நாளை இலங்கை வடக்கு மாகாணத் தேர்தல்... ராணுவ கண்காணிப்பில் தேர்தல் நடத்தக்கூடாது என கோரிக்கை!

இலங்கை வடக்கு மாகாணத் தேர்தல் நாளை நடைபெற உள்ளது.  உள்நாட்டு போருக்குப் பிறகு தற்போது முதல்முதலாக தேர்தல் நடத்தப்படுகிறது. 36 உறுப்பினர்களை தேர்வு செய்ய நடத்தப்படும் இத்தேர்தலில், மக்கள் அச்சமின்றி வாக்களிக்க ராணுவத்தின் தலையீடு இருக்க கூடாது என்று, தமிழ் தேசியக் கூட்டணிக் கட்சி கோரிக்கைவிடுத்துள்ளது. தெருவெங்கும் ராணுவ வீரர்கள் நிற்பதால் வாக்காளர்கள் எப்படி அச்சமின்றி வாக்குச்சாவடிக்கு செல்வார்கள் என்றும் அக்கட்சி கேள்வி எழுப்பியுள்ளது.

தேர்தலை முன்னிட்டு யாழ்பாணம் மற்றும் மன்னார் மாவட்டங்களில் கூடுதல் பாதுகாப்பு ஏற்பாடுகள் செய்யப்பட்டுள்ளன. யாழ்பாணத்தில் உள்ள அனைத்து வாக்குச் சாவடிகளுக்கும் கூடுதல் போலீஸ் பாதுகாப்பு போடப்பட்டுள்ளது. தேர்தல் பணிகளில் ரத்தினபுரி மாவட்டத்திலுள்ள 113 தமிழ் பேசும் ஊழியர்களை இலங்கை அரசு ஈடுபடுத்தியுள்ளது. மேலும் தேர்தல் பிரச்சாரம் நேற்று மாலை முடிந்தவுடன், அரசாங்கத்தின் ஆதரவு கட்சிகளின் சார்பில் போட்டியிடாத சுயேட்சை வேட்பாளர்கள் மீது தாக்குதல் நடத்தப்படுவதாக புகார்கள் எழுந்துள்ளது. இதனிடையே இலங்கையின் மத்திய மாகாணத்தில் மலைவாழ் தமிழர்கள் அதிகம் வசிக்கும் இடங்களில் தமிழர்களிடையே ஒற்றுமை இல்லாததால், தமிழ் கட்சிகள் தோல்வியடையும் நிலை உள்ளதாகவும் தகவல்கள் தெரிவிக்கின்றன. 

11:09 AM