நீதியமைச்சர் விஜேதாஸ ராஜபக் ஷ அண்மையில் பாராளுமன்றத்தில் இலங்கை முஸ்லிம்கள் தொடர்பில் தெரிவித்த கருத்துகளுக்கு முஸ்லிம் பாராளுமன்ற உறுப்பினர்கள், அமைச்சர் விஜேதாஸ ராஜபக் ஷவை இன்று நேரில் சந்தித்து தமது அதிருப்தியைத் தெரிவிக்கவுள்ளனர்.
அத்தோடு அமைச்சரின் கருத்துக்கள் தவறானவை என்பதை அத்தாட்சிகளுடன் நிரூபிக்கவுள்ளனர்.
நேற்று முன்தினம் மாலை அகில இலங்கை ஜம் இய்யத்துல் உலமா சபையின் தலைமைக் காரியாலயத்தின் கேட்போர் கூடத்தில் நடைபெற்ற முஸ்லிம் பாராளுமன்ற உறுப்பினர்களுடனான கூட்டத்திலேயே மேற்குறிப்பிட்ட தீர்மானம் மேற்கொள்ளப்பட்டது.
கூட்டத்துக்கு அகில இலங்கை ஜம்இய்யத்துல் உலமா சபையின் தலைவர் அஷ்ஷெய்க் எம்.ஐ.எம்.ரிஸ்வி முப்தி தலைமை வகித்தார்.
கூட்டத்தில் முஸ்லிம்களின் சமகால பிரச்சினைகள், சவால்கள், முஸ்லிம் தனியார் சட்ட சீர்திருத்தங்கள் மற்றும் நீதியமைச்சர் விஜேதாச ராஜபக் ஷ பாராளுமன்றில் முஸ்லிம்கள் தொடர்பாக தவறான கருத்துக்களைத் தெரிவித்தமை என்பன தொடர்பில் கலந்தாலோசிக்கப்பட்டது.
இதன்போது அகில இலங்கை ஜம் இய்யத்துல் உலமா சபை, முஸ்லிம் பாராளுமன்ற உறுப்பினர்கள், முஸ்லிம்களின் சமகால பிரச்சினைகளின் தீர்வுகளுக்கு பொறுப்புடன் செயற்பட வேண்டும் என அறிவுறுத்தியது.
இதுதொடர்பில் அகில இலங்கை ஐம் இய்யத்துல் உலமா சபையின் தலைவர் அஷ்ஷெய்க் எம்.ஐ.எம்.ரிஸ்வி முப்தி கருத்து தெரிவிக்கையில், முஸ்லிம் பாராளுமன்ற உறுப்பினர்கள் மார்க்க விடயத்திலும், சமூக விடயங்களிலும் கட்சி பேதங்களை மறந்து ஒற்றுமைப்பட்டுத் தங்களுக்குள் முறுகல்களின்றி நிதானமாக செயற்படவேண்டும் என வேண்டினோம்.
தாம் மேற்கொள்ளும் ஒவ்வொரு நடவடிக்கைகளுக்கும் மஹ்சரில் கேள்வி கணக்கு இருக்கிறது. அதனால் கேட்கப்படும் கேள்விகளிலிருந்தும் பாதுகாத்துக் கொள்ளும் வகையில் தமது செயற்பாடுகள் அமைய வேண்டுமென முஸ்லிம் பாராளுமன்ற உறுப்பினர்களும், அமைச்சர்களும் வேண்டப்பட்டார்கள். முஸ்லிம் பாராளுமன்ற உறுப்பினர்கள் அனைவரும் கட்சி வேறுபாடுகளின்றி சமூகத்துக்காக ஒன்றிணைந்து செயற்படுவதாக உறுதி வழங்கினார்கள்.
பள்ளிவாசல்கள் மற்றும் இனவாதத்துக்கு எதிரான ஏராளமான வழக்குகள் தீர்க்கப்படாது தேங்கிக் கிடக்கின்றன. ஆர்.ஆர்.ரி. அமைப்பு இந்த வழக்குகளில் ஆஜராகி வருகின்றது.
இந்த வழக்குகளுக்கு விரைவில் தீர்வுகளைப் பெற்றுக்கொள்வதற்கான ஏற்பாடுகளை முஸ்லிம் பாராளுமன்ற உறுப்பினர்கள் மேற்கொள்ள வேண்டுமென அறிவுறுத்தப்பட்டனர்.
முஸ்லிம் பாராளுமன்ற உறுப்பினர்களும் அமைச்சர்களும் பாராளுமன்றத்தில் உள்ள முஸ்லிம்களின் பிரச்சினைகளை விளங்கிக் கொண்டுள்ள பெரும்பான்மை இன பாராளுமன்ற உறுப்பினர்கள் ஊடாக பிரச்சினைகளுக்கு தீர்வுகள் பெற்றுக்கொள்ள முயற்சிக்க வேண்டும் என்றும் தீர்மானிக்கப்பட்டது.
முஸ்லிம் தனியார் சட்டத்தில் திருத்தங்களை மேற்கொள்வதற்காக நியமிக்கப்பட்டுள்ள அமைச்சரவை உபகுழு, முன்னாள் உயர்நீதிமன்ற நீதியரசர் சலீம் மர்சூபின் தலைமையிலான குழுவின் சிபாரிசுகளை கவனத்திற் கொள்வதெனவும் தீர்மானிக்கப்பட்டது. சலீம் மர்சூப்பின் தலைமையில் நியமிக்கப்பட்ட முஸ்லிம் தனியார் சட்டத்தில் திருத்தங்களை சிபாரிசு செய்வதற்கான குழு எதிர்வரும் 27 ஆம் திகதி தனது அறிக்கையை நீதியமைச்சரிடம் கையளிக்கவுள்ளது.
அவ்வறிக்கையை முஸ்லிம் அமைச்சர்கள் ஆய்வுக்குட்படுத்துவதாகவும் தீர்மானம் மேற்கொள்ளப்பட்டது.
கூட்டத்தில் அமைச்சர்கள், பாராளுமன்ற உறுப்பினர்களான கபீர் ஹாஷிம், ரவூப் ஹக்கீம், ரிசாத்பதியுதீன், பெளசி, பைசர் முஸ்தபா, அமீர் அலி, ஹரீஸ், இஷாக், நவவி, அப்துல்லா மஹ்ரூப் , மஸ்தான், மரிக்கார், முஜிபுர் ரஹ்மான், அலிசாஹிர் மெளலானா மற்றும் அசாத்சாலி, அமைச்சர் எம்.எச். ஏ.ஹலீம் சார்பில் எம்.எச்.எம்.பாஹிம் உட்பட பலர் கலந்து கொண்டனர்.
0 comments:
Post a Comment