புலிகள் 30 வருடங்களில் மேற்கொண்ட அழிவுகளை ராஜபக்ச 5 வருடத்தில் மேற்கொண்டார்!- சம்பிக்க ரணவக்க

இலங்கையில் விடுதலைப் புலிகள் 30 வருட காலத்தில் மேற்கொண்ட அழிவுகளை காட்டிலும் கடந்த ஐந்து வருடங்களில் ஜனாதிபதி மஹிந்த ராஜபக்சவின் அரசாங்கம் நாட்டில் அழிவுகளை ஏற்படுத்தியுள்ளது என்று ஜாதிக ஹெல உறுமய குற்றம் சுமத்தியுள்ளது.

ஜாதிக ஹெல உறுமயவின் செயலாளரும் முன்னாள் அமைச்சருமான பாட்டலி சம்பிக்க ரணவக்க இந்தக் குற்றச்சாட்டை சுமத்தியுள்ளார்.

தனியார் தொலைக்காட்சி  அரசியல் நிகழ்ச்சி ஒன்றில் பங்கேற்றுள்ள அவர் இந்தக் குற்றச்சாட்டை சுமத்தியுள்ளார்.

இன்று சர்வதேச சந்தையில் மசகு எண்ணெயின் விலை குறைந்துள்ள நிலையில், இலங்கையில் பெற்றோல் 63 ரூபாவுக்கு விற்பனை செய்யப்பட வேண்டும். எனினும் 134 ரூபாவுக்கே இலங்கையில் பெற்றோல் தற்போது விற்பனை செய்யப்படுவதாக ரணவக்க சுட்டிக்காட்டியுள்ளார்.

இலங்கையில் ஒருகிலோ மீற்றர் பாதையை அமைக்க 717 கோடி ரூபாய் செலவிடப்படுகிறது. இலங்கையில் மக்கள் நீதிமன்றம் அமைக்கப்படவேண்டும்.

இலங்கையில் அபிவிருத்தி என்ற பெயரில் கோடிக்கணக்கான ரூபாய்கள் நாசப்படுத்தப்படுவதாக குற்றம் சுமத்தப்பட்டுள்ளது.

தனியார் தொலைக்காட்சி ஒன்றில் இன்று ஒளிபரப்பாகும் அரசியல் நிகழ்வில் இந்த விடயங்கள் வெளிக்கொணரப்பட்டன.

இந்த நிகழ்ச்சியில் பங்கேற்ற ஜாதிக ஹெல உறுமயவின் பொதுச்செயலாளர் பாட்டலி சம்பிக்க ரணவக்க, கொழும்பு நகரை அழகுப்படுத்துவதாக கூறி மேற்கொள்ளப்படும் அபிவிருத்தி நடவடிக்கைகளுக்காக நூற்றுக்கு 7 வீத வட்டி அடிப்படையில் கடன் பெறப்படுவதாக குறிப்பிட்டார்.

இந்தநிலையில் கொட்டாவ பகுதியில் மேற்கொள்ளப்படும் அதிவேக பாதையின் ஒரு கிலோமீற்றர் அமைப்புக்காக 717 கோடி ரூபாய்கள் செலவிடப்படுவதாக ரணக்க தெரிவித்துள்ளார்.

அனைவரும் குற்றம் சுமத்துவதன் அடிப்படையில் குறித்த அபிவிருத்திக்களின் போது 10வீத தரகு பெற்றுக்கொள்ளப்படுவதாக கூறப்பட்டாலும் அந்த தரகு 10வீதம் அல்லது 10ஆயிரம் வீதமாகும் என்று ரணவக்க குறிப்பிட்டுள்ளார்.

இதேவேளை, மைத்திரிபால சிறிசேன ஜனாதிபதி தேர்தலில் வெற்றிப்பெற்றதன் பின்னர், மக்கள் நீதிமன்றம் அமைக்கப்பட்டு அதில் இலங்கையின் நிதியமைச்சு, பெற்றோலிய கூட்டுத்தாபனம் உட்பட்ட பல்வேறு திணைக்களங்களில் அமைச்சுக்களில் இடம்பெற்ற ஊழல்கள் விசாரிக்கப்பட வேண்டும் என்றும் ரணவக்க கோரிக்கை விடுத்துள்ளார்.

10:49 PM