மாலத்தீவு : அதிபர் தேர்தலைத் தடுத்த பொலிஸார்

மாலத்தீவில் ஒரு மாத காலத்துக்குள் இரண்டாவது தடவையாக ஜனநாயக நடவடிக்கைகளுக்கு இடையூறு ஏற்பட்டுள்ளது.

ஒரு சிறிய சுற்றுலாத்தீவுக்குள் இருக்கும் தேர்தல் ஆணையத்துக்குள் நுழைந்த பொலிஸார், நடக்கவிருந்த அதிபர் தேர்தலை தடுத்துள்ளார்கள்.

கடந்த சில வாரங்களுக்கு முன்னதாக நடந்த தேர்தலை கடந்த மாதம், வேட்பாளர் பட்டியலில் மோசடி இருப்பதாகக் கூறி உச்சநீதிமன்றம் செல்லுபடியற்றதாக அறிவித்தது. இத்தனைக்கும், அந்தத் தேர்தலை வெளிநாட்டுக் கண்காணிப்பாளர்கள் அங்கீகரித்திருந்தனர்.

அதிபர் தேர்தலுக்கான இரண்டு வேட்பாளர்கள் ''வாக்காளர் பதிவை'' அங்கீகரிக்கத் தவறிவிட்டதாகக் கூறி பொலிஸார் இப்போது இந்தத் தேர்தலை நிறுத்தியுள்ளார்கள். முன்னணியில் இருப்பவரும், முன்னாள் அதிபருமான முஹமட் நஷீட் மாத்திரமே அதனை அங்கீகரித்திருந்தார்.

தமது அலுவலகத்துக்குள் நுழைந்த பொலிஸார், தேர்தல் பணியாளர்கள் தேர்தல் சம்பந்தப்பட்ட பொருட்களை விநியோகிப்பதை தடுத்ததாக தலை தேர்தல் ஆணையரான ஃபுவாட் தௌஃபிக் கூறியுள்ளார். பொலிஸார் தமது அதிகாரத்தையும் தாண்டிச் செயற்படுவதாக தேர்தல் தலைமை ஆணையர் கோபத்துடன் கூறியுள்ளார்.

தேர்தலை நிறுத்துமாறு கண்காணிப்பாளர்கள் பொலிஸாருக்கு ஆலோசனை கூறியதாக கூறப்பட்டதை, நிராகரித்து, காமன்வெல்த் கண்காணிப்பாளர்கள் குழு ஒன்று பின்னதாக அறிக்கை ஒன்றை வெளியிட்டுள்ளது. ஜனநாயக முறைப்படி தேர்ந்தெடுக்கப்பட்ட முதலாவது அதிபராக நஷீட் அவர்கள் 2008இல் பதவிக்கு வந்தார். ஆனால் கடந்த ஆண்டில் அவர் பலவந்தமாக பதவியில் இருந்து நீக்கப்பட்டார்.

தேர்தலை இன்னுமொரு திகதியில் நடத்துவதாக தேர்தல் ஆணையம் அறிவிக்கும் என்று எதிர்பார்க்கப்படுகின்றது. ஆனால் மாலத்தீவின் ஜனநாயகம் மிகவும் பலவீனமடைந்துபோய் உள்ளது. இந்த நிகழ்வுகள் மாலத்தீவின் நட்பு நாடுகளை அதிர்ச்சிக்கு உள்ளாக்கியுள்ளது. ஜனநாயக நடைமுறைகளுக்கு அங்கு ஏற்பட்டுள்ள பின்னடைவு தமக்கு பெரும் கவலையை ஏற்படுத்தியுள்ளதாக இந்திய வெளியுறவு அமைச்சு கூறியுள்ளது. 

தேர்தல் தடுக்கப்பட்டமை, ஜனநாயகத்துக்கு ஏற்பட்ட ஒரு பெரிய அச்சுறுத்தல் என்று கொழும்பில் உள்ள அமெரிக்கத் தூதரக அதிகாரிகள் கூறியுள்ளனர்.

மிகவும் ஆத்திரம் வெளியிட்டுள்ள பிரிட்டிஷ் வெளியுறவு அமைச்சர் வில்லியம் ஹேக் அவர்கள், அங்கு ஜனநாயக நடைமுறைகள் தொடர்வதற்கு அனுமதிக்கப்பட வேண்டும் என்று கூறியுள்ளார்.

BBC-

1:01 AM