புல்மோட்டைக் காணியில் ரணவிரு கம்மானய (கிராமம்) அமைக்கும் நடவடிக்கை துரிதம்; கிழக்கு மாகாண சபை உறுப்பினர் அன்வர்

புல்மோட்டை –
புல்மோட்டை பிரதேச காணிகள் அண்மைக் காலமாக படையினாரால் ஆக்கிரமிக்கப்பட்டு வருகின்ற வேளை கடந்த இரு தினங்களுக்கு முன்பு புல்மோட்டை 14ம் கட்டை பகுதியில் இராணுவ படை முகாமுக்கு முன்னாலுள்ள பொது மக்களுக்கு சொந்தமான 60ஏக்கர்  காணியை இராணுவத்தினருக்கான 'ரணவிரு கம்மானய' என்ற திட்டத்திற்காக அபகரிக்கும் நோக்கில் இராணுவம் நில அளவையாளர்களைக் கொண்டு அளவையிடப்பட்டு வருகின்றது. இவ் அளவீடுகள் எதுவும் முறைப்படி நிர்வாக ரீதியாக பிரதேச செயலாளரின் எந்தவித அனுமதியும் பெறப்படாமல் இடம்பெற்று வருகின்றதாக கிழக்கு மாகாண சபை உறுப்பினர்  அன்வர் தெரிவித்துள்ளார்.
அவர் மேலும் தெரிவித்துள்ளதாவது,

இதற்கு முன்னர்  படையினருக்காக பெறப்பட்ட காணிகள் அரச நில அளவையாளர்களைக் கொண்டு பெற்றுக் கொள்ளப்பட்டதும் குறிப்பிடத்தக்கது. மேற்படி ரணவிரு கம்மானய என்ற திட்டத்திற்காக தற்போது புல்மோட்டைப் பிரதேச மக்களின் பரம்பரையாக விவசாயம் செய்து வந்த காணிகளும் தோட்டம் செய்த மற்றும் அனுமதிப்பத்திர காணிகளும் துரிதமாக பல வகையான இயந்திரங்களைக் கொண்டு சுத்தம் செய்யும் நடவடிக்கைகள்  தற்போது இடம்பெற்று வருகின்றன.
இவ்வாறான தொடர்  நடவடிக்கைகள் புல்மோட்டை மக்கள் மத்தியில் மேலும் பதற்ற நிலையை தோற்றுவித்துள்ள அதே வேளை, கடந்த சில தினங்களுக்கு முன்பு இவ்விவகாரம் தொடர்பாக திருகோணமலை நீதிமன்றம் வரை சென்று எதிர்  வரும் ஒக்டோபர்  மாதம் 02ம் திகதி வரை இதனை மீள் விசாரணை செய்வதற்காக மாவட்ட செயலாளர்  மற்றும் பிரதேச செயலாளர்  ஆகியோரை நீதி மன்றத்தில் ஆஜராகுமாறு அழைப்பாணை விடுக்கப்பட்டுள்ளது. இவ்வாறு காணி தொடர்பான பிரச்சினைகள் நீதிமன்றத்தில் இருக்கின்ற போது படையினரின் நடவடிக்கை தொடர்ந்து கொண்டே செல்கின்றமை குறிப்பிடத்தக்கது. இது குறித்து நாங்கள் மிக அவசரமாக நீதிமன்றத்துக்கு ஆதரங்கள் மூலம் சமர்ப்;பிக்கவுள்ளதாகவும், எதிர்  வரும் கிழக்கு மாகாண  சபை அமர்வில் இதனை தெளிவாக எடுத்துக்கூறவிருப்பதாகவும் அவர் குறிப்பிட்டுள்ளார்.

7:51 PM