நாட்டின் பெரும்பாலான பாகங்களில் இரவில் அதிக மழைக்கான சாத்தியம்!

நாட்டின் பெரும்பாலான பகுதிகளில் இன்று (21) அதிகளவிலான மழைக்கு சாத்தியம் நிலவுவதாக வானிலை அவதான நிலையம் தெரிவித்துள்ளது. குறிப்பாக பெரும்பாலான பாகங்களில் இரவு வேளையில் காற்றுடன் கூடிய மழைக்கான சாத்தியமும் காணப்படலாம் எனவும் இம்மழைவீழ்ச்சியின் அளவு 100 மில்லிமீற்றரைத் தாண்டலாம் எனவும் எதிர்வு கூறப்பட்டுள்ளது.

மேல் தென் கரையோரப்பிரதேசங்களில் அதிகளவிலான மழை காலையில் பெய்யக்கூடுமெனவும் இதன் காரணமாக பொதுமக்கள் அனைவரும் பாதுகாப்பாக இருக்கும் படி வானிலை அவதான நிலையம் வேண்டுகோள் விடுத்துள்ளது.

பிரதான நகரங்களின் காலநிலை 

அநுராதபுர மாவட்டத்தில் வெப்ப நிலையானது ஆகக்கூடியது 32 செல்சியஸ் பாகையாகவும் ஆகக் குறைவான வெப்பநிலை 23 செல்சியஸ் பாகையாகவும் காணப்படுவதோடு சிறிதளவிலான மழை காணப்படும்.யாழ்ப்பாண மாவட்டத்தில் ஆகக்கூடியது 30 செல்சியஸ் பாகையாகவும் ஆகக் குறைவான வெப்பநிலை 24 செல்சியஸ் பாகையாகவும் காணப்படும் அதேவேளை யாழ்ப்பாணம், மன்னார் ஆகிய பிரதேசங்களில் மாலை அல்லது இரவில் இடியுடன் கூடிய மழை பெய்யலாம்.

மட்டக்களப்பு மாவட்டத்தில் ஆகக்கூடுதலான வெப்பநிலை 33 செல்சியஸ் பாகையாகவும் ஆகக் குறைவான வெப்பநிலை 25 செல்சியஸ் பாகையாகவும் காணப்படும் அதேவேளை மாலை அல்லது இரவு வேளையில் இடியுடன் கூடிய மழைக்கான சாத்தியம் காணப்படும். கொழும்பு மாவட்டத்தில் ஆகக்கூடுதலான வெப்பநிலை 31 செல்சியஸ் பாகையாகவும் ஆகக் குறைவான வெப்பநிலை 27 செல்சியஸ் பாகையாகவும் காணப்படுவதோடு மழைக்கான சாத்தியம் சிறிதளவில் காணப்படும். கண்டி நுவரெலியா இரத்தினபுரி கொழும்பு காலி மாவட்டங்களில் சிறிதளவிலான மழை பெய்யலாம் என எதிர்பார்க்கப்படுகின்றது.

நாட்டில் ஆகக்கூடிய வெப்பநிலையாக பொலன்னறுவை மாவட்டத்தில் 32.3 செல்சியஸ்பாகையும் குறைந்தளவு வெப்பநிலையாக நுவரெலியா மாவட்டத்தில் 13.5 செல்சியஸ் பாகையும் காணப்படுகிறது.

ஆகக்கூடியளவு மழைவீழ்ச்சி பதிவாகிய பிரதேசம்

படியத்தலாவ பிரதேசத்தில் ஆகக்கூடியளவு மழைவீழ்ச்சியாக 88.7 மி.மீற்றர் பதியப்பட்டுள்ளது

7:38 PM