ஆட்சி மாற்றத்திற்கான ஊசலாட்டம்

எஸ்.றிபான் -
ஜனாதிபதித் தேர்தலுக்கான திகதி அறிவிக்கப்பட்டதன் பின்னர், இலங்கை அரசியல் களம் சூடு பிடித்துள்ளது. ஆளுந் தரப்பிலிருந்து பாராளுமன்ற உறுப்பினர்கள் ஒவ்வொருவராக எதிர்கட்சிக்கு மாறிக் கொண்டிருக்கின்றார்கள். இதே வேளை, பாராளுமன்றத்திற்கு வெளியேயும் கட்சி மாறும் படலம் இடம்பெற்றுக் கொண்டிருக்கின்றது. ஆளுந் தரப்பினர்கள் எதிர் தரப்புக்கு சென்று கொண்டிருப்பது அரசாங்கத்திற்கு தலைவலியை ஏற்படுத்தியுள்ளது. அதே வேளை, எதிர் அணியினருக்கு குஷியை ஏற்படுத்தியுள்ளது.

ஜனாதிபதித் தேர்தலில் மஹிந்தராஜபக்ஷ வெற்றியடைவாரா அல்லது தோல்வியடைவாரா என்ற விவாதங்கள் இருக்கின்ற நிலையில், ஐக்கிய மக்கள் சுதந்திர முன்னணியின் ஆளுகைக்குட்பட்ட மாகாண சபைகளின் ஆட்சி அதிகாரங்கள் எதிர்த் தரப்பினருக்கு சென்று விடுN மா என்றதொரு கேள்வி முன் வைக்கப்படும் அளவிற்கு மாகாண சபைகளில் குழப்பங்களும், கோரமின்மைகளும் அரங்கேற்றப்பட்டு வருகின்றன. இது அரசாங்கத்திற்கு ஏற்பட்டுள்ள தலையிடியுடன், காய்ச்சலாகவும் மாறிக் கொண்டிருக்கின்றது. அரசாங்கத்திற்கு ஏற்பட்டுள்ள இந்நிலை, அரசாங்கத்தில் பங்காளிகளாக மதில் மேல் பூனைகளாக இருந்து கொண்டிருக்கும் மு.காவுக்கும், அகில இலங்கை மக்கள் காங்கிரஸிற்கும் கிலியை ஏற்படுத்திக் கொண்டிருக்கின்றன.

இக்கட்சிகள் ஜனாதிபதித் தேர்தலில் மஹிந்தராஜபக்ஷவுக்கு ஆதரவு வழங்குவதற்கு மறைமுகமாக தீர்மானங்களை எடுத்துள்ள போதிலும், அரசாங்கத்தின் மீது முஸ்லிம்களுக்கு ஏற்பட்டுள்ள வெறுப்பு காரணமாக தங்களின் முடிவினை அறிவிக்க முடியாதவர்களாக இக்கட்சியினர் உள்ளார்கள். மக்களின் விருப்புக்கும் தங்களின் விருப்புக்குமிடையே முரண்பாடுகள் உள்ளதால்தான் முடிவினை அறிவிப்பதற்கு முடங்கிக் கிடக்கின்றார்கள்.

கிழக்கு மாகாண சபை அமர்வு

அகில இலங்கை மக்கள் காங்கிரஸின் கிழக்கு மாகாண சபை உறுப்பினர்கள் மூன்று பேர், கட்சியின் முடிவின் படி கிழக்கு மாகாண சபையில் தாங்கள் தனித்து இயங்க இருப்பதாக அறிவித்திருந்தார்கள். இவர்களின் அறிவிப்பு நாட்டில் ஒரு பரபரப்பை ஏற்படுத்தியது. இந்தப் பின்னணியில் கிழக்கு மாகாண சபையின் அமர்வு கடந்த 01.12.2014 திங்கட் கிழமை காலை நடைபெற்றது.

இந்த அமர்வின் போது, கிழக்கு மாகாண சபையின் 2015ஆம் ஆண்டிற்குரிய வரவு - செலவு திட்டறிக்கை சபையின் அங்கிகாரத்திற்கு முன் வைக்கப்பட இருந்தது. ஆயினும், சபையில் போதிய கோரமின்மை காரணமாக சபையை 02.12.2014 செவ்வாய்கிழமைக்கு சபையின் தலைவர் ஆரியவத்தி கலப்பத்தி ஒத்தி வைத்தார். சபை அமர்வின் போது அகில இலங்கை மக்கள் காங்கிரஸின் 03 உறுப்பினர்களும், மு.காவின் 02 உறுப்பினர்களும் சமூகமளித்திருக்கவில்லை. இதனால், 2015ஆம் ஆண்டுக்குரிய வரவு – செலவு திட்டம் தோற்கடிக்கப்படுவதற்கான வாய்ப்புக்கள் காணப்பட்டன. இதனை கருத்திற் கொண்டு, சபையின் தலைவர் கோரமின்மையை சுட்டிக் காட்டி, சபையை ஒத்தி வைப்பதாக அறிவித்த போது, சபையில் பெரும் குழப்பமும், கூச்சலும் ஏற்பட்டன. கிழக்கு மாகாண சபை உறுப்பினர்களில் எதிர்க்கட்சியினர் செங்கோலை தூக்கிக் கொண்டு செல்லுவதற்கு முற்பட்டார்கள். 

இதனால், கிழக்கு மாகாண சபை அல்லோல கல்லோலப்பட்டது. அத்தோடு, ஐ.தே.கவினர் அவைத் தலைவரை தனது இருக்கையில் இருந்து கீழே இறங்கவிடாது வழியை மறைத்தனர். இதனால், அடிதடியும் ஏற்பட்டது. தொடர்ந்தும் சபையை கொண்டு நடத்த முடியாமை காரணமாக மறுநாள் செவ்வாய்க்கிழமை (02) வரை ஒத்திவைக்கப்பட்டது.

கிழக்கு மாகாண சபை மீண்டும் 02.12.2014 கூடிய போது, மு.காவின் 07 உறுப்பினர்களும், அகில இலங்கை மக்கள் காங்கிரஸின் 03 உறுப்பினர்களும் சமூகமளிக்கவில்லை. இதனால், கிழக்கு மாகாண சபையின் அமர்வு 2015 ஜனவரி 12ஆம் திகதிக்கு அதாவது ஜனாதிபதித் தேர்தல் முடிவடைந்து 03 நாட்களின் பின்னர் நடைபெற இருக்கின்றது.

கிழக்கு மாகாண சபையின் அதிகாரம் ஐ.ம.சு.முன்னணியின் அதிகாரத்தில் இருந்தாலும், இம்முன்னணி தனிப் பெரும்பான்மையைக் கொண்டு ஆட்சி அமைக்கவில்லை. தனித்து போட்டியிட்ட மு.காவின் 07 உறுப்பினர்களையும், ஐ.ம.சு.முன்னணியுடன் இணைந்து போட்டியிட்ட அகில இலங்கை மக்கள் காங்கிரஸின் 03 உறுப்பினர்கள், தேசிய காங்கிரஸின் 03 உறுப்பினர்கள் மற்றும் தமிழ் மக்கள் விடுதலைப் புலிகள் கட்சியின் 02 உறுப்பினர்களையும் இணைத்துக் கொண்டே ஐ.ம.சு.மு கிழக்கு மாகாண சபையின் அதிகாரத்தை பெற்றுள்ளது.

ஜனாதிபதித் தேர்தல் அறிவிக்கப்பட்டதனை அடுத்து, அரசாங்கத்தில் உள்ள சிறு கட்சிகள் தங்களின் கோரிக்கைகளை நிறைவேற்றிக் கொள்வதற்கு முஸ்தீபுகளை எடுத்துச் செயற்பட்டுக் கொண்டிருக்கின்றன.

அந்த வகையில், ஜனாதிபதித் தேர்தலுக்கான திகதி அறிவிக்கப்படும் வரை அரசாங்கத்தில் பொது பல சேனா போன்ற பௌத்த கடும் போக்கு அமைப்புக்களின் நடவடிக்கைகளைப் பற்றியும், பள்ளிவாசல்களின் மீது மேற்கொள்ளப்பட்ட தாக்குதல்களைப் பற்றியும், ஹலால் பிரச்சினைகளைப் பற்றியும் அலட்டிக் கொள்ளாது, அரசாங்கத்திற்கு அழுத்தங்களைக் கொடுக்காது, அறிக்கைகளில் வீர வசனங்களை பேசி, அடங்கி இருந்த முஸ்லிம் கட்சிகள் (அதாவுல்லா கட்சியைப் பற்றி பேசவில்லை. அக்கட்சியும், அவரும் இன்றும் அடங்கியே உள்ளார்) ஜனாதிபதித் தேர்தலில் கோரிக்கைகளை முன் வைத்துக் கொண்டிருப்பது முஸ்லிம் சமூகத்தின் நலன்களை கருத்திற் கொண்டுதான் என்று எடைபோட்டு விட முடியாது.

கிழக்கு மாகாண சபையில் அ.இ.ம.காங்கிரஸின் 03 உறுப்பினர்களும் தனித்து இயங்குவதற்கு முடிவெடுத்துள்ளமைக்கு அரசாங்கத்தோடு பொது பல சேனா இருப்பது, கடந்த காலங்களில் பொதுபல சேனா போன்ற அமைப்புக்கள் முஸ்லிம்களின் மீது குரோதச் செயல்களில் ஈடுபட்டமை போன்ற சில காரணங்களை அக்கட்சி முன் வைத்துள்ளன. ஆனால், இக்கட்சியின் பாராளுமன்ற உறுப்பினர் பிரதி அமைச்சர் எம்.எல்.ஏ.எம்.ஹிஸ்புல்லா பொது பல சேனாவிற்கு பாடம் புகட்ட முஸ்லிம்கள் மஹிந்தராஜபக்ஷவுக்கு வாக்களிக்க வேண்டுமென்று தெரிவித்துள்ளார். பொது பல சேனாவும் மஹிந்தராஜபக்ஷவுக்கு வாக்களிக்குமாறு பிரச்சாரம் செய்து கொண்டிருக்கின்றது. ஒரே பக்கத்தில் முஸ்லிம் கட்சிகளும், பொது பல சேனாவும் இருக்குமாயின் பொது பல சேனாவுக்கு ஹிஸ்புல்லா பாடம் புகட்ட அழைப்பது ஏற்றுக் கொள்ள முடியாது அரசியலாகும்.

அ.இ.ம.காவின் கிழக்கு மாகாண சபை உறுப்பினர்கள் தனித்து இயங்கவதற்காக சொல்லுகின்ற காரணங்கள் ஹிஸ்புல்லாவின் வேண்டுகோளுடன் முரண்பட்டுள்ளதனைக் காட்டுகின்றது. மஹிந்தராஜபக்ஷவுடன் எந்தப் பிசாசு இருந்தாலும் வாக்களிக்க வேண்டுமென்றே ஹிஸ்புல்லா கேட்டுக் கொள்வார். நரிபுத்தி அரசியல் முஸ்லிம் சமூகத்திற்கு ஒத்துவராது. கொள்கை ரீதியான அரசியலே முஸ்லிம் சமூகத்தின் எதிர் காலத்திற்கு தேவையாகும். முஸ்லிம் அரசியல் தலைவர்கள் கொள்கைகளின்றி இருக்கின்ற அதே வேளை, பதவிகளின்றி இருக்க முடியாதவர்களாகவும் உள்ளார்கள்.

மு.காவின் உறுப்பினர்கள் ஏன் சமூமளிக்கவில்லை?

01.12.2014இல் கூடிய கிழக்கு மாகாண சபையின் அமர்வில் அக்கட்சியின் 02 உறுப்பினர்கள் சமூகமளிக்கவில்லை. இவர்கள் திட்டமிட்டு சமூகமளிக்காதிருந்தார்கள் என்று சொல்ல முடியாது. ஜனாதிபதித் தேர்தலில் மு.கா முன் வைத்த கோரிக்கைகளை அரசாங்கம் நிறைவேற்ற தவறினால், கிழக்கு மாகாண சபையில் அரசாங்கத்திற்கு வழங்கிக் கொண்டிருக்கும் ஆதரவை வாபஸ் வாங்குவோம் என்று மு.கா உத்தியோகபூர்வமாக அறிவிக்கவில்லை. என்றாலும் சிலர் பத்திரிகைகளில் அறிக்கை விட்டிருந்தனர். 

ஆயினும், கிழக்கு மாகாண சபையின் அமர்வின் போது, அதுவும் ஆளுநரினதும், முதலமைச்சரினதும் நிதித் திட்டறிக்கை சமர்ப்பிக்க இருந்த அன்றைய அமர்வில் அ.இ.ம.காங்கிரஸின் உறுப்பினர்கள் கலந்து கொள்ளாது இருந்தமை, மு.காவின் உறுப்பினர்களின் மீது தாக்கத்தை ஏற்படுத்தியது. இதனால், 02.12.2014 அன்று சபை மீண்டும் கூடிய போது, மு.காவின் 07 உறுப்பினர்களும் சமூகமளிக்கவில்லை. இவர்கள் சமூகமளிக்காது இருந்தமை கூட கட்சியினதோ அல்லது தலைவர் ரவூப் ஹக்கீமுடைய தீர்மானமோ அல்ல. அ.இ.ம.காவின் 03 உறுப்பினர்களும் 02.12.2014ஆம் திகதியும் சபை அமர்வுக்கு வருகை தராமல் இருந்தமை மு.காவின் உறுப்பினர்களையும் தடுத்து நிறுத்தியுள்ளது எனலாம்.

ஆதலால், கிழக்கு மாகாண சபையில் மு.காவினதும், அ.இ.ம.காவினதும் உறுப்பினர்கள் சபை அமர்வுகளில் கலந்து கொள்ளாது இருந்தமை முஸ்லிம் சமூகம் சார்ந்ததொரு நகர்வல்ல. இரு கட்சிகளினதும் அரசியல் நடவடிக்கைகளில் ஒன்றாகும்.

இதே வேளை, தேசிய காங்கிரஸின் 03 உறுப்பினர்களும் இரண்டு நாட்களும் தவறாது சபையில் அமர்ந்து கொண்டார்கள். ஆட்சியாளர்களை பகைத்துக் கொள்ளாது, ஆதரவாளர்களை சமாளித்துக் கொள்ளலாம் என்ற சிந்தாந்தத்தை கிழக்கு மாகாண சபையிலும் அக்கட்சி கடைபிடித்துக் கொண்டிருக்கின்றது.

ஐ.தே.கவின் உறுப்பினர் இம்ரானை தவிர ஏனைய முஸ்லிம் உறுப்பினர்கள் ஆளுந்தரப்பிலேயே இருக்கின்றார்கள். எதிர் தரப்பிலுள்ள ஒரேயொரு முஸ்லிம் உறுப்பினரான அவர் இரு தினங்களும் சபையில் பிரசன்னமாகியிருந்தார்.

அரசாங்கத்தின் நுணுக்கமான நகர்வு

அரசாங்கத்திற்கு ஏற்பட்டுள்ள ஜனாதிபதித் தேர்தல் காய்ச்சலை பயன்படுத்தி தாங்கள் நினைத்துக் கொண்டிருப்பதனை சாதித்துக் கொள்வதற்கு மு.காவும், அ.இ.ம.காவும் முயற்சிகளை எடுத்துள்ளன. எங்களின் கோரிக்கைகளை நிறைவேற்றாது போனால், கிழக்கு மாகாண சபையின் ஆட்சியை மாற்றியமைப்போம் என்றதொரு எச்சரிக்கையை விடுக்க முற்பட்டவர்களுக்கு ஏமாற்றத்தை அளிக்கும் வகையில் (ஜனாதிபதி தேர்தலுக்கு பின்னர்) 2015 ஜனவரி 12ஆம் திகதி சபையின் அமர்வு ஒத்தி வைக்கப்பட்டுள்ளது.

இதன் மூலமாக, அரசாங்கம் இக்கட்சிகளின் கோரிக்கைகளை நிறைவேற்ற தயாரற்ற நிலையில் இருப்பதனைக் காட்டுகின்றது. ஜனாதிபதி தேர்தலில் ஏற்பட்டுள்ள இக்கட்டான நிலையில் கூட, தமது கொள்கையில் உறுதியாக இருக்கும் தரப்பினர், தேர்தலின் பின்னர் நிறைவேற்றுவார்கள் என்று நம்பவும் முடியாது.

கிழக்கு மாகாண சபையில் மாத்திரமின்றி, மேல் மாகாண சபை அமர்வும் ஒத்தி வைக்கப்படலாமென எதிர்வு கூறப்படுகிறது. அங்கு கட்சி தாவுதல் நடைபெறும் வாய்ப்புக்கள் அதிகமாகவே இருக்கின்றது. ஏனெனில், ஆளும் கட்சிக்குள் முன்னாள் ஜனாதிபதியின் ஆதரவாளர்கள் இருப்பது குறிப்பிடத்தக்கது. 2015 ஜனவரி மாதம் 20 ஆம் திகதி வரையில் ஒத்தி வைக்கப்பட்டுள்ளதாக சபையின் தலைவர் சுனில் விஜேரத்ன அறிவித்துள்ளார். 01.012.2014 அன்று கூடிய மேல் மாகாண சபையின் அமர்வும் கூட போதிய போரமின்மையால் ஒத்திவைக்கப்பட்டது. மேல் மாகாண சபையினதும், கிழக்கு மாகாண சபையினதும் ஆட்சி அதிகாரம் ஐ.ம.சு.முன்னிணியிடம் இருந்து பறிபோகக் கூடிய வாய்ப்புக்கள் உருவாகிக் கொண்டு வருவதாக தெரிவிக்கப்பட்ட நிலையிலேயே, இச்சபைகளின் அமர்வுகள் 2015 ஜனவரிக்கு ஒத்தி வைக்கப்பட்டுள்ளன.

இச்சபைகளின் அமர்வுகளை ஒத்தி வைத்துள்ளதன் ஊடாக அரசாங்கம் மிகவும் நுணுக்கமானதொரு அரசியல் காய்நகர்த்தலை மேற்கொண்டுள்ளது. அதாவது, ஜனாதிபதித் தேர்தலில் மஹிந்தராஜபக்ஷ வெற்றி பெற்றால், இக்கட்சிகள் நிபந்தனையற்ற வகையில் முண்டியடித்துக் கொண்டு அரசாங்கத்தோடு ஒட்டிக் கொள்வார்கள். அதற்கு உபகாரமாக அமைச்சர் பதவிகளை வழங்கினால் போதுமானது. அதன் பின்னர், எதற்கும் வாய் திறக்கமாட்டார்கள் என்று அரசாங்கம் முஸ்லிம் அரசியல் தலைவர்களின் பலவீனத்தை தெளிவாக அடையாளங் கண்டுள்ளது.

இதே வேளை, கிழக்கு மாகாண சபையின் வரவு - செலவு திட்டம் சமர்ப்பிக்கப்பட்ட போது தமது கட்சியின் உறுப்பினர்கள் அமர்வில் கலந்து கொள்ளாமையை அடுத்து, மு.காவின் தலைவர் ரவூப் ஹக்கீம் தமது கட்சியின் கிழக்கு மாகாண சபை உறுப்பினர்களை கொழும்புக்கு அழைத்ததாக செய்திகள் வெளியாகியிருந்தன. எனினும், அச்செய்தி மறுக்கப்பட்டது. அத்தோடு அவர்கள் சபைக்கு பிரசன்னமாகாத போதும், சபை வளாகத்திற்கு சென்றுள்ளனர்.

அமீர் அலிக்கு பாராளுமன்ற உறுப்பினர் பதவி

கிழக்கு மாகாண சபையின் உறுப்பினர் அமீர்அலிக்கு முன்னாள் பாராளுமன்ற உறுப்பினர் அஸ்வர் வகித்த தேசிய பட்டியல் பாராளுமன்ற உறுப்பினர் பதவியை வழங்க அரசாங்கம் முன் வந்துள்ளதாக தெரிவிக்கப்படுகின்றது. இதே வேளை, இந்த பாராளுமன்ற உறுப்பினர் பதவியை அமீர்அலி ஏற்க மறுத்துள்ளார். அரசாங்கத்தோடு பொதுபல சேனா இருக்கும் வரையில், பாராளுமன்ற உறுப்பினர் பதவியை பெற்றுக் கொள்ள முடியாதென்று அவர் தெரிவித்துள்ளார்.

ஆனால், அமீர்அலி பாராளுமன்ற உறுப்பினர் பதவியில் மாத்திரம் குறி வைக்காது, பிரதி அமைச்சர் பதவியிலும் குறிவைத்துள்ளார். இவை இல்லாது போனால், கிழக்கு மாகாண சபையின் முதலமைச்சர் பதவியில் கண் வைத்துள்ளார்.

நன்றி: விடிவெள்ளி

1:41 PM