கிழக்கு முதலமைச்சர் பதவியை வைத்து தமிழ் பேசும் மக்களை மோத வைக்க சதி!

இப்னு செய்யத் -
கிழக்கு மாகாண சபையின் முதலமைச்சர் பதவி தங்களுக்கு வழங்கப்பட வேண்டுமென்று தமிழ்த் தேசிய கூட்டமைப்பும், முஸ்லிம் காங்கிரஸும் விடாப்பிடியாக இருந்த நிலையில் முஸ்லிம் காங்கிரஸின் பிரதித் தலைவர் ஹாபிஸ் நசீர் அஹமட் கிழக்கு மாகாண சபையின் முதலமைச்சராக நியமிக்கப்பட்டுள்ளார்.

தமிழ்த் தேசிய கூட்டமைப்புக்கும், முஸ்லிம் காங்கிரஸிற்குமிடையே மூன்று சுற்றுப் பேச்சுக்கள் இடம்பெற்ற போதிலும், இரு கட்சிகளும் முதலமைச்சர் பதவியை விட்டுக் கொடுப்பதற்கு தயாரற்றதாகவே இருந்தன.

கிழக்கு மாகாண சபையின் முதலமைச்சராக முஸ்லிம் காங்கிரஸை சேர்ந்த ஹாபிஸ் நசீர் அஹமட் நியமிக்கப்பட்டமையை பொறுத்துக் கொள்ளாத தனியார் தொலைக்காட்சி நிறுவனமொன்று தமது தமிழ்ச் செய்தியறிக்கையில் தமிழ், முஸ்லிம் மக்களிடையே மோதல்களை ஏற்படுத்தும் வகையில் ஒரு பக்கச்சார்பான கருத்துக்களை தெரிவித்துக் கொண்டிருக்கின்றமை கண்டிக்கத்தக்கதாகும்.

குறிப்பிட்ட தொலைக்காட்சியின் செய்தியறிக்கை, தமிழர்களுக்கு உரிமையான கிழக்கு மாகாண சபையின் முதலமைச்சர் பதவியை முஸ்லிம் காங்கிரஸ் தட்டிப்பறித்துள்ளதாக கருத்துக்களை சொல்லிக் கொண்டிருக்கின்றது. கிழக்கு மாகாண சபையின் புதிய முதலமைச்சர் நியமிக்கப்பட்ட மறுநாள் தொடக்கம் இனரீதியான கருத்துக்களை முன் வைத்துக் கொண்டிருக்கும் இத்தொலைக்காட்சி, கிழக்கு மாகாணத்தில் தமிழர்களும், முஸ்லிம்களும் தங்களுக்குள் மீண்டும் மோதிக் கொள்வதற்கு திட்டமிடுவதாகவே தெரிகின்றது. இதன் மூலமாக நாட்டில் மஹிந்தராஜபக்ஷவின் ஆட்சிதான் சிறந்ததென்று காட்டுவதற்கும் முயற்சிகளை மேற்கொண்டுள்ளது.

கிழக்கு மாகாண சபையின் முதலமைச்சர் குறித்து தமிழ் மக்களிடம் மாத்திரம் கருத்துக்களை கேட்டு, செய்தியறிக்கை தயாரிக்கும் இந்நிறுவனம் தம்மை ஒரு பக்கச்சார்பற்ற ஊடகமென்று சொல்லிக் கொண்டிருப்பது எந்தவிதத்தில் நியாயம்?

மஹிந்தராஜபக்ஷவின் ஆட்சி நீடிக்க வேண்டுமென்பதற்காக ரணில்விக்கிரசிங்காவை மிகவும் மோசமான வகையில் தமது செய்தியறிக்கையில் எள்ளிநகையாடிய குறிப்பிட்ட நிறுவனம், தற்போது முஸ்லிம் முதலமைச்சர் பதவியை வைத்து இன உறவை சீரழிப்பதற்கு திட்டமிட்டுள்ளது.

இதே வேளை, கிழக்கு மாகாண சபையின் முதலமைச்சர் பதவியை இனரீதியாக நோக்கும் செய்தி குறிப்பிட்ட நிறுவனத்தின் தமிழ் செய்தியறிக்கையில் மாத்திரம்தான் தெரிவிக்கப்பட்டு வருகின்றன. அந்நிறுவனத்தின் ஆங்கில, சிங்கள செய்தியறிக்கைகளில் இந்த இனரீதியான நோக்குதல்களையும், கருத்துக்களையும் காண முடியாதுள்ளன. இதன் பின்னணியில், குறிப்பிட்ட நிறுவனத்தின் தமிழ் தொலைக்காட்சியில் பிரதி ஞாயற்றுக் கிழமை தோறும் நடைபெறும் அரசியல் விவாதத்தினை தொகுத்து வழங்கிக் கொண்டிருக்கும் பாராளுமன்ற உறுப்பினரின் சதி இருந்து கொண்டிருப்பதாகவும் தெரிவிக்கப்படுகின்றன.

தாம் தொகுத்து வழங்கும் அரசியல் விவாத நிகழ்ச்சியில் நானே கேள்வியும், பதிலும் என்ற தோரணையில் தமது சொந்த அரசியலைச் செய்து கொண்டிருக்கின்றார். முஸ்லிம் அரசியல்வாதிகள்தான் இந்நிகழ்ச்சியில் அதிகம் கலந்து கொண்டுள்ளார்கள். முஸ்லிம் அரசியல்வாதிகளை கருத்துக்களின் மூலமாக மோதச் செய்து முஸ்லிம் அரசியலை பாழாக்கிக் கொண்டிருக்கும் இவரின் சதியில் ஒரு சிலர் மாத்திரம் அடிக்கடி கலந்து கொண்டு வருகின்றார்கள். தாங்கள் தொலைக்காட்சியில் முகங்காட்ட வேண்டுமென்பதற்காக மிகப் பெரிய ஆபத்தில் முஸ்லிம் சமூகத்தை தள்ளிக் கொண்டிருக்கின்றார்கள்.

கிழக்கு மாகாண சபையின் முதலமைச்சர் பதவி தமிழருக்குரியது. அதனைப் பெற்றுக் கொள்வதற்கு தமிழ்த் தேசிய கூட்டமைப்பு தவறிவிட்டது. தமிழர்களின் அரசியல் உரிமைகளை பெற்றுக் கொள்வதற்கு தமிழ்த் தேசிய கூட்டமைப்பு பொருத்தமில்லை எனக் காட்டி தமிழ்த் தேசிய கூட்டமைப்பின் செல்வாக்கை மக்கள் மத்தியில் வெகுவாகக் குறைப்பதற்கும் கிழக்கு மாகாண சபையின் முதலமைச்சர் பதவியை வைத்து நாளாந்தம் செய்தியறிக்கை செய்து கொண்டிருக்கும் இத்தொலைக்காட்சியின் தமிழ் செய்தியறிக்கையை தமிழர்களும், முஸ்லிம்களும் புறக்கணிக்க வேண்டும்.

தமிழர்களின் உரிமைப் போராட்டத்தை காட்டிக் கொடுத்த பெருமை குறிப்பிட்ட தொலைக்காட்சியில் விவாத நிகழ்ச்சியை நடாத்திக் கொண்டிருக்கும் அந்த மக்கள் பிரதிநிதிக்கு இருக்கின்றது. அதனை வெற்றிகராமாக முடித்துக் கொண்டவர். தற்போது தமிழ் மக்களின் முதன்மைக் குரலாக உள்ள தமிழ்த் தேசிய கூட்டமைப்பின் செல்வாக்கை இல்லாமல் செய்வதற்கு முஸ்லிம் காங்கிரஸையும் வம்புக்கு இழுத்து தமிழ், முஸ்லிம் உறவுகளில் மீண்டும் கீறல்களை ஏற்படுத்த இருக்கும் இவரின் சதியை முறியடிப்பதற்கு தமிழ் பேசும் மக்கள் ஒற்றுமைப்பட வேண்டும்.

நாளாந்தம் செய்தியறிக்கை மூலமாக முஸ்லிம் காங்கிரஸையும், முஸ்லிம்களையும் இழிவுபடுத்திக் கொண்டிருக்கும் இந்நிறுவனத்தின் பொறுப்பற்ற தன்மையை தட்டிக் கேட்பதற்கு லாயக்கில்லாதவர்களாக முஸ்லிம் காங்கிரஸின் தலைவர் உட்பட அனைத்து மக்கள் பிரதிநிதிகளும் உள்ளார்கள். சமூகத்தினை இழிவுபடுத்தும் சதிக்கு எதிராக குரல் கொடுத்தால் தங்களின் வன்டவாலங்கள் வெளிப்பட்டுவிடும் என்று அஞ்சி கூனிக்குறுகி போய் உள்ளார்கள்.

முஸ்லிம்களும், தமிழர்களும் இந்நிறுவனத்தின் பக்கச்சார்பான செய்தியறிக்கை மூலமாக தமிழ், முஸ்லிம் இனங்களுக்கு இடையே பிரச்சினைகளை தோற்றுவிக்கும் ஈனச் செயற்பாட்டை கண்டித்து ஜனநாயகப் போராட்டங்களைச் மேற்கொள்ள வேண்டும்.

கிழக்கு மாகாண சபையில் 37 உறுப்பினர்கள் உள்ளார்கள். தமிழ்த் தேசிய கூட்டமைப்பு 11 உறுப்பினர்களையும், முஸ்லிம் காங்கிரஸ் 07 உறுப்பினர்களையும், ஐக்கிய தேசிய கட்சி 04 உறுப்பினர்களையும், ஐக்கிய மக்கள் சுதந்திரக் கூட்டமைப்பு 14 உறுப்பினர்களையும், தேசிய சுதந்திர முன்னணி ஒரு உறுப்பினரையும் வைத்துள்ளது. ஐக்கிய மக்கள் சுதந்திர முன்னணில் அகில இலங்கை மக்கள் காங்கிரஸின் 03 உறுப்பினர்கள் உள்ளார்கள். இவர்களை கழிக்கும் போது ஐக்கிய மக்கள் சுதந்திர முன்னணி 11 உறுப்பினர்களை கொண்டுள்ளது.

கிழக்கு மாகாண சபையில் ஒரு கட்சி ஆட்சி அமைக்க வேண்டுமாயின் ஆகக்குறைந்தது 19ஆசனங்களைப் பெற்றுக் கொள்ள வேண்டும். எந்தக்கட்சிக்கும் இந்த அறுதிப் பெரும்பான்மையில்லாத காரணத்தினால், கிழக்கு மாகாண சபையில் கூட்டாட்சிதான் சாதியமாகும். இதற்கு எந்தக் கட்சி தமது சார்பில் பெரும்பான்மையை காட்டுகின்றார்களோ அக்கட்சி ஆட்சியமைக்கும். இதன் பிரகாரம் முஸ்லிம் காங்கிரஸ் 22 உறுப்பினர்களின் சம்மதத்தினைப் பெற்று கிழக்கு மாகாண சபையின் முதலமைச்சரைப் பெற்றுள்ளது.

இதனைப் புரிந்து கொள்ளாத அந்நிறுவனம் தமிழர்களின் உரிமையை முஸ்லிம் காங்கிரஸ் பறித்துள்ளதாக காட்டிக் கொள்வது வெறுக்கத்தக்க செயலாகும். இதன் பின்னணியில் உள்ள அந்த சட்டம் படித்த மக்கள் பிரதிநிதிக்கு இந்த உண்மை தெரிந்த போதிலும், அவர் தோற்றுப் போன பெரும் பேரினவாதியின் ஏஜன்டாக கடந்த காலங்களில் செயற்பட்டதனைப் போன்று தற்போதும் செயற்பட்டுக் கொண்டிருக்கின்றார். தமிழ், முஸ்லிம் மக்களின் மதவிவகாரங்களில் அதீதமாக தலையீடுகளை செய்த முன்னைய ஆட்சியாளர்களின் திட்டமிடலுக்கு குறிப்பிட்ட தமிழ் தொலைக்காட்சியின் செய்தியறிக்கையை பயன்படுத்திக் கொண்டிருப்பதனை கண்டிப்பதற்கு தமிழ் பேசும் மக்கள் ஒன்றுபட வேண்டும்.

10:22 PM