக்கிய கரையோர மாவட்டத்தினை முஸ்லிம்கள் கோரிநிற்கின்றார்கள். 

இம்மாவட்டக் கோரிக்கையை முஸ்லிம் அரசியல் தலைமைகள் பெற்றுக் கொள்வதற்கு முயற்சிகளை எடுத்தாலும், அதனை தடுத்து நிறுத்துவதற்கு சிங்கள பேரினவாதிகள் முயற்சிகளை எடுத்துக் கொண்டும் வருகின்றார்கள்.
இத்தகைய பின்னணியில், கரையோர மாவட்டத்திற்கு தமிழர்கள் தரப்பில் காட்டப்படும் எதிர்ப்பை முன் வைத்து, கரையோர மாவட்டத்தினை தமிழர்கள் எதிர்க்கின்றார்கள் என்று தமிழர்களின் தலையில் பலியை போட்டு, மீண்டும் இரு சமூகங்களையும் கடந்த காலத்திற்கு அழைத்துச் செல்வார்கள் என்பதனை; புரிந்து கொள்ள வேண்டும்.

தமிழர்களும், முஸ்லிம்களும் இணைந்து செயற்பட வேண்டுமென்று தமிழ்த் தேசிய கூட்டமைப்பும், முஸ்லிம் காங்கிரஸும் கருத்துக்களை முன் வைத்து, இன்னும் ஒரு சில நாட்களில் பேச்சுக்களில் ஈடுபட உள்ளதனை, ஜாதிக ஹெல உறுமய ஆயுதப் போராட்டத்திற்கான முன் ஏற்பாடாக கருதி கருத்துக்களை முன் வைத்துள்ளது. இரு கட்சிகளும் இணைந்து செயற்பட எடுக்கும், முயற்சி, பின்னர் ஆயுதப் போராட்டத்திற்கு இட்டுச்செல்லுமென்று ஜாதிக ஹெலஉறுமயவின் தலைவர் தெரிவித்துள்ளார்.

இதே வேளை, தமிழ்த் தேசிய கூட்டமைப்பு முஸ்லிம் மக்களின் பிரச்சினைகள் பற்றியும் நாடாளுமன்றத்தில் பேசிக் கொண்டிருப்பதனால், அக்கட்சி பற்றிய நம்பிக்கைகள் கிழக்கு முஸ்லிம்களிடையே அதிகரித்துக் கொண்டிருக்கின்றன. இந்த நம்பிக்கையை கல்முனையில் அடிக்கடி தமிழ், முஸ்லிம் அரசியல்வாதிகளிடையே ஏற்பட்டு வரும் கருத்து மோதல்கள்; சிதைக்கச் செய்திடும் என்பதுதான் இரு சமூகங்களினதும் ஒற்றுமையை கோரி நிற்கும் உள்ளங்களின் வருத்தமாகும்.

தமிழ்த் தேசிய கூட்டமைப்பு இணைந்த வட, கிழக்கு மாகாணத்தையே அரசியல் அதிகார பரவலாக்கத்திற்குரிய பிரதேசமாக தொடர்ந்து கோரிக்  கொண்டிருக்கின்றது. இதனை முஸ்லிம் காங்கிரஸ் கொள்கையளவில் ஏற்றுக் கொண்டுள்ளது. முஸ்லிம் காங்கிரஸின் செயலாளர் எம்.ரி.ஹஸன்அலி, இணைந்த வட, கிழக்கில் தமிழர்களும், முஸ்லிம்களும் இணைந்து வாழ்வதனையே நாங்களும் விரும்புகின்றோம். ஆனால், கிழக்கில் தமிழர் தரப்பினர் எங்களை அடக்கி ஆளுவதற்கு எடுக்கும் நடவடிக்கைகளையும், பேரினவாதிகளின் நிகழ்ச்சி நிரல்களுக்கு ஒரு சிலர் செயற்பட்டுக் கொண்டிருப்பதனையும் தடுத்து நிறுத்துவதற்கு தமிழ்த் தேசிய கூட்டமைப்பு முன்வர வேண்டுமென்று கேட்டுள்ளார்.

கல்முனையில் முஸ்லிம்களை பெரும்பான்மையாகக் கொண்ட கரையோர மாவட்டத்தில் தமிழர்கள் வாழ்வதற்கு முன்வர மறுக்கும் நிலையில், இணைந்த வடக்கு, கிழக்கில் தமிழர்கள்தான் பெரும்பான்மையாக இருக்கப்போகின்றார்கள். இந்நிலையில், எவ்வாறு முஸ்லிம்கள் வாழ முடியுமென்றும் அவர் கேட்டுள்ளார்.

வடக்கும், கிழக்கும் இணைவதாக இருந்தாலும், கரையோர மாவட்டம் பெற்றுக் கொள்வதாக இருந்தாலும், அல்லது இரு சமூகங்களும் வேறுவகையில், அரசியல் அதிகாரங்களை பெற்றுக் கொள்வதாக இருந்தாலும் வடக்கு, கிழக்கு தமிழ், முஸ்லிம்களின் ஒற்றுமையுடன் கூடிய ஒருமித்த கருத்து அவசியமாகும். இதனை மறந்து சுயலாப அரசியலை மையப்படுத்திய தமிழ், முஸ்லிம் அரசியல்வாதிகளின் நடவடிக்கைகள் இரு சமூகங்களையும் நிரந்தரமாக பிரித்து வைத்திடும். அடம்பங் கொடியும் திரட்டால் மிடுக்கு. தமிழர்களும், முஸ்லிம்களும் இணைந்தால் வெற்றி.

நன்றி: வீரகேசரி வாரவெளியீடு

11:20 AM