கல்முனை கரையோர மாவட்ட பிரேரணை கல்முனை மாநகர சபையில் நிறைவேற்றம்

எம்.வை.அமீர்:1961ஆம் ஆண்டு புதிதாக அம்பாரை மாவட்டம் உருவாக்கப்படுவதற்கு முன்பு மட்டக்களப்பு மாவட்டத்தின் தென்பகுதியாகவே இப்பகுதி இருந்தது. என்று கல்முனை மாநகரசபையின் பிரதி முதல்வர் ஏ.எல்.அப்துல் மஜீத்   (23-10-2014) இடம்பெற்ற சபை அமர்வின் போது, இப்பிராந்திய மக்களுக்கு கல்முனை கரையோர மாவட்டத்தின் அவசியத்தை வலியுறுத்தி பிரரேணை ஒன்றை முன்வைத்து உரையாற்றும் போதே மேற்கண்டவாறு தெரிவித்தார்.

 

கல்முனை மாநகரசபையின்மாதாந்த அமர்வு கல்முனை மாநகரமுதல்வர் சட்ட முதுமாணி நிஸாம் காரியப்பர் தலைமையில் இடம்பெற்றது. சபை நடவடிக்கையின் போது பிரதி முதல்வர் ஏ.எல்.அப்துல் மஜீதினால் இரண்டு பிரேரணைகள் முன்வைக்கப்பட்டன இதில் சாய்ந்தமருது வைத்தியசாலை வீதிக்கு ‘ஹுசைன் நீதவான் வீதி’ என பெயர்மாற்றுவதர்க்கான பிரேரணை முன்வைக்கப்பட்டபோது சபை அதனை ஏற்றுக்கொண்டு அங்கீகாரம் வழங்கியது. இதனைத் தொடர்ந்து கல்முனை கரயோரமாவட்டம் தொடர்பான பிரேரணையை முன்வைத்து சபையின் அங்கீகாரத்தை கோரி  தொடர்ந்து உரையாற்றிய கல்முனை மாநகரசபையின் பிரதி முதல்வர் ஏ.எல்..அப்துல் மஜீத்,

மட்டக்களப்பு மாவட்டத்தின்; தென்பகுதியாக அது இருந்த போது அதன் நிர்வாகத் தலை நகராக கல்முனை நகரமும் அதன் நிர்வாக அதிகாரியாக கல்முனை உதவி அரசாங்க அதிபர் ஒருவரும்; கடமையாற்றி வந்தவந்ததாகவும் . அவ்வாறான அன்றைய கல்முனை உதவி அரசாங்க அதிபரின் நிர்வாக எல்லைக்குள்தான் தற்போது உள்ள அம்பாறை மற்றும் உஹனை பிரதேச செயலாளர் பிரிவுகள் கூட உள்ளடங்கியிருந்தன. என்றும் தெரிவித்தார்.

மட்டக்களப்பு மாவட்டத்தின் தென்பகுதியிலுள்ள கரையோரப் பகுதிகளாகிய பெரியநீலாவணையிலிருந்து குமண வரையிலான கிராமங்களில்தான் மூன்றில் இரண்டு பகுதி மக்கள் செறிந்து வாழ்ந்து வந்ததாகவும். இவர்களில் மிகப் பெரும்பான்மையினர் தமிழ் பேசும் மக்களாவர் என்றும் எஞ்சிய மூன்றில் ஒரு பகுதியினரே அம்பாரை உஹனை ஆகிய பிரதேசங்களில் வாழ்ந்துவந்ததாகவும்  இவர்களில் மிகப் பெரும்பான்மையினர் சிங்களம் பேசும் சமூகத்தினராவர் என்றும் தெரிவித்தார்.

மட்டக்களப்பு மாவட்டத்தின் தென் பகுதியாகிய அன்றைய கல்முனை பிரிவில் நிர்வாக அலகுகளாக இருந்த இறைவரி உத்தியோகத்தர்பிரிவு(DRO) பிரிவுகள் பின்வருமாறு அதாவது

                                                       

முஸ்லிம் தமிழ் பிரேதேசங்களாக பாணமைபற்று, அக்கரைப்பற்று, நிந்தவூர்-கரைவாகுபற்று, மற்றும் சம்மாந்துறைப்பற்று என்பனவும் சிங்களப் பிரதேசமாக வேவகம்பற்று என இருந்ததாகவும், கிழக்கில் ஓரு புதிய மாவட்டம் உருவாகுவதானால் மேற்கூறிய இறைவரி உத்தியோகத்தர் பிரிவு(DRO) பிரிவுகளை உள்ளடக்கிய பகுதியே புதிய ஒரு மாவட்டமாகப் பிரகடனப்படுத்தப் பட்டிருக்க வேண்டும். என்றும் தெரிவித்தார்.

இன்று உள்ள புதிய அம்பாரை மாவட்டம் உருவாவதற்கு முன்னோடியாக 1959ம் ஆண்டு ஒரு எல்லை நிர்ணய சபை அமைக்கப்பட்டது. என்றும் அந்த சபையானது மட்டக்களப்பின் தென் பகுதியான கல்முனைப் பிராந்தியத்துடன் பிந்தனைப்பற்று எனப்படும் ஒரு புதிய நிலப்பரப்பை மொனராகல மாவட்டத்திலிருந்து பிரித்தெடுத்து கல்முனை பிராந்தியத்துடன் இணைத்து அதற்கு அம்பாரை மாவட்டம் என்று நாமமும் சூட்டியதாகவும் தெரிவித்தார்.

தமிழ் பேசும் மக்கள் பெரும்பாண்மையாக வாழ்ந்து வந்த பாரம்பரிய பிரதேசமாகிய கல்முனை பிரதேசம் புதிய மாவட்டமாக பிரகடனப் படுத்தப்படாமல்  மாறாக அதனை ஒரு சிங்களப் பெரும்பாண்மை நிலத்தைக் கொண்ட மாவட்டமாக மாற்ற வேண்டும் என்ற குறுகிய இனவாத நோக்குடன் புதிய அம்பாரை மாவட்டம் சிங்களவர்களின் பெரும் நிலப்பரப்பையும் சனத் தொகையினையும் உள்ளடக்கியதாக இவ்வாறு திட்டமிட்டு உருவாக்கப்பட்டது. என்றும் தெரிவித்தார்.

தொடர்ந்து உரையாற்றிய பிரதி முதல்வர், புதிதாக இணைக்கப்பட்ட தெஹியத்த கண்டிய, பதியத்தலாவ, மஹாஓய என்ற பிந்தனபற்று பிரதேசம் 1498.87 ச.கி. மீட்டர் பரப்பளவைக் கொண்டதாகும். என்றும் 1971ம் ஆண்டு குடிசனமதிப்பின்படி புதிய அம்பாரை மாவட்டத்தில் 47% முஸ்லிம்களும் 30% சிங்களவர்களும் 23% தமிழர்களும் வசித்துள்ளனர். நிலப்பரப்புடன் இன விகிதாசாரத்தை ஒப்பிடும் போது 675 சதுரமைல் பரப்பை தமதாகக் கொள்ள வேண்டிய சிங்களவர்கள் ஒரு புதிய அம்பாரை தேர்தல் தொகுதியை 850 ச. மைல்களைக் கொண்டதாக 1976ல் எல்லைகள் வகுக்கப்பட்டு அமைத்துக் கொண்டனர். என்றும் தெரிவித்தார்.

 

1952 கல்லோயாத் திட்டத்தின் கீழ் ஏராளமான சிங்களவர்கள் அம்பாரை தொகுதியில் புதிதாக குடியேற்றப்பட்ட போது முஸ்லிம்களுக்கும் தமிழர்களுக்கும் சொந்தமான காணி, நிலம்கள் பல்வேறு காரணங்களை மையமாக வைத்து பறிக்கப்பட்டும், சுவீகரிக்கப்பட்டும் அவர்களது நிலப்பரப்பு விசாலமாக்கப்பட்டது. என்றும் தற்போதைய கணிப்பீட்டின் படி மாவட்டத்தின் மொத்த நிலப்பரப்பில் 76% சதவீதமாகிய 1330 சதுரமைல் நிலப்பரப்பை 38% சிங்களவர்களும், 24% சதவீதமாகிய 425 சதுரமைல் பரப்பில் 62 %மூமான தமிழ் பேசும் மக்களும் வாழ்ந்து வருகின்றனர். என்றும் தெரிவித்தார்.

 

முன்பிருந்த இறைவரி உத்தியோகத்தர் பிரிவு(DRO) அமைப்பிலிருந்து பின்னர் புதிதாக உதவி அரசாங்க அதிபர்; பிரிவுகள் அமைப்பதற்கான எல்லைகள் வகுக்கப்பட்ட போது தமிழ் பேசும் சமூகத்தினராகிய முஸ்லிம்களும் தமிழர்களும் அவர்கள் வாழ்ந்து வந்த குறுகிய நிலப் பரப்பைக் கொண்ட கிராமிய எல்லைகளுக்குள் மட்டுப்படுத்தப்பட்டனர். என்றும் அவர்களது பெரும் பகுதியான விவசாய நிலங்கள், மேய்ச்சல் நிலங்கள், நன்னீர் மீன்பிடி பிரதேசங்கள் போன்றன பிரித்தெடுக்கப்பட்டு அரசாங்கத்தால் சிங்களப் பிரதேசங்களுடன் இணைக்கப்பட்டன. புதிதாக உதவி அரசாங்க அதிபர் பிரிவுகளின் எல்லைகள் வகுக்கப்பட்ட போது எல்லை நிர்ணய சபை எதுவும் அமைக்கப் படவுமில்லை பொதுமக்களின் ஆலோசனைகள் எதுவும் பெறப்படவும் இல்லை. என்றும் இவ்வாறு எல்லைகள் வகுக்கப்பட்டபோது முஸ்லிம் கிராமங்கள் அதிகமாக பாதிக்கப்பட்டன. என்றும் தெரிவித்தார்.

இன்றுள்ள சிங்களப் பெரும்பாண்மை லஹுகல பிரதேச செயலகப் பிரிவானது முன்பிருந்த முஸ்லிம், தமிழர் பெரும்பாண்மை பிரதேசமாகிய பாணமைப்பற்று இறைவரி உத்தியோகத்தர் பிரிவின் (DRO) ஒரு பகுதியாகும். பாணமைப் பற்றானது பின்னர் பொத்துவில் மற்றும் லஹுகல உதவி அரசாங்க அதிபர் பிரிவுகளாக பிரிக்கப்பட்ட போது பின்வரும் வகையில் முஸ்லிம், தமிழர் பிரதேசம்கள் திட்டமிட்டு பழிவாங்கப்பட்டதாகவும் தெரிவித்தார்.

 

1981ஆம் ஆண்டு சனத் தொகைக் கணக்குப்படி 6252 சிங்கள பெரும்பாண்மை சனத்தொகையினருக்காக அமைக்கப்பட்ட லஹுகல பிரதேச உதவி அரசாங்க அதிபர் பிரிவுக்கு ஒதுக்கப்பட்ட காணியின் விஸ்தீரணம் 380 சதுர மைலாகும். அதேவேளை எஞ்சிய 20152 முஸ்லிம் தமிழர் சனத்தொகையைக் கொண்ட பொத்துவில் உதவி அரசாங்க அதிபர் பிரிவுக்கு ஒதுக்கப்பட்டுள்ள காணியின் விஸ்தீரணம் ஆக 116 சதுரமைல் மட்டுமேயாகும். என்றும் தெரிவித்தார்.

பழைய சம்மாந்துறை இறைவரி உத்தியோகத்தர் பிரிவானது(DRO) மேற்கு எல்லையாக  கொண்டவட்டுவான், அம்பாறைக் குளம், அம்பாறை நகர பிரதேசம், உஹனையை அண்மித்த பகுதிகளிலும் அத்தோடு வரிப்பதன்சேனையிலும் ஒருபகுதியையும் உள்ளடக்கியதாக இருந்தது. இதில் ஏறக்குறைய 65 சதுரமைல் பிரதேசம் பிரித்தெடுக்கப்பட்டு வேவகம் பத்து (DRO) பிரிவோடு சேர்க்கப்பட்டுள்ளது. வரலாறாகும் என்றும் தெரிவித்தார்.

1955ஆம் ஆண்டில் நிருவாக மாவட்ட சட்டம் இலக்கம் 22இல் விபரிக்கப்பட்ட பிரகாரம் பின்வரும் 20 நிருவாக மாவட்டம்கள் ஏற்படுத்தப்பட்டு ஒவ்வொன்றுக்கும் தனித்தனி மாவட்ட அதிபர்களும் நியமிக்கப்பட்டனர். என்றும் தெரிவித்தார்.

கொழும்பு, கழுத்துறை, கண்டி, மாத்தளை, நுவரெலிய, காலி, மாத்தறை, ஹம்பாந்தோட்டை, யாழ்ப்பாணம், மன்னார், வவுனியா, மட்டக்களப்பு, திருகோணமலை, குருநாகல, புத்தளம், அனுராதபுரம், பொலன்னறுவ, பதுளை, இரத்தினபுரி, கேகாலை.

அதன் பின்னர் கடந்த பல தசாப்தங்களாக மொணராகலை (1959), அம்பாறை (1961), கம்பஹா (1978),முல்லைத்தீவு (1975),கிளிநொச்சி (1982), ஆகிய மாவட்டங்கள் அவ்வப்போது ஏற்படுத்தப்பட்டன. இதன் பிரகாரம் காலத்துக்குக் காலம் எல்லைகள் மாற்றப்பட்டுப் புதுப்புது மாவட்டங்கள் உருவாக்கப்பட்டு வந்துள்ளன என்பது வரலாறு என்றும் தெரிவித்தார்.

எனவே இச்சபையில் புதிதாக கல்முனை மாவட்டம் ஒன்றின் தேவையினை வேண்டி பிரேரணையாக சமர்ப்பிப்பதாகவும் தெரிவித்தார்.

புதிதாகக் கல்முனை மாவட்டம் ஏற்படுத்தப்படுவதால், ஒருதலைப்பட்சமாக புதிதாக குடியமர்த்தப்பட்ட பெரும்பாண்மை சிங்களவர்களின் நலனுக்காகமட்டும் ஏற்படுத்தப்பட்ட அம்பாரை மாவட்டத்தினால் கரையோரப் பிரதேசத்தில் வாழும் பெரும்பாண்மை முஸ்லிம்களுக்கும், தமிழர்களுக்கும் ஏற்பட்ட அநீதி நீக்கப்படுவது மட்டுமல்லாமல் கல்முனைக் கரையோரப் பிரதேசத்தில் வாழும் பெரும்பாண்மை முஸ்லிம்களும், தமிழர்களும் அரசாங்க நிர்வாத்துக்காக நாள் தோறும் அனுபவித்து வரும் பல்வேறு பிரச்சினைகளுக்கும் நிவாரணம் ஏற்படும் என்றும் வலியுறுத்தினார்.

கல்முனை நிருவாக மாவட்டம் - விபரம்

முன்னர் இருந்த இறைவரி உத்தியோகத்தர் பிரிவு(DRO) பிரிவுகளான பாணமைப்பத்து, அக்கரைப்பத்து, நிந்தவூர்-கரைவாகுப்பற்று, சம்மாந்துறைப்பத்து, வேவகம்பத்து தெற்கு ஆகிய பிரதேசங்கள் உள்ளடங்கிய கல்முனை, சம்மாந்துறை, பொத்துவில் ஆகிய தேர்தல் தொகுதிகளை உள்ளடக்கிய பிரதேசம்.

(விஸ்தீரணம்: 2293.89 ச.கி.மீ,
சனத்தொகை 2012 குடிசன மதிப்புப்படி 447509
முஸ்லிம்கள் 282159 (63%), சிங்களவர்கள் 51675 (11.5%), தமிழர் 102228(22.8%)
காணி, இயற்கை வளங்கள் ஆகியவற்றை இன விகிதாசாரத்துக்கு ஏற்றபடி பிரசே செயலாளர் பிரிவுகளின் எல்லைகள் மறுசீரமைக்கப்படுதல்.

புதிதாக ஏற்படுத்தப்படும் பிரதேச செயலாளர் பிரிவுகள் உள்ளுர் சபை பிரதேசங்களாகப் பிரகடனப்படுத்தல். வேண்டும் என்றும் தெரிவித்தார்.

குறித்த கல்முனை கரயோரமாவட்டம் சம்மந்தமான பிரேரணை இரண்டு மணிநேரத்துக்கு மேலாக விவாதிக்கப்பட்டு ஆதரவானதும் எதிரானதுமான கருத்துக்கள் முன்வைக்கப்பட்டன.பின்னர் சபையில் பிரசன்னமாகியிருந்த உறுப்பினர்கள் மத்தியில் வாக்கெடுப்புக்கு விடப்பட்டு பெரும்பான்மை வாக்குகளால் நிறைவேற்றப்பட்டது.

இப்பிரேரணைக்கு தமிழ் தேசிய கூட்டமைப்பு எதிராக வாக்களிப்பு, பொதுசன ஐக்கிய முன்னணி உறுப்பினர் ஒருவர் நடுநிலை, மேலதிக வாக்குகளால் பிரேரணை சபையில் நிறைவேற்றம்

3:56 PM