• Latest News

    February 05, 2015

    முதலமைச்சர் விவகாரமும் மு.காவின் உட்பூசலும்

    எஸ்.றிபான் -
    கிழக்கு மாகாண சபையின் முதலமைச்சர் விடயம் மு.காவிற்கும், தமிழ்த் தேசிய கூட்டமைப்புக்குமிடையே இன்னமும் இழுபறி நிலையில் இருக்கின்ற போதிலும், மு.காவிற்கு முதலமைச்சர் பதவியை வழங்குவதற்கு ஜனாதிபதி மைத்திரிபால சிறிசேன இணக்கம் தெரிவித்துள்ளார் என மு.காவின் தலைவர் ரவூப் ஹக்கீம் தெரிவித்துக் கொண்டிருக்கின்றார். இந்தப் பின்னணியில் கட்சியின் ஆதரவாளர்களுக்கு கொஞ்சம் கிளுகிளுப்பூட்டும் வகையில் மருதமுனையில் 31.05.2005 மு.ப 10.30 மணியளவில் நடைபெற்ற கட்சியின் அம்பாரை மாவட்ட செயற்குழுக் கூட்டத்தில், இன்னும் 72 மணித்தியாலங்களுக்குள் கிழக்கு மாகாண சபையின் முதலமைச்சர் யாரென்று கட்சி அறிவிக்குமென்று மு.காவின் தலைவர் ரவூப் ஹக்கீம் உறுதியளித்தார்.

    இவ்வாறு ரவூப் ஹக்கீம் உறுதியளித்து 72 மணித்தியாலங்களைத் தாண்டி மற்றுமொரு 72 மணித்தியாலத்தை நோக்கி உறுதிமொழி சென்று கொண்டிருக்கின்றது. ஆனால், முதலமைச்சர் யாரென்று இப்பத்தி எழுதும் வரைக்கும் அவர் அறிவிக்கவில்லை.

    பதவிகள் என்று வரும்போது மு.காவிற்குள் முரண்பாடுகளும் கூடவே வரும். பதவிகளை அதிகம் நேசிப்பவர்களினால் அக்கட்சி சிறைப்பிடிக்கப்பட்டுள்ளது. இதனால், முதலமைச்சர் பதவி குறித்து மு.காவின் ஆதரவாளர்களிடையே பலதரப்பட்ட அபிப்ராயங்களும், சந்தேகங்களும் முன் வைக்கப்படுகின்றன.

    கிழக்கு மாகாண சபையின் முதலமைச்சர் யார்?
    கிழக்கு மாகாண சபையின் முதலமைச்சர் பதவி மு.காவின் சார்பில் 03 பாராளுமன்ற உறுப்பினர்களும், 03 மாகாண சபை உறுப்பினர்களும் அம்பாரை மாவட்டத்தில் மு.காவிற்கு உள்ளனர். அத்தோடு, ஒரு மாநகர சபை, 04 பிரதேச சபைகளின் அதிகாரங்களையும், அதிக பட்ச ஆதரவையும் அம்பாரை மாவட்டத்தில் மு.கா கொண்டிருப்பதனால் முதலமைச்சர் பதவி இம்மாவட்டத்திற்கே வழங்கப்பட வேண்டுமென்று இம்மாவட்;ட ஆதரவாளர்கள் ரவூப் ஹக்கீமிடம் கோரிக்கைகளை முன் வைத்துக் கொண்டிருக்கின்றார்கள். மு.காவின் மக்கள் பலம், பாராளுமன்ற பலம், கிழக்கு மாகாண சபையில் உள்ள பலம் யாவும் அம்பாரை மாவட்டம் வழங்கியதாகும்.

    முதலமைச்சர் விடயத்தில் மு.காவின் அம்பாரை மாவட்ட  ஆதரவாளர்கள் அழுத்தங்களை கொடுப்பதனைப் போன்று மட்டக்களப்பு, திருகோணமலை மாவட்ட ஆதரவாளர்கள் மு.காவிடம் கோரிக்கைகளை முன் வைக்கவில்லை.

    கிழக்கு மாகாண சபையின் முதலமைச்சர் பதவியை பெற்றுக் கொள்ள கிழக்கு மாகாண சபையின் அம்பாரை மாவட்ட உறுப்பினர்களான ஐ.எம்.எம்.மன்சூர், ஏ.எம்.ஜெமீல் ஆகியோர்கள் அதிக பிரயத்தனங்களை மேற்கொண்டுள்ளார்கள். இவர்களுக்கு நெருக்கமான மு.காவின் ஆதரவாளர்கள் முதலமைச்சர் பதவியை பெற்றுக் கொடுப்பதற்கு கயிறு திரித்துக் கொண்டிருக்கின்றார்கள். மேலும், ஏ.எல்.தவமும் முதலமைச்சர் பதவிக்கு போட்டியிட்டுக் கொண்டிருப்பதாக ஊடகங்களின் மூலமாக தெரிந்து கொள்ள முடிகின்றன.

    மு.காவின் மூத்த உறுப்பினர், கட்சி மாறாதவர், தலைமைக்கு விசுவாசமானவர், அரசியல் அனுபவமுள்ளவர் என்ற அந்தஸ்தை மன்சூர் கொண்டிருப்பதால், அவருக்குத்தான் முதலமைச்சர் பதவியை வழங்க வேண்டுமென்று ஒரு குழுவினர் கருத்துக்களை முன் வைத்துக் கொண்டிருக்கின்றார்கள்.

    மறுகுழுவினர், கிழக்கு மாகாண சபையில் தொடர்ச்சியாக இரண்டு தடவைகள் வெற்றி பெற்றவர். சாய்ந்தமருதிற்கான மேயர் பதவியை கட்சி பிடுங்கிக் கொண்டது. கல்முனையில் மு.காவின் செல்வாக்கை பாதுகாப்பதில்  அதிக பங்களிப்புச் செய்யும் பிரதேசமாகவும் சாய்ந்தமருது உள்ளதால், இவ்வூரைச் சேர்ந்த ஜெமிலுக்குத்தான் முதலமைச்சர் பதவி வழங்க வேண்டுமென்று மற்றுமொரு சாராரும் ரவூப் ஹக்கீமிடம் கேட்டுக் கொண்டிருக்கின்றார்கள்.

    இதனிடையே, எதிர்வரும் பொதுத் தேர்தலில் அம்பாரை மாவட்டத்தில் மு.காவில் போட்டியிடுவதற்கு சட்டத்தரணி எம்.முஸ்தபா, ஐ.எம்.மாஹிர், தென்கிழக்கு பல்கலைக் கழகத்தின் உபவேந்தராக உள்ள இஸ்மாயில், பைசால் காசிம், எச்.எம்.எம்.ஹரிஸ், ஏ.எம்.நசீர், ஏ.எம்.தவம், எம்.ரி.ஹஸன்அலி என்ற நீண்ட பட்டியிலில் ஐ.எம்.எம்.மன்சூரும் உள்ளார். இவற்றிக்கிடையே அம்பாரை மாவட்டத்தில்தான் ரவூப் ஹக்கீம் போட்டியிட இருப்பதாகவும் மு.காவின் வட்டாரங்கள் தெரிவித்துக் கொண்டிருக்கின்றன.

    அம்பாரை மாவட்டத்தில் ரவூப் ஹக்கீம் பொதுத் தேர்தலில் போட்டியிடுவதாயின், அவர் சம்மாந்துறைத் தொகுதியை மையப்படுத்துவார். இதனால், மன்சூருக்கு முதலமைச்சர் பதவியை வழங்கிவிட்டு, சம்மாந்துறை மக்களை திருப்திபடுத்திக் கொள்ளலாம். ஏனெனில், சம்மாந்துறைக்கு பாராளுமன்ற உறுப்பினரைப் பெற்றாக வேண்டுமென்று அங்குள்ள சமூக அமைப்புக்கள் முனைப்புடன் செயற்பட்டுக் கொண்டிருக்கின்றன. இதனால், சம்மாந்துறை பிரதேசம் தமக்கான மக்கள் பிரதிநிதியை மூன்றாவது தடவையும் இழக்க வேண்டியேற்படலாம். ரவூப் ஹக்கீம் கண்டி மாவட்டத்தில் போட்டியிட இருப்பதாகவும் தெரிவிக்கப்படுகின்றன.

    இதே வேளை, அம்பாரை மாவட்டத்தில் மு.கா செல்வாக்குப் பெற்றிருப்பதனால், மட்டக்களப்பு மாவட்டத்தினைச் சேர்ந்த ஹாபிஸ் நசீர் அஹமட்டுக்கு முதலமைச்சர் பதவியை வழங்கி, அங்கு கட்சியை பலப்படுத்த ரவூப் ஹக்கீம் திட்டமிட்டுள்ளதாகவும் தெரிவிக்கப்படுகின்றன. மட்டக்களப்பு மாவட்டத்தில் மு.காவின் செல்வாக்கில் சுமார் 25ஆயிரத்திற்கும் உட்பட்ட வாக்குகளே உள்ளன. இதனை கடந்த பொதுத் தேர்தல், மாகாண சபைத் தேர்தல்களின் மூலமாக அறிந்து கொள்ளலாம். அங்கு மத்திய அரசாங்கத்திலும், மாகாண சபையிலும் அமைச்சர் பதவிகளை வழங்கியிருந்த போதிலும், கட்சியின் செல்வாக்கை வளர்ப்பதற்கான சரியான சூத்திரங்களை மட்டக்களப்பு மாவட்டத்தில் மு.கா கையாளவில்லை.

    இந்நிலையில், ஏற்கனவே கிழக்கு மாகாண சபையில் அமைச்சர் பதவியை பெற்றுள்ள வேளையில், கட்சியின் செல்வாக்கை அதிகரித்துக் கொள்வதற்கு நடவடிக்கைகள் எடுக்காதுள்ள நசீர் அஹமட்டுக்கு முதலமைச்சர் பதவியை வழங்குவதன் ஊடாக மட்டக்களப்பு மாவட்டத்தில் மு.காவின் செல்வாக்கை அதிகரிக்க முடியாது. பதவிகளை மாத்திரம் வைத்துக் கொண்டு, கட்சியின் செல்வாக்கை அதிகரிக்க முடியாது. கொள்கைப்பற்றும், சமூகப்பற்றும் சரியாக திட்டமிடப்பட்ட வேலைகளினாலும்தான் கட்சியொன்றின் செல்வாக்கை வளர்க்க முடியும்.

    மேலும், நசீர் அஹமட் ஜனாதிபதி தேர்தலில் மு.காவின் முடிவுக்கு கட்டுப்பட்டு நடக்கவில்லை. மைத்திரிபால சிறிசேனவின் வெற்றிக்கு உழைக்கவில்லை. ஜனாதிபதித் தேர்தலில் வாக்களிக்கவில்லை. ஒரு கால கட்டத்தில் தலைமைக்கு சவால்விட்டவர். அதற்காக புதிய கட்சியறொன்றினை தோற்றுவித்து, கட்சியையும், தலைமையையும் விமர்சித்தவர் என பல குற்றச்சாட்டுக்களை மு.காவின் உயர்பீட உறுப்பினர்கள் உட்பட ஆதரவாளர்கள் பலரும் நசீர் அஹமட்டுக்கு எதிராக குற்றச்சாட்டுக்களை முன் வைத்துக் கொண்டிருக்கின்றார்கள்.

    இதே வேளை, ஏ.எல்.தவத்திற்கு முதலமைச்சர் பதவியை வழங்கி, அக்கரைப்பற்றில் மு.காவின் செல்வாக்கை அதிகரித்துக் கொள்ள திட்டமிட்டுள்ளதாகவும் தெரிவிக்கப்படுகின்றது. தவம் மு.காவிற்குள் புதிய வரவாக இருந்தாலும், ரவூப் ஹக்கீமை தனக்குள் மடக்கிப் போட்டுள்ள சாமத்தியர். பழையவர்களை விடவும், இந்தப் புதியவரை ரவூப் ஹக்கீம் அதிக நேசிக்கின்றார். இதனால், தவத்திற்கு முதலமைச்சர் பதவியை வழங்கி, அக்கரைப்பற்றில் கட்சியின் மகாநாடொன்றினை நடத்துவதற்கும், அதில் ஜனாதிபதி மைத்திரிபால சிறிசேன, முன்னாள் ஜனாதிபதி சந்திரிகா குமாரதுங்க ஆகியோர்களை கலந்து கொள்ளச் செய்வதற்கும் ரவூப் ஹக்கீம் திட்டமிட்டுள்ளார் எனவும் தெரிவிக்கப்படுகின்றன. இக்குற்றச்சாட்டுக்களுக்கு மத்தியில் நசீர் அஹமட் முதலமைச்சர் பதவியை பெற்றுக் கொள்வதற்கு எண்ணங் கொண்டுள்ளார்.

    ஜனாதிபதித் தேர்தலில் மஹிந்தராஜபக்ஷ வெற்றி பெற்றிருந்தால், நிச்சயமாக நசீர் அஹமட் முதலமைச்சராக மஹிந்தவினால் நியமிக்கப்பட்டிருப்பார். ஏனெனில், நசீர் அஹமட் மு.காவின் தலைவரை விடவும், மஹிந்தவுக்கு அதிக விசுவாசத்தைக் கொண்டவராகவே இருந்து வந்துள்ளார்.
    இவ்வாறு மு.காவின் கிழக்கு மாகாண சபை உறுப்பினர்கள் முதலமைச்சர் பதவியை பெற்றுக் கொள்வதற்கு ரவூப் ஹக்கீமின் பின்னால் அலைந்து கொண்டிருக்கின்றார்கள்.

    கிழக்கு  மாகாண சபையின் முதலமைச்சர் பதவி அம்பாரை மாவட்டத்திற்கு வெளியே வழங்கப்படுமாயின், அம்பாரையில் மு.காவின் செல்வாக்கில் பாரிய பாதிப்புக்களை ஏற்படுத்தும் என்பது குறிப்பிடத்தக்கது.

    மத்திய அரசாங்கத்தில் அமைச்சர் பதவி தங்களுக்கு கிடைக்கவில்லை என பைசால் காசிம், ஹரிஸ் ஆகியோர்கள் மனவருத்த்துடன் உள்ளார்கள். இதில், ஹரிஸ் தமது அதிர்வினை கட்சியின் தலைவருக்கு ஏற்படுத்தியுள்ளார். பைசால் காசிம் உள்ளுர புகைந்து கொண்டிருக்கின்றார். முதலமைச்சர் பதவி அம்பாரை மாவட்டத்திற்கு வெளியே வழங்கப்படும் போது, இவர்களும் இணைந்து விமர்சனங்களை முன் வைப்பார்கள். மேலும், மாகாண சபை உறுப்பினர்கள் மூவரும் இணைந்து போராட்டங்களை செய்யலாம். சில வேளை கட்சி கூட மாறலாம்.

    எதிர்வரும் பொதுத் தேர்தலில் போட்டியிடுவதற்கான சந்தர்ப்பத்தை தருகின்றேன் என மன்சூரை ரவூப் ஹக்கீம் நம்பிக்கையூட்டி, ஆறுதல்படுத்தினாலும், ஜெமீலை ஆறுதல்படுத்த முடியாது. அவர் பொதுத் தேர்தலில் போட்டியிடும் எண்ணத்தை விடவும், முதலமைச்சராக வேண்டுமென்றே அதிகம் ஆசைப்படுகின்றார். இதனால், சாய்ந்தமருது பிரதேசத்தில் மு.காவிற்கு எதிர்ப்புக்கள் ஏற்படலாம்.

    கிழக்கு மாகாண சபையின் முதலமைச்சர் விடயத்தினை ரவூப் ஹக்கீம் சரியாக கையாளாது போனால் பல பிரச்சினைகளுக்கு முகங் கொடுக்க வேண்டியேற்படும். எந்த முடிவினை எடுத்தாலும், பிரச்சினைகள் ஏற்படவும் கூடும். ஆனால், அம்பாரை மாவட்டத்தில் உள்ள ஒருவருக்கு அதிலும் கட்சியின் சிரேஸ்டத்துவம், அனுபவம், மக்கள் மத்தியல் உள்ள மதிப்பு போன்றவற்றை கருத்திற் கொண்டு, கிழக்கு மாகாண சபையின் முதலமைச்சர் பதவியை மன்சூருக்கு, அல்லது ஜெமீலுக்கு வழங்குவதே சிறந்ததாகும். இதனை ரவூப் ஹக்கீம் மொழியில் சொல்வதானால், சேதாரம் குறைந்த முடிவாக அமையும்.

    மேலும், முதலமைச்சர் விடயத்தில் அம்பாரை மாவட்ட ஆதரவாளர்கள் பெரிதும் திருப்திப்படும் வகையில் மு.காவின் முடிவுகள் அமையாது போனால், ஆதரவாளர்களில் ஒரு குழுவினர் மாற்று அணியில் இணைந்து கொள்வதற்கும் வாய்ப்புக்கள் அம்பாரை மாவட்டத்தில் உள்ளன.

    வடமாகாணம், மட்டக்களப்பு மாவட்டம் ஆகியவற்றில் தமது செல்வாக்கை ஊன்றியுள்ள அமைச்சர் றிசாட் பதியுதீன், அகில இலங்கை மக்கள் காங்கிரஸின் கால்களை அம்பாரை மாவட்டத்திலும் பதிய வைப்பதற்கு திட்டமிட்டுள்ளார். எதிர்வரும் பொதுத் தேர்தலில் தமது கட்சி அம்பாரை மாவட்டத்திலும் போட்டியிடுமென்று றிசாட் பதியுதீன் அறிவித்துள்ளார். மு.காவில் இருந்து பிரிந்து சென்று, கட்சியின் செல்வாக்கை கொழும்பு மாவட்டத்திலும், வன்னி, மட்டக்களப்பு மாவட்டத்திலும் அதிகரித்துக் கொண்டுள்ளார். றிசாட் பதியுதீன் அம்பாரை மாவட்டத்தில் இளைஞர்களை தமது கட்சியில் இணைத்துக் கொள்ளவும், மு.காவின் அதிருப்தியாளர்களை இணைத்துக் கொள்வதற்கும் மிகவும் வேகமாக செயற்பட்டுக் கொண்டிருக்கின்றார். அவர் அம்பாரை மாவட்டத்தில் மத்திய முகாம், கல்முனை, அட்டாளைச்சேனை, பொத்துவில் ஆகிய இடங்களில் மக்கள் சந்திப்புக்களை செய்துள்ளார். இம்மாவட்டத்தில் உள்ள ஏனைய இடங்களுக்கும் விஜயம் செய்ய உள்ளார்.

    அமைச்சர் றிசாட் பதியுதீன் இந்த வேகம் மு.காவில் பதவிகளை மாத்திரம் அனுபவித்துக் கொண்டிருப்பவர்களுக்கு அச்சத்தை ஏற்படுத்தியுள்ளது. ஆகவே, முதலமைச்சர் விடயத்தில் அம்பாரை மாவட்டத்தில் மு.காவின் எதிர்காலத்தைப் பற்றி சிந்திக்காது, பதவிகளுக்கு மேல் பதவிகளை உறவினர்களுக்கும், உயர்பீட உறுப்பினர்களுக்கும், புதியவர்களுக்கும் வழங்கும் நடைமுறையை ரவூப் ஹக்கீம் பின்பற்றுவாரானால், அம்பாரை மாவட்டம் மு.காவின் கைகளில் இருந்து மெதுவாக நழுவிப் போவதனை தடுக்க முடியாது.

    • Blogger Comments
    • Facebook Comments

    0 comments:

    Post a Comment

    Item Reviewed: முதலமைச்சர் விவகாரமும் மு.காவின் உட்பூசலும் Rating: 5 Reviewed By: murasunews
    Scroll to Top