மட்டக்களப்பு மற்றும் அம்பாரை மாவட்டங்களில் தொடர்ச்சியாக பெய்துவரும் அடைமழை காரணமாக இம்மாவட்டங்களில் பல பிரதேசங்கள் நீரில் மூழ்கியுள்ளன. இதே வேளை, மட்டக்களப்பு மாவட்டத்தின் சில பகுதிகளின் போக்குவரத்துகள் துண்டிக்கப்பட்டுள்ளன.
போக்குவரத்து துண்டிப்பு
வாகரை பிரதேச செயலகத்துக்குட்பட்ட கட்டுமுறிவு மற்றும் தோணிதாண்டமடு ஆகிய பகுதிகளுக்கு செல்லும் பிரதான வீதிகளில் வெள்ள நீர் பாய்வதனால் போக்குவரத்துகள் துண்டிக்கப்பட்டுள்ளன.
இதனால் க.பொ.த.சாதாரண தர பரீட்சை நாளை நடைபெறவுள்ள நிலையில் இப்பகுதிகளில் இருந்து பல்வேறு பகுதிகளுக்கும் பரீட்சைக்கு செல்லவுள்ள மாணவர்கள் பாதிக்கப்பட்டுள்ளனர்.
இப்பிரதேசத்தில் வீதிகளில் சுமார் நான்கு அடிக்கு மேல் நீர் பாய்வதனால் மக்கள் பெரும் அசௌகரியங்களுக்குள்ளாகியுள்ளனர்.
அம்பாறை மாவட்டம் அக்கரைப்பற்றில்; கடந்த 24 மணித்தியாலத்தினுள் 169 மில்லி மீற்றர் மழை வீழ்ச்சி பதிவாகியுள்ளதாக பொத்துவில் வானிலை அவதான நிலைய உத்தியோகத்தர் தா.சதாநந்தம் தெரிவித்தார்.
இதற்கமைவாக, ஞாயிற்றுக்கிழமை காலை(7) 8.30 மணி முதல் திங்கட்கிழமை காலை 8.30 மணி வரைக்குமான 24 மணித்தியாத்துக்குள் 169 மில்லி மீற்றர் மழைவீழச்சி பதிவாகியுள்ளது.
இம் மழைவீழ்ச்சியானது, இழுக்குச்சேனையில் 72.2 மில்லி மீற்றரும் சாகாமத்தில் 64.5 மில்லிமீற்றரும் அதி கூடிய மழைவிழ்ச்சி பதிவுசெய்யப்பட்டதாகவும் குறிப்பிட்டார்.
மழைக் காரணமாக மக்களது இயல்பு நிலை முற்றாக பாதிக்கப்பட்டுள்ளதுடன் வீடுகள் வீதிகள் என்பன முற்றாக நீரில் மூழ்கியுள்ளதால் பாதிக்கப்பட்ட பிரதேசங்களிலுள்ள மக்கள் தங்களது உறவினர்களின் வீடுகளில் தஞ்சமடைந்துள்ளனர்.
அம்பாரை மாவட்டத்தில் பெய்து வரும் மழையினால் அம்பாரை – கல்முனை வீதியில் மாவடிப்பள்ளி பாலத்தினை அண்மித்த பிரதேசங்களில் வெள்ளநீரின் மட்டம் அதிகரித்துள்ளது. இதனால், இவ்வீதியுடனான போக்குவரத்து பாதிக்கப்படும் சூழல் ஏற்பட்டுக் கொண்டிருக்கின்றது.
கல்முனை – மத்திய முகாம் வீதியில் கிட்டங்கி பாலத்திலும் நீரின் மட்டம் அதிகரித்துள்ளது. இவ்வீதியின் போக்குவரத்தும் ஆபத்தை எதிர் கொண்டுள்ளது.
நிந்தவூரில் சில வீதிகள் நீரில்....
நிந்தவூர் பிரதேசத்தில் பல வீதிகள் நீரில் மூழ்கியுள்ளன. குறிப்பாக நிந்தவூர் மாவட்ட வைத்தியசாலை வீதி வெள்ளக்காடாக காட்சியளித்துக் கொண்டிருக்கின்றது.
மேலும், நிந்தவூர் தெற்கு வீதியும் வெள்ளக்காடு போல் உள்ளது. இவ்விரு வீதிகளிலும் அமைக்கப்பட்டு வந்த வீதி அமைப்பு வேலைகள் இடைநடுவே கைவிடப்பட்டுள்ளதால்தான் இவ்வீதிகளின் அவல நிலைக்கு காரணமாகும்.
0 comments:
Post a Comment