• Latest News

    October 27, 2014

    முதலாவது டெஸ்ட் கிரிக்கெட்: பாகிஸ்தான் அணி அபார வெற்றி

    ஆஸ்திரேலியா - பாகிஸ்தான் கிரிக்கெட் அணிகள் இடையிலான முதலாவது டெஸ்ட் போட்டி துபாயில் கடந்த 22-ந்தேதி தொடங்கியது. முதல் இன்னிங்சில் முறையே பாகிஸ்தான் 454 ரன்களும், ஆஸ்திரேலியா 303 ரன்களும் எடுத்தன. 151 ரன்கள் முன்னிலையுடன் 2-வது இன்னிங்சை ஆடிய பாகிஸ்தான் 2 விக்கெட்டுக்கு 286 ரன்களுடன் டிக்ளேர் செய்து, 438 ரன்களை வெற்றி இலக்காக நிர்ணயித்தது. இமாலய இலக்கை நோக்கி 2-வது இன்னிங்சை தொடங்கிய ஆஸ்திரேலியா நான்காம் நாள் முடிவில் 4 விக்கெட்டுக்கு 59 ரன்களுடன் தோல்வியின் பாதையில் தத்தளித்தது.

    இந்த நிலையில் 5-வது மற்றும் கடைசி நாள் ஆட்டம் நேற்று நடந்தது. நிதானமாக ஆடிய தொடக்க வீரர் கிறிஸ் ரோஜர்ஸ் (43 ரன், 131 பந்து) இம்ரான் கானின் ‘யார்க்கர்’ பந்து வீச்சில் கிளீன் போல்டு ஆனார். அதைத் தொடர்ந்து சுழற்பந்து வீச்சாளர்களின் பிடியில் சிக்கி ஆஸ்திரேலிய பேட்ஸ்மேன்கள் விழிபிதுங்கினர். மிட்செல் மார்ஷ் (3 ரன்), பிராட் ஹேடின் (0) வந்த வேகத்தில் நடையை கட்டினர். 10-வது ஓவரில் இருந்து 54-வது ஓவர் வரை பந்து ஒரு முறை கூட பவுண்டரிக்கு ஓடவில்லை.

    ஸ்டீவன் சுமித் (55 ரன், 175 பந்து, 3 பவுண்டரி), மிட்செல் ஜான்சன் (61 ரன்) ஓரளவு தாக்குப்பிடித்து ஆடினாலும் தோல்வியை தவிர்க்க முடியவில்லை. தேனீர் இடைவேளைக்கு பிறகு ஆஸ்திரேலிய அணி 2-வது இன்னிங்சில் 91.1 ஓவர்களில் 216 ரன்களுக்கு சுருண்டது. இதன் மூலம் 221 ரன்கள் வித்தியாசத்தில் பாகிஸ்தான் அபார வெற்றி பெற்றது. பாகிஸ்தான் தரப்பில் சுழற்பந்து வீச்சாளர்கள் 35 வயதான ஜூல்பிகர் பாபர் 5 விக்கெட்டுகளும், அறிமுக வீரர் யாசிர் ஷா 4 விக்கெட்டுகளும் சாய்த்தனர். இரண்டு இன்னிங்சிலும் சதம் விளாசிய பாகிஸ்தான் வீரர் யூனிஸ்கான் ஆட்டநாயகனாக தேர்வு செய்யப்பட்டார்.

    ரன் வித்தியாசத்தை எடுத்துக் கொண்டால், ஆஸ்ரேலியாவுக்கு எதிராக பாகிஸ்தானின் மிகப்பெரிய வெற்றி இது தான். இதற்கு முன்பு 1995-ம் ஆண்டு சிட்னியில் 74 ரன்கள் வித்தியாசத்தில் பெற்ற வெற்றியே இந்த வகையில் சிறப்பானதாக இருந்தது. 1952-ம் ஆண்டு இதே தினத்தில் தான் (அக்டோபர் 26-ந்தேதி) பாகிஸ்தான் அணி சர்வதேச அரங்கில் தனது முதலாவது டெஸ்ட் வெற்றியை பெற்றிருந்தது. அதே நாளில் இன்னொரு மெச்சத்தகுந்த வெற்றி இப்போது கிட்டியிருக்கிறது. இந்த வெற்றியின் மூலம் 2 போட்டி கொண்ட டெஸ்ட் தொடரில் பாகிஸ்தான் 1-0 என்ற கணக்கில் முன்னிலை வகிக்கிறது. 2-வது டெஸ்ட் வருகிற 30-ந்தேதி தொடங்குகிறது.

    பாகிஸ்தானுக்கு எதிரான இரு டெஸ்டிலும் வென்றால் மட்டுமே தென்ஆப்பிரிக்காவை பின்னுக்கு தள்ளிவிட்டு ஆஸ்திரேலிய அணியால் டெஸ்ட் தரவரிசையில் முதலிடத்தை பிடிக்க முடியும் என்ற சூழல் நிலவியது. இப்போது முதலாவது டெஸ்டில் தோற்றால் ஆஸ்திரேலியாவின் ‘நம்பர் ஒன்’ வாய்ப்பு நழுவி போய் விட்டது.

    ஆஸ்திரேலிய கேப்டன் மைக்கேல் கிளார்க் கூறும்போது, ‘பாகிஸ்தான் எங்களை முழுமையாக தோற்கடித்து விட்டது. திறமைக்கு ஏற்ப நாங்கள் ஆடவில்லை. அடுத்து வரும் நாட்களில் நாங்கள் கடுமையாக உழைப்போம். நிச்சயம் அடுத்த டெஸ்டில் நீங்கள் வித்தியாசமான ஆஸ்திரேலிய அணியை பார்க்கலாம்’ என்றார். 
    • Blogger Comments
    • Facebook Comments

    0 comments:

    Post a Comment

    Item Reviewed: முதலாவது டெஸ்ட் கிரிக்கெட்: பாகிஸ்தான் அணி அபார வெற்றி Rating: 5 Reviewed By: murasunews
    Scroll to Top