ஸ்ரீ லங்கா முஸ்லிம் காங்கிரஸ் ஓரு அங்கீகரிக்கப்பட்ட அரசியல் கட்சியாக பதிவு செய்யப்பட்டு 27 ஆண்டுகள் நிறைவடைவதையிட்டு கொழும்பு 2இல் அமைந்துள்ள கட்சியின் 'தாருஸ்ஸலாம்' தலைமையகத்தில் முக்கிய நிகழ்வொன்று புதன் கிழமை (11.02.2015) மாலை 5.00 மணிக்கு கட்சியின் தலைவரும் நகர அபிவிருத்தி, நீர் வழங்கல் மற்றும் வடிகாலமைப்பு அமைச்சருமான ரவூப் ஹக்கீம் தலைமையில் இடம்பெறவுள்ளது.
இந் நிகழ்வில் 'தாராளத்துவ கோட்பாட்டின் விழுமியங்களும், முஸ்லிம்களும்' என்ற தொனிப்பொருளில் உயர் கல்வி இராஜாங்க அமைச்சர் பேராசிரியர் ரஜீவ விஜேசிங்க சிறப்புரையாற்றுவார்.
முன்னாள் அமைச்சர் மர்ஹூம் எம்.எச்.எம். அஷ்ரப் அவர்களால் தோற்றுவிக்கப்பட்ட ஸ்ரீ லங்கா முஸ்லிம் காங்கிரஸ், 1988 ஆம் ஆண்டு பெப்ரவரி மாதம் 11 ஆம் திகதி ஓர் அங்கீகரிக்கப்பட்ட அரசியல் கட்சியாக பதிவு செய்யப்பட்டது குறிப்பிடத்தக்கதாகும்.
இக் கட்சி, பல்வேறு சவால்களுக்கு முகம் கொடுத்தவண்ணம் முஸ்லிம்கள் உட்பட இந் நாட்டின் ஒடுக்கப்பட்ட மக்களின் உரிமைகளுக்காக குரல் கொடுத்து வருவதோடு, இலங்கையின் அரசியல் களத்தில் பலம் பொருந்திய மூன்றாவது சக்தியாகவும் இடம்பிடித்துள்ளது.
இக் கூட்டத்தில் கலந்துகொள்ளுமாறு அதன் ஏற்பாட்டாளரும், கட்சியின் செயற்குழு செயலாளருமான ஸியாத் ஹமீத் ஸ்ரீ லங்கா முஸ்லிம் காங்கிரஸ் சார்பில் அனைவருக்கும் அழைப்பு விடுத்துள்ளார்.
டாக்டர்.ஏ.ஆர்.ஏ. ஹபீஸ்
ஊடக ஆலோசகர்
0 comments:
Post a Comment