பாராளுமன்றப் பொதுத் தேர்தல் முடிவடைந்துள்ள போதிலும், தேர்தலுடன் தொடர்புடைய காய்ச்சல்கள் இன்னும் தீரவில்லை. தனித்து ஆட்சியமைப்பதற்குரிய தனிப் பெரும்பான்மையை எந்தவொரு கட்சியும் பெற்றுக் கொள்ளவில்லை. இதனிடையே தேசிய அரசாங்கமொன்றை அமைத்துக் கொள்வதற்குரிய முயற்சிகளும் நடைபெற்றுக் கொண்டிருக்கின்றன. தேசிய அரசாங்கத்தில் இரண்டு பிரதான கட்சிகளிடையே அமைச்சர் பதவிகளை பங்கீடு செய்து கொள்வதில் பலத்த இழுபறிகள் காணப்படுகின்றன. இதனால், தேசிய அரசாங்கம் அமைக்கப்பட்டால் கூட அந்த அரசாங்கம் எத்தனை வருடங்களுக்கு நிலைத்திருக்கும் என்ற சந்தேகங்களும் முன் வைக்கப்படுகின்றன. இவை எல்லாவற்றிக்கும் மேலாக அமெரிக்கா புதிய அரசாங்கத்தின் காலத்தில் இலங்கையில் தமது காலை ஊன்றிப் பதித்துக் கொள்வதற்குரிய நடவடிக்கைகளை எடுத்துக் கொண்டிருக்கின்றது.
இந்த சங்கிலித் தொடர்பில் இலங்கையின் தேசிய பிரச்சினைக்கு தீர்வுகளை முன் வைக்க வேண்டிய கட்டமும் ஏற்பட்டுள்ளது. தமிழர்களின் பிரச்சினைகளுக்கு எதிர்ப்பு அரசியல் மூலமாக தீர்வுகளை பெற்றுக் கொள்ள முடியாது. ஆதலால், இணக்க அரசியலூடாக தீர்வுகளைப் பெற்றக் கொள்வதற்கான புதியதொரு பாதையை தமிழ்த் தேசிய கூட்டமைப்பு தேர்ந்தெடுத்துக் கொள்வதற்கு சிந்திக்கின்றது. இந்தப் பின்னணியில் முஸ்லிம் கட்சிகள் தமது சமூகத்தின் பிரச்சினைகளுக்கு எவ்வாறு தீர்வுகளை காண்பதற்கு சிந்திக்கின்றது என்று பார்க்க வேண்டியுள்ளது.
முஸ்லிம் கட்சிகள்
ஓவ்வொரு பொதுத் தேர்தல் முடிந்தவுடனும் முஸ்லிம் கட்சிகள் எவ்வாறு நடந்து கொள்ளுமோ அதனையே கடந்த 17.08.2015இல் நடைபெற்ற தேர்தலின் பின்னரும் முஸ்லிம் கட்சிகள் மேற்கொண்டிருக்கின்றன. நாட்டில் ஏற்படவுள்ள அரசியல் மாற்றத்திற்கு அமைவாக முஸ்லிம் கட்சிகள் தங்களை மாற்றிக் கொள்ளுமா என்பதில் பலத்த சந்தேகங்களே காணப்படுகின்றன. இதனால், இலங்கையின் தேசிய பிரச்சினைக்கு தீர்வுகளை முன் வைக்கும் போது முஸ்லிம் சமூகம் தமக்குரிய திர்வுகளை பெற்றுக் கொள்ளுமா என்ற வினாவை கேட்க வேண்டியுள்ளது.
பொதுத் தேர்தலின் போது முஸ்லிம் கட்சிகளும், முஸ்லிம் வேட்பாளர்கள் யாரும் முஸ்லிம் சமூகத்தின் பிரச்சினைகளுக்கு தாங்கள் இத்தகைய தீர்வு யோசனைகளை வைத்துள்ளோம் என்று தெரிவிக்கவில்லை. அபிவிருத்தித் திட்டங்களையே முன் வைத்தார்கள். அத்தோடு, தனிப்பிரதேச சபை, தேசிய பட்டியல் பாராளுமன்ற உறுப்பினர் பதவி போன்றவைகளையே முன் வைத்தார்கள். முஸ்லிம் சமூகத்தின் நிலைபேற்றிக்குரிய திட்டங்களை முஸ்லிம் கட்சிகளும் முன் வைக்கவில்லை. அத்தகையதொரு திட்டத்தின் அவசியத்தினை முஸ்லிம் சமூகத்தில் உள்ள புத்திஜீவிகளும் வலியுறுத்தவில்லை. முஸ்லிம் சமூகமும் எதிர்பார்க்கவில்லை. ஆதலால், முஸ்லிம் சமூகம் தங்களை அரசியல் அடிப்படையில் சீர்திருத்திக் கொள்ள திட்டங்களை வகுத்துக் கொள்ள வேண்டும். இல்லையாயின் முஸ்லிம் சமூகத்தின் அரசியல் பலம் மேலும் சிதைக்கப்பட்டு, மாற்று சமூகத்தின் அரசியல் பலத்தில் சலுகைகளுக்காக தலைகுனிந்து நிற்க வேண்டியேற்படும்.
இணக்க அரசியல்
இலங்கை சுதந்திரம் பெற்ற காலம் முதல் முஸ்லிம்கள் இணக்க அரசியலையே மேற்கொண்டு வந்துள்ளார்கள். இதனால், முஸ்லிம் பிரதேசங்கள் அபிவிருத்திகளைப் பெற்றுக் கொண்டன. அதே வேளை, முஸ்லிம் சமூகத்தின் அடிப்படை உரிமைகள் இணக்க அரசியலுக்காக தாரைவார்க்கப்பட்டன. இணக்க அரசியல் முஸ்லிம் சமூகத்தின் அடிப்படை உரிமைகளுக்கு பலத்த தடைகளை ஏற்படுத்திக் கொண்டிருப்பதனை சுட்டிக்காட்டி ஸ்ரீலங்கா முஸ்லிம் காங்கிரஸ் உருவாக்கப்பட்டது. இக்கட்சி இணக்க அரசியலுக்கு பதிலாக உரிமை அரசியலை பேசியது. ஆயினும், 1994ஆம் ஆண்டு சந்திரிகாவின் அரசாங்கத்தில் மு.கா இணக்க அரசியலை மேற்கொண்டது. ஆனால், அந்த இணக்க அரசியல் கடந்த காலத்தைப் போலல்லாது, முஸ்லிம் சமூகத்தின் உரிமைகளுடன் இணைந்ததாக இருந்தது. வரலாறு காணாத அளவிற்கு முஸ்லிம் பிரதேசங்கள் அபிவிருத்திகளை கண்டன. முஸ்லிம் இளைஞர்களுக்கு தொழில் வாய்ப்புக்கள் வழங்கப்பட்டன. முஸ்லிம்களின் பறிபோன காணிகளை பெற்றுக் கொள்வதற்குரிய முயற்சிகளும் எடுக்கபட்டன. இந்நிலையில் அஸ்ரப்பின் மரணம் முஸ்லிம் சமூகத்தின் உரிமையுடன் கூடிய அரசியல் போக்கில் மாற்றங்களை ஏற்படுத்தின. மு.கா பல கூறுகளாக்கப்பட்டன.
முஸ்லிம் சமூகத்தின் அரசியல் பலம் பேரினவாதிகளின் தேவைக்கேற்ப சிதைக்கப்பட்டதனை தொடர்ந்து முஸ்லிம் கட்சிகள் யாவும் இணக்க அரசியலேயே மேற்கொண்டன. இந்த இணக்க அரசியலானது முஸ்லிம் சமூகத்தின் அடிப்படைத் தேவைகளை முன் நிறுத்தியதாக இருக்கவில்லை. அமைச்சர் பதவிகள், திணைக்களத் தலைவர் பதவிகள், கொந்தராத்துக்கள், சொகுசு வாழ்க்கை போன்றவைகளை பெற்றுக் கொள்வதற்காகவே மேற்கொள்ளப்பட்டன. இதனால், முஸ்லிம் அரசியல்வாதிகளும், அவர்களின் பின்னால் வால்பிடித்துக் கொண்டவர்களும் பெரும் பணக்காரர்களாக உருப் பெருத்துக் கொண்டார்கள்.
இப்போது தமிழ்த் தேசிய கூட்டமைப்பும் இணக்க அரசியலைப் பற்றி சிந்திக்கின்றது. ஆனால், இக்கட்சியின் இணக்க அரசியல் என்பது முஸ்லிம் கட்சிகளின் இணக்க அரசியலைப் போன்றதாக இருக்காது என்று இப்போதைக்கு தெரிகின்றது. எதிர்காலத்தில் எந்த திசைக்கு செல்லுமென்று எதிர்வு கூற முடியாது. ஆயினும், தமிழ்த் தேசிய கூட்டமைப்பு எதிர்ப்பு அரசியலை மேற்கொண்டு தமிழர்களின் அடிப்படை பிரச்சினைகளுக்கு தீர்வு காண முடியாது. ஆட்சி மாற்றத்தின் பின்னர் மேற்குலக நாடுகளின் போக்கிலும் பாரிய மாற்றங்கள் ஏற்படும்.
இலங்கை அரசாங்கத்திற்கு எதிராக ஐ.நாவின் மனித உரிமைப் பேரவையில் அமெரிக்கா முன் வைத்த குற்றச்சாட்டுக்கள் கூட இலங்கை அரசாங்கத்திற்கு சாதமாக மாறும். அமெரிக்கா போன்ற நாடுகள் இலங்கையில் ஆட்சி மாற்றம் ஏற்படவும், தமது வல்லரசு ஆதிக்கத்தை இலங்கையில் வைத்துக் கொள்ளவும் தமிழர்களின் பிரச்சினைகளை பயன்படுத்திக் கொண்டார்கள் என்பதும் குறிப்பிடத்தக்கது. இவற்றைக் கருத்திற் கொண்டே தமிழ்த் தேசிய கூட்டமைப்பு உரிமையுடன் இணைந்த இணக்க அரசியலை மேற்கொள்வதற்கு சிந்திக்கின்றது. ஆனால், முஸ்லிம் கட்சிகளைப் போன்று அமைச்சர் பதவிகளைப் பெற்று அரசாங்கத்திற்குள் முகவரியை தொலைத்துக் கொள்ளாது. அரசாங்கத்தின் நல்ல செயற்திட்டங்களுக்கு மாத்திரம் ஆதரவு வழங்குவதற்கே அக்கட்சி சிந்திக்கின்றது. இதன் மூலமாக பேரம் பேசுவதற்கும் எண்ணுகின்றது. பொதுத் தேர்தல் முடிவுகள் தமிழ்த் தேசிய கூட்டமைப்பின் ஆதரவு அரசாங்கத்திற்கு அவசியமாக்கியுள்ளது.
ஆகவே, தமிழ்த் தேசிய கூட்டமைப்பு உரிமையுடன் இணக்க அரசியலை மேற்கொள்வதற்கு சிந்திக்கும் சூழலில் முஸ்லிம் கட்சிகள் வழக்கம் போன்று அமைச்சர் பதவிகளுக்காக இணக்க அரசியலை மேற்கொள்வதற்கே முண்டியடித்துக் கொண்டிருக்கின்றன. எதிர்வரும் காலம் இலங்கையின் தேசிய பிரச்சினைக்கு தீர்வுகள் முன் வைக்கப்படவுள்ளன. ஆதலால், முஸ்லிம் கட்சிகள் அமைச்சர் பதவிகளுக்கான இணக்க அரசியலிருந்து விடுபட்டு அஸ்ரப்பின் காலத்தைப் போன்று உரிமையுடன் இணைந்த இணக்க அரசியலுக்கு செல்ல வேண்டும். முஸ்லிம்களின் அரசியல்பலம் ஒரு குடையின் கீழ் கொண்டு வரப்பட வேண்டும். முஸ்லிம் சமூகத்தின் எதிர்காலம், அரசியல் பலம், உரிமை போன்ற விடயங்களில் முஸ்லிம் கட்சிகள் அக்கரை கொள்ளாது பதவிகளுக்காக போட்டி போட்டுக் கொண்டிருக்கின்றார்கள். பதவியாசை கொண்ட பிசாசுகளாகவே முஸ்லிம் அரசியல்வாதிகள் உள்ளார்கள். இந்தப் பிசாசுகளின் எண்ணிக்கை அதிகமாக இருப்பதனால் முஸ்லிம் சமூகத்தின் அடிப்படைப் பிரச்சினைகளுக்கு தீர்வுகளைப் பெற்றுக் கொள்ள முடியுமா என்பதும் சந்தேகமாகும்.
இதே வேளை, தேசிய பிரச்சினைக்கான தீர்வுகள் முன் வைக்கப்படும் போது முஸ்லிம் சமூகத்தின் பிரச்சினைக்குரிய தீர்வுகளைப் பெற்றுக் கொள்வதற்கு மு.கா முன் நிற்க வேண்டும். இதற்கு ரவூப் ஹக்கீமுக்கு மு.காவின் பாராளுமன்ற உறுப்பினர்கள் ஒத்துழைக்க வேண்டும். அமைச்சர் பதவிகளுக்காக அவருக்கு நெருக்கடிகளை ஏற்படுத்தாது, வேறு தேவைகளுக்காக செயற்படாது முஸ்லிம் சமூகத்திற்குரிய தீர்வுகளைப் பெறுவதற்கு தலைவருக்கு ஒத்துழைக்க வேண்டும். கடந்த காலங்களைப் போன்று தங்களின் தவறுகளை மறைப்பதற்கு தலைவர் ரவூப் ஹக்கீமின் மீது பலியைப் போடக் கூடாது. புதவிகள் முஸ்லிம் சமூகத்தின் எதிர்காலமல்ல என்பதனை சிந்திக்க வேண்டும்.
தேசியப்பட்டியல் பாராளுமன்ற உறுப்பினர்
பொதுத் தேர்தல் முடிவடைந்ததும் எல்லா அரசியல் கட்சிகளுக்குள்ளும் தேசிய பட்டியல் பாராளுமன்ற உறுப்பினரை தேர்வு செய்து கொள்வதில் ஏற்பட்ட சிக்கல்கள் முஸ்லிம் கட்சிகளுக்குள்ளும் ஏற்பட்டுள்ளன. அகில இலங்கை மக்கள் காங்கிரஸ் தமது தேசிய பட்டியல் பாராளுமன்ற உறுப்பினராக புத்தளத்தை சேர்ந்த எம்.எச்.எம்.நபவியை தேர்வு செய்து கொண்டது. இதனால், அகில இலங்கை மக்கள் காங்கிரஸ் தலைவர் றிசாட் பதியுதீனுக்கும், அக்கட்சியின் செயலாளர் வை.எல்.எஸ்.ஹமீத்திற்குமிடையே முரண்பாடுகள் ஏற்பட்டன. றிசாட் பதியுதீன் வை.எல்.எஸ்.ஹமீத்தை செயலாளர் பதவியிலிருந்து இடைநிறுத்தி வைத்துள்ளார். அம்பாரை மாவட்டத்தில் அகில இலங்கை மக்கள் காங்கிரஸிற்கு பொதுத் தேர்தலில் சுமார் 33 ஆயிரத்திற்கும் மேற்பட்ட வாக்குகள் அளிக்கப்பட்டன. முதற் தடவையாக போட்டியிட்டு பெற்றுக் கொண்ட இத்தொகை ஆதரவாளர்களை தக்க வைத்துக் கொள்ள வேண்டுமாக இருந்தால் அம்பாரை மாவட்டத்திற்கு தேசிய பட்டியல் பாராளுமன்ற உறுப்பினர் பதவியை வழங்கியிருக்க வேண்டும். அம்பாரையில் இக்கட்சிக்கு வாக்களித்தவர்களில் பலரும் தமது மாவட்டத்திற்கு தேசிய பட்டியல் கிடைக்குமென்று நம்பினார்கள். ஆனால், புத்தளத்திற்கு வழங்க்கப்பட்டுள்ளது. இதனால், அம்பாரை மாவட்டத்தில் உள்ள அகில இலங்கை மக்கள் காங்கிரஸின் ஆதரவாளர்கள் ஏமாற்றமடைந்துள்ளார்கள். இதே வேளை, மு.காவில் இருந்து றிசாத் பதியுதீன் பிரிந்து சென்ற போது, அவரோடு எது நடந்தாலும் பருவாயில்லை என்று கண்களை பொத்திக் கொண்டு வெளியேறிய ஐந்து பேரில் வை.எல்.எஸ்.ஹமீதும் ஒருவராவார் என்பது குறிப்பிடத்தக்கது.
அகில இலங்கை மக்கள் காங்கிரஸின் தலைவர் றிசாட் பதியுதீன் தேசிய பட்டியல் பாராளுமன்ற உறுப்பினர் பதவியை விமர்சனங்களுக்கு மத்தியில் முடிவு எடுத்தமையால் அப்பிரச்சினை முடிவுக்கு வந்துள்ளது.
ஆனால், மு.காவின் தலைவர் ரவூப் ஹக்கீம் தேசிய பட்டியல் பாராளுமன்ற உறுப்பினர் பதவியை யாருக்கு வழங்குவதென்று இன்னும் தீர்மானிக்கவில்லை. இதனால், தேசிய பட்டியல் பாராளுமன்ற உறுப்பினர் பதவியைப் பெற்றுக் கொள்வதற்காக தேர்தலில தோல்வியடைந்தவர்களும், மற்றவர்களும் ரவூப் ஹக்கீமுக்கு நெருக்கடிகளை ஏற்படுத்திக் கொண்டிருக்கின்றார்கள்.
இதே வேளை, தேர்தலில் வெற்றி பெற்றவர்கள் தங்களுக்கு அமைச்சர் பதவிகள் வேண்டுமென்று ஆதரவாளர்களுடன் கொழும்பில் தரித்திருக்கின்றார்கள்.
தேசிய பட்டியல் பாராளுமன்ற உறுப்பினர் பதவியை பாராளுமன்ற பிரதிநிதித்துவத்தை இழந்துள்ள வன்னிக்கும், திருகோணமலைக்கும் வழங்க வேண்டுமென்றும், அட்டாளைச்சேனைக்கு வழங்க வேண்டுமென்றும், செயலாளர் ஹஸன்அலிக்கு வழங்க வேண்டுமென்றும் கேட்கப்பட்டுக் கொண்டிருக்கின்றன.
அம்பாரையில் 03 பாராளுமன்ற உறுப்பினர்கள் உள்ளார்கள். 05 மாகாண சபை உறுப்பினர்கள் உள்ளார்கள். வெற்றி பெற்ற பாராளுமன்ற உறுப்பினர்களில் 02 பேர் அமைச்சர்களாக நியமிக்கப்படலாம். ஆதலால், அம்பாரை மாவட்டத்திற்கு தேசிய பட்டியல் பாராளுமன்ற உறுப்பினர் பதவியை வழங்குவது கட்சியின் நலனைக் கருதியதாக இருக்காது. ஆதலால், வன்னிக்கும், திருமலைக்கும் வழங்குவதே சிறந்த முடிவாக அமையுமென்று மு.காவின் உயர்பீட உறுப்பினர்களில் சிலர் எம்மிடம் தெரிவித்தார்கள்.
இதே வேளை, எப்பிரதேசத்திற்கு வழங்குவதாக இருந்தாலும், கட்சியிலுள்ள சிரேஸ்ட உறுப்பினர்களுக்கே தேசிய பட்டியல் பாராளுமன்ற உறுப்பினர் பதவி வழங்க வேண்டுமென்று ஒரு சில உயர்பீட உறுப்பினர்கள் ரவூப் ஹக்கீமை வலியுறுத்திக் கொண்டிருக்கின்றார்கள். இப்பிரச்சினைக்கு தீர்வுகளை காண்பதற்கு மு.காவின் தலைவர் ரவூப் ஹக்கீம் தலையிடிக்குள்ளாகி இருக்கும் நிலையில், வெற்றி பெற்ற பாராளுமன்ற உறுப்பினர்களும், அவர்களின் தனிப்பட்;ட விசுவாசிகளும் அமைச்சர் பதவிகளுக்கு தங்களின் பெயர் பரிந்துரைக்கப்பட வேண்டுமென்று ரவூப் ஹக்கீமை தினமும் நச்சரித்துக் கொண்டிருக்கின்றார்கள்.
முஸ்லிம் சமூகத்தின் எதிர்காலத்திற்கு என்ன செய்யலாம் என்று சிந்திக்காது பதவிகளை பெற்றுக் கொள்வதற்காக போட்டி போட்டுக் கொண்டிருக்கும் இவர்கள் முஸ்லிம் சமூகத்தின் எதிர்காலத்தை தீர்மானிப்பார்கள் என்று சொல்ல முடியாது. மு.கா தற்போது பெற்றுள்ள வெற்றியின் முழுப் பெறுமதியும் ரவூப் ஹக்கீமையே சாரும். வேட்பாளர்களைப் பற்றி பலத்த விமர்சனங்கள் இருந்தமை குறிப்பிடத்தக்கது.
மேலும், புதிய பாராளுமன்றத்தில் முஸ்லிம்கள் சார்பில் தேசிய பட்டியில் தெரிவு செய்யப்படுகின்றவர்கள் நல்ல சிந்தனையாளர்களாகவும், முஸ்லிம் சமூகத்தின் பிரச்சினைகளை அறிந்தவராகவும், ஆழமான அறிவுடையவராகவும் இருக்க வேண்டும். சமூகத்திற்காக உழைக்கக் கூடியவராகவும், தைரியசாலியாகவும் இருக்க வேண்டும் என்பதே எமது நிலைப்பாடாகும்.
நன்றி: வீரகேசரி வாரவெளியீடு (30.08.2015)
0 comments:
Post a Comment