பொதுத் தேர்தலில் முன்னேற்றத்தையும் பின்னடைவையும் கண்டுள்ள முஸ்லிம் கட்சிகள்

சஹாப்தீன் -
கடந்த 17.08.2015இல் நடைபெற்ற பொதுத் தோதலில் ஐ.தே.கவின் தலைமையிலான ஐக்கிய தேசிய முன்னணி 13 போனஸ் ஆசனங்கள் உட்பட 106 ஆசனங்களை பெற்றுள்ளது. ஸ்ரீலங்கா சுதந்திரக் கட்சியினி தலைமையிலான ஐக்கிய மக்கள் சுதந்திர முன்னணி 12 போனஸ் ஆசனங்கள் உட்பட 95 ஆசனங்களைப் பெற்றுள்ளது. தமிழ்த் தேசிய கூட்டமைப்பு 02 போனஸ் ஆசனங்களுடன் 16 ஆசனங்களையும், மக்கள் விடுதலை முன்னணி (ஜே.வி.பி) 02 போனஸ் ஆசனங்களுடன் 06  ஆசனங்களையும், தமிழ்த் தேசிய கூட்டமைப்பு 02 போனஸ் ஆசனங்களுடன்  16 ஆசனங்களையும், ஸ்ரீலங்கா முஸ்லிம் காங்கிரஸ் 01 ஆசனத்தையும்  ஈ.பி.டி.பி 01 ஆசனத்தையும் பெற்றுள்ளன.

இத்தேர்தலில் 10 ஆசனங்களை கைப்பற்றும் நோக்கில் பொதுஜன பெரமுன என்ற பெயரில் வேட்பாளர்களை நிறுத்திய பொதுபல சேனவின் இனவாத கருத்துக்களை சிங்கள பௌத்த மக்கள் நிராகரித்துள்ளனர். இதே வேளை, ஐ.ம.சு.முன்னணியின் வெற்றிலைச் சின்னத்தில் போட்டியிட்ட முஸ்லிம் வேட்பாளர்களில் வன்னி மாவட்டத்தில் புதிய வேட்பாளராக போட்டியிட்ட கே.கே.மஸ்தான் என்பவரைத் தவிர ஏனையவர்கள் தோல்வியடைந்துள்ளார்கள். வெற்றிலைச் சின்னத்தில் போட்டியிடும் முஸ்லிம் வேட்பாளர்களின் வெற்றி மஹிந்தராஜபக்ஷ பிரதம மந்திரி பதவியை பெறுவதற்கு  வாயப்பை ஏற்படுத்திக் கொடுக்குமென்று முஸ்லிம்கள் எண்ணியமையும் இவர்களின் தோல்விக்கு முக்கிய காரணமாகும்.

முஸ்லிம்களின் அரசியல் பலம்

பொதுத் தேர்தல்கள் முடிவுகள் ரணில் விக்கிரமசிங்கதான் புதிய பிரதம மந்திரி என்பதனால் மஹிந்தராஜபக்ஷ பிரதம மந்திரிப் போட்டியிலும் தோல்வியை கண்டுள்ளார். புதிய பாராளுமன்றம் இலங்கையில் நீண்ட காலமாக  காணப்படும் பிச்சினைகள் பலவற்றிக்கு தீர்வுகளை காண்பதற்கு இருக்கின்றது. இதன் போது சிறுபான்மையினக் கட்சிகள் தங்கள் சமூகத்தின் பிரச்சினைகளுக்கு சரியான தீர்வுகளை பெற்றுக் கொள்வதற்கான முயற்சிகளை எடுப்பது கட்டாயமானதொரு சமூகப் பொறுப்பாகும். இந்த சமூகப் பொறுப்பை நிறைவேற்றிக் கொள்வதில் முஸ்லிம் கட்சிகளும் தலைமைகளும் கடந்த காலங்களில் தவறுகளை இழைத்து வந்துள்ளன. 

பதவிப் போட்டிகளின் காரணமாக முஸ்லிம்களுக்கு தனித்துவமாக இருந்த ஸ்ரீலங்கா முஸ்லிம் காங்கிரஸ் எனும் கட்சியை பல கூறுகளாக பிளந்து கொண்டார்கள். இதனால், முஸ்லிம் சமூகத்தின் அரசியல் பலம் ரவூப் ஹக்கீம், றிசாட் பதியுதீன், அதாவுல்லா ஆகியோர்களின் கரங்களில்; பலம் பங்கு போடப்பட்டது. இதனால் மர்ஹும் எம்.எச்.எம்.அஸ்ரப்பின் மரணத்தின் பின்னர் ஆட்சியாளர்கள் பிளவுபட்டு நிற்கும் அரசியல் தலைமைகளை தனித்தனியே கையாண்டு முஸ்லிம்களின் சமூக ரீதியான பேரம் பேசுதலை சிதைத்தனர்.  இதனால், முஸ்லிம் சமூகத்தின் அரசியல் பலம் பாராளுமன்ற உறுப்பினர்களின் அமைச்சர் பதவிகளுக்கு பேரம் பேசப்பட்டன. முஸ்லிம் சமூகத்தின் அரசியல் தலைவர்கள் பலரும் கோடிகளின் உரிமைகளைப் பெற்றுக் கொண்டார்கள். 

இதனால்தான் மஹிந்தராஜபக்ஷவின் அரசாங்கம் பௌத்த இனவாதிகள் முஸ்லிம்களுக்கு எதிராக மேற்கொண்ட  அட்டகாசங்களுக்கு எதிராக நடவடிக்கைகளை எடுக்காதிருந்து போது தகுந்த நடவடிக்கைகளை எடுக்குமாறு வலியுறுத்தவும், அரசாங்கத்தை விட்டு விலகவும் முடியாத கையறு நிலையில் முஸ்லிம் கட்சிகளும், தலைமைகளும் இருந்தன. இந்த இழிநிலை கதை இன்னும் தொடரக் கூடாது. நாடு இன்று முக்கியதொரு கட்டத்திற்கு நகர்;த்தப்படவுள்ளது. இந்நகர்வில் முஸ்லிம்களின் பிரச்சினைகளுக்கு முஸ்லிம் கட்சிகளும், தலைவர்களும், பாராளுமன்ற உறுப்பினர்களும் தீர்வுகளைப் பெற்றுக் கொடுப்பதற்கு செயற்பட வேண்டும். கடந்த காலங்களைப் போன்று அமைச்சர் பதவிகளுக்காக சமூகத்தின் பேரம் பேசும் சக்தியை பணயம் வைக்கக் கூடாது.

முஸ்லிம் கட்சிகள் இனியும் தனித்து இயங்க முடியாது. முஸ்லிம் சமூகத்தின் பிரச்சினைகளுக்கு தீர்வு காண்பதற்கு சரியான திட்டங்களை வகுத்து ஒற்றுமையுடன் ஓரணியாக செய்றபட வேண்டும். இவ்வாறு ஒற்றுமைப்படுவதற்கும் மறுக்கும் கட்சியை முஸ்லிம்கள் ஓரங்கட்டுதல் வேண்டும்.

முஸ்லிம் கட்சிகள்

பொதுத் தேர்தலில் போட்டியிட்ட முஸ்லிம் கட்சிகள் தேர்தல் முடிவுகளின் அடிப்படையில் பின்னடைவுகளையும், முன்னேற்றங்களையும் கண்டுள்ளன. கட்சிகள் பெற்றுக் கொண்டுள்ள அடைவுகளை வைத்துக் கொண்டு ஒரு கட்சிக்கு செல்வாக்கு அதிகரித்துள்ளதென்றோ அல்லது குறைவடைந்துள்ளதென்றோ முடிவுகளை எடுக்க முடியாது. முஸ்லிம் கட்சிகள் சமூகப் பொறுப்புக்களை முன் வைத்து தேர்தலில் வாக்குகளை கேட்கவில்லை. அபிவிருத்தி அரசியலை முன்னிலைப்படுத்தியே வாக்குகளைப் பெற்றுக் கொண்டன. இதனால், முஸ்லிம் கட்சிகள் பெற்றுக் கொண்டுள்ள வாக்குகளை கொள்கைகளுக்கு கிடைத்தவை என்று நிறுவ முடியாது. ஆதலால், முஸ்லிம் கட்சிகள் தங்களை கொள்கையின் அடிப்படையில் நிலை நிறுத்த வேண்டும். முஸ்லிம் காங்கிரஸ அஸ்ரப்பின் காலத்தில் கொள்கை அடிப்படையில் நிறுப்பட்டதனால்தான் அக்கட்சி இன்று வரைக்கும் தாக்குப் பிடித்துக் கொண்டிருக்கின்றன. ஆயினும், அக்கட்சியும் கொள்கைகளிலிருந்து விலகிச் சென்று கொண்டிருக்கின்றன. இதனை அக்கட்சி விரைவாக சரி செய்யாது போனால், அதன் செல்வாக்கு திசை மாறிச் செல்லுமென்ற செய்தியை அம்பாரை மாவட்டத்தில் அக்கட்சி பெற்றுள்ளது.

ஸ்ரீலங்கா முஸ்லிம் காங்கிரஸ்

மு.கா கடந்த பொதுத் தேர்தலில் 02 தேசிய பட்டியல் உறுப்பினர்கள் அடங்களாக 08 பாராளுமன்ற உறுப்பினர்களைக் கொண்டிருந்தது. ஆனால், இம்முறை 02 தேசிய பட்டியல் உறுப்பினர்கள்; உட்பட 07 பாராளுமன்ற உறுப்பினர்களையே அக்கட்சி பெற்றுள்ளது. மு.கா ஒரு ஆசனத்தை இழந்து பின்னடைவினைக் கண்டுள்ளது. திருகோணமலை, வவுனியா மாவட்டங்களில் கடந்த பொதுத் தேர்தலில் பாராளுமன்ற உறுப்பினர்களைப் பெற்றுக் கொண்ட மு.காவினால் இம்முறை பெற்றுக் கொள்ள முடியவில்லை.

இதே வேளை, 2010ஆம் ஆண்டு நடைபெற்ற பொதுத் தேர்தலில் மு.கா அம்பாரை மாவட்டத்தில் 02 பாராளுமன்ற உறுப்பினர்களைப் பெற்றுக் கொண்டது. இம்முறை யானைச் சின்னத்தில் போட்டியிட்ட அக்கட்சியின் 03 வேட்பாளர்களும் வெற்றி பெற்றுள்ளார்கள். அம்பாரை மாவட்டத்தில் மு.காவிற்கு 03 ஆசனங்கள் கிடைத்துள்ளமைக்கு கட்சியின் தலைவர் ரவூப் ஹக்கீம் எடுத்துக் கொண்ட பெரு முயற்சியின் வெற்றி என்றே கூறுதல் வேண்டும். 

மு.காவின் ஆதரவாளர்கள் மு.காவில் நிறுத்தப்பட்டுள்ள  வேட்பாளர்களின் நடவடிக்கைகள், கட்சியின் செயற்பாடுகள், மரச்சின்னத்தினை கைவிட்டு யானைச் சின்னத்தில் போட்டியிட்டமை போன்ற காரணங்களினால் வெறுப்படைந்தவர்களாகவும், ஒரு சிலர் அகில இலங்கை மக்கள் காங்கிரஸ் போன்ற மாற்றுக் கட்சிகளில் இணைந்து செயற்படுவதற்கும், இன்னும் சிலர் மு.காவின் தேர்தல் நடவடிக்கைகளில் ஈடுபடாது மௌனமாக இருப்பதற்கும் முடிவுகளை செய்திருந்தார்கள். இதனால், மு.காவினால் ஒரு ஆசனத்தைத்தான் பெற்றுக் கொள்ள முடியுமென்ற நம்பப்பட்டது. 

ஆனால், ரவூப் ஹக்கீம் கட்சியோடு முரண்பட்டும், வேட்பாளர்களுடன் முரண்பட்டும் நிற்பவர்களை தனிப்பட்ட வகையில் சந்தித்து கட்சிக்கான ஆதரவினை திரட்டுவதற்காக ஈடுபடுமாறு கேட்டுக் கொண்டார். இந்த முயற்சி மு.கா அம்பாரை மாவட்டத்தில் 03 ஆசனங்களை பெற்றுக் கொள்ள உதவியுள்ளது. மேலும், அம்பாரை தொகுதியில் ஐ.தே.க தோல்வியடைந்து ( சுமார் 49 அயிரத்திற்கும் மேற்பட்ட வாக்குகள்) கொண்டமையும் மு.காவினர் 03 பேரும் வெற்றி பெறுவதற்கு காரணமாகும்.

மேலும், அம்பாரை மாவட்ட முஸ்லிம் வாக்காளர்கள் கடந்த பொதுத் தேர்தலுடன் ஒப்பிடுகையில் வெற்றிலைச் சின்னத்திற்கு வாக்களிப்பதனை வெகுவாகக் தவிர்த்துள்ளார்கள். மஹிந்தராஜபக்ஷவின் மீதான வெறுப்புத்தான் இதற்குரிய மூலகாரணமாகும்.

மு.கா திருகோணமலை, வவுனியா மாவட்டங்களில் பாராளுமன்ற உறுப்பினர்களை இழந்திருப்பதனை அக்கட்சி இலகுவாக தட்டிக் கழித்துவிட முடியாது. இவ்விரு மாவட்டங்களிலும் மு.கா தொடர்ச்சியாக ஆசனங்களைப் பெற்று வந்துள்ளன. இந்நிலையில் இம்மாவட்டங்களில் மாற்றுக் கட்சியில் போட்டியிட்ட முஸ்லிம் வேட்பாளர்கள் தலா இரண்டு பேர் வெற்றி பெற்றுள்ளார்கள். இதனால், இம்மாவட்டங்களில் உள்ள மு.காவின் ஆதரவாளர்கள் ஆனாதரவாக விடப்பட்டுள்ளார்கள். மு.கா இம்மாவட்டங்களுக்கு தேசிய பட்டியல் மூலமாக பாராளுமன்ற உறுப்பினர்களை வழங்க வேண்டும். இல்லையாயின் அடுத்து பொதுத் தேர்தல் வரைக்குமாக உள்ள 05 வருடங்களில் மு.காவின் ஆதரவளர்கள் எந்தத் திசையில் செல்லுவார்கள் என்று சொல்ல முடியாது. ஏனெனில் மு.காவின் இன்றைய சூழலில் ஆதரவாளர்கள் கொள்கையின் அடிப்படையில் கட்டுப்பாட்டுடன் இணைந்துள்ளார்கள் என்று சொல்ல முடியாது. கட்சியின் அரசியல் அதிகாரத்தையும், பதவி வழி அதிகாரத்தையும் ஒரு சிலரே வைத்துள்ளார்கள். இவர்கள் தங்களுக்கு ஏற்ற வகையில் ஆதரவாளர்களை வளர்த்துள்ளார்கள். இந்த தாக்கம் இவ்விரு மாவட்டங்களிலும் ஏற்படவே செய்யும். இத்தகைய இக்கட்டான சூழலிலும் கட்சியின் ஆதரவாளர்கள் கட்சியுடன் இருக்க வேண்டுமாக இருந்தால் அரசியல் அதிகாரத்தை கொண்டவர்கள் வேறாகவும், கட்சியின் பதவிகளைக் கொண்டவர்கள் வேறாகவும் இருக்க வேண்டும். கட்சியை கொள்கை அடிப்படையில் கட்டமைக்க வேண்டும்.

இதே வேளை, மு.காவிற்கு போட்டியாக வளர்ந்து கொண்டு வரும் அகில இலங்கை மக்கள் காங்கிரஸ் அம்பாரை மாவட்டத்தில் தனித்துப் போட்டியிட்டு சுமார் 33 ஆயிரத்திற்கும் மேற்பட்ட வாக்குகளைப் பெற்றுள்ளது. அக்கட்சி ஆசனத்தைப் பெற்றுக் கொள்ளாது போனாலும் அம்பாரை மாவட்டத்தில் கட்சியின் நடவடிக்கைகளை முன்னெடுத்துச் செல்லுவதற்குரிய ஒரு அடித்தளத்தை போட்டுள்ளது. அகில இலங்கை மக்கள் காங்கிரஸ் பெற்றுள்ள வாக்குகளை மு.கா அலட்சியத்தோடு நோக்குமாயின் அல்லது இறுதியில் ஆதரவாளர்கள் நம்மோடுதான் வந்து சேர்வார்கள் என்று பிழையாக கூட்டல் கழித்தல் செய்யுமாயின் அம்பாரை மாவட்டத்தில் அகில இலங்கை மக்கள் காங்கிரஸ் இன்னும் வளர்ந்து செல்லுமென்பதே எமது கணிப்பாகும். 

அகில இலங்கை மக்கள் காங்கிரஸ்

அகில இலங்கை மக்கள் காங்கிரஸ் முஸ்லிம் சமூகத்திற்காக கொள்கை அடிப்படையில் கட்டி எழுப்பப்பட்ட கட்சி என்று முத்திரை குத்த முடியாது. முஸ்லிம் சமூகத்தின் மீது அரசாங்கமும், பௌத்த இனவாதிகளும் மேற்கொண்ட பல நடவடிக்கைகளின் போது இக்கடசி மௌனித்துக் கொண்டே பயணித்துள்ளது. மு.காவிற்கு எதிராக தோற்றுவிக்கப்;பட்டதொரு கட்சி  என்றே இதனைப் பார்க்க வேண்டும்.

அகில இலங்கை மக்கள் காங்கிரஸ் கடந்த பாராளுமன்றத்தில் 04 பாராளுமன்ற உறுப்பினர்களைக் (வவுனியா 02, மட்டக்களப்பு 02) கொண்டிருந்தது. இம்முறை அக்கட்சி 04 உறுப்பினர்களை கொண்டுள்ளது. ஒரு தேசிய பட்டியல் உறுப்பினரையும் பெற்று 05 உறுப்பினர்களைக் கொண்டுள்ளது. வவுனியாவில் ஒரு உறுப்பினரையே பெற்றுள்ளது. இதே வேளை திருகோணமலை, அநுராதபுரம் ஆகிய மாவட்டங்களில் உறுப்பினர்களை பெற்றிருப்பது குறிப்பிடத்தக்கது. ஆகவே, இக்கட்சிக்கு இறங்கு முகம் என்று சொல்லுவதனை விடவும் ஏறுமுகம் என்றே சொல்லலாம்.

மு.காவில் காணப்படும் கருத்து முரண்பாடுகள், உள்ளுர் அரசியல்வாதிகளிடம் காணப்படும் ஒற்றுமையின்மை, ஆளுக்காள் குழிபறிப்பதில் காணப்படும் போட்டி, சமூகப் பிரச்சினைகளில் அதிக சிரத்தை காட்டாதிருத்தமை, கட்சியின் முக்கிய பதவிகளில் உள்ளவர்கள் தங்களுக்கு ஏற்ற வகையில் கட்சியின் தீர்மானங்களை எடுத்து செயற்படும் சுயநலம் போன்ற மு.காவின் பலவீனங்கள் அகில இலங்கை மக்கள் காங்கிரஸின் வளர்ச்சிக்கு வழி அமைத்துள்ளதென்பதே உண்மையாகும். மு.கா தம்மை மீண்டும் கொள்கை அடிப்படையில் கட்டமைத்துக் கொள்ளும் வரை அகில இலங்கை மக்கள் காங்கிரஸின் வளர்ச்சியை தடுக்க முடியாது. 

அம்பாரை மாவட்டத்தில் அம்பாரைத் தொகுதியில் ஐ.தே.க சுமார் 49 ஆயிரத்திற்கும் மேற்பட்ட வாக்குகளைப் பெற்று தோல்வியடைந்துள்ளது. அதே வேளை, அக்கட்சியில் போட்டியிட்ட தயாகமகே 71 ஆயிரத்திற்கும் மேற்பட்ட வாக்குகளைப் பெற்றுள்ளார். இதே வேளை மு.காவில் போட்டியிட்ட பைசால் காசிம் சுமார் 61ஆயிரத்திற்கும் அதிகமான விருப்பு வாக்குகளை பெற்றுள்ளார். தயாகமகே அம்பாரைத் தொகுதிக்கு வெளியே சுமார் 20 ஆயிரத்திற்கும் மேற்பட்ட வாக்குகளை பொத்துவில், கல்முனை, சம்மாந்துறை தொகுதிகளில் பெற்றுள்ளார். ஆகவே, முஸ்லிம் பிரதேசங்களில் தேசிய கட்சிகளின் ஆதிக்கம் ஏற்படுவதற்குரிய அடித்தளம் மீண்டும் இடப்பட்டுள்ளது. இதனை முறியடிப்பதற்கு முஸ்லிம் கட்சிகளிடம் மாற்றுத் திட்டங்கள் அவசியமாகும். 

தோல்வியடைந்த முன்னாள பாராளுமன்ற உறுப்பினர்கள்

கடந்த பாராளுமன்றத்தில் உறுப்பினர்களாக இருந்த முஸ்லிம் அரசியல்வாதிகள் இத்தேர்தலில் தோல்வியடைந்துள்ளார்கள். இவர்களில் அதிகமானவர்கள் ஐக்கிய மக்கள் சுதந்தி முன்னணியில் வெற்றிலைச் சின்னத்தில் போட்டியிட்டவர்கள் என்பது குறிப்பிடத்தக்கது. அந்த வகையில் தேசிய காங்கிரஸின் தலைவர் ஏ.எல்.எம்.அதாவுல்லா, எம்.எல்.ஏ.எம்.ஹிஸ்புல்லா(ஐ.ம.சு,மு), எம்.எஸ்.தௌபீக் (மு.கா), முத்தலிபா பாறூக் (மு.கா), ஹுனைஸ் பாறூக் (ஐ.ம.சு.மு), அப்துல் காதர் (ஐ.ம.சு.மு) ஆகியோர்கள் தோல்வியடைந்துள்ளார்கள். 

இவர்களின் தோல்விக்கு பல காரணங்கள் உள்ளன. குறிப்பாக அபிவிருத்தி அரசியலை வெற்றிகரமாக முன்னெடுத்தவர்களான அதாவுல்லா, ஹிஸ்புல்லா ஆகியோர்கள் தோல்வியடைந்துள்ளமை, தங்களின் வெற்றிக்கு தமது ஊர் மக்களின் ஆதரவு சுமார் 80 வீதத்திற்கு அதிகமாக இருந்தால் போதுமென்ற எண்ணமாகும். இதனால்தான் இவர்கள் தங்கள் பிரதேசத்தில் பாரிய அபிவிருத்திகளையும், மற்ற இடங்களில் சுமாரான அபிவிருத்திகளையும் மேற்கொண்டார்கள். இவர்கள் தங்களின் ஆதரவாளர்களை கொள்ளை அடிப்படையில் வைத்துக் கொள்ளாமையினாலும், முஸ்லிம் சமூகம் கடந்த அரசாங்கத்தில் வெகுவாக பாதிக்கப்பட்ட போது அது குறித்து எதுவும் பேசாதிருந்தமையும் இவர்களின் தோல்விக்கு காரணமாகும். 'உன்னோடுதான் ஊர்' என்ற வாசகங்களும் இவர்களின் தோல்விக்கு காரணமாகும். இவர்களை தனியே ஒரு ஊருக்கு மாத்திரம் உரித்தானவர்கள் என்று காட்டிக் கொண்டமையால் ஏனைய பிரதேச மக்கள் தங்களுக்கு அந்நியமானவர்களாவே இவ்விருவர்களையும் பார்த்தார்கள். இவ்விருவரும் கடந்த பொதுத் தேர்தல்களில் பெற்று வந்த வாக்குகள் ஒவ்வொரு தேர்தலிலும் குறைவடைந்து கொண்டு வந்துள்ளன. இதனைக் கூட கணித்து ஏன்? எதற்கு? இந்த மாற்றம?; என்று கண்டு தேவையான நடவடிக்கைகளை எடுத்திருந்தால் இவர்கள் தோல்வியிலிருந்து விடுபட்டிருக்கலாம்.

புதிய பாராளுமன்றம்

எது எப்படியாக இருந்தாலும் புதிய பாராளுமன்றத்தில் முஸ்லிம் பிரதிநிதிகளின் எண்ணிக்கை அதிகரிக்கப்பட வேண்டுமென்ற கோரிக்கை தோல்வியடைந்துள்ளது. தற்போது தெரிவு செய்யப்பட்டுள்ளவர்கள் முஸ்லிம் சமூகத்தின் பிரச்சினைகளுக்கு தீர்வுகளை காண வேண்டும். அதற்காக உழைக்குமாறு முஸ்லிம் சமூகத்தின் சார்பாக கேட்டுக் கொள்கின்றேன்.

நன்றி : வீரகேசரி வாரவெளியீடு

10:39 PM