முஸ்லிம்கள் எதிர்பார்க்கும் மாற்றங்களை முஸ்லிம் கட்சிகள் பெற்றுக் கொடுக்குமா?

சஹாப்தீன் -
கிழக்கு மாகாண சபையின் 2015ஆம் ஆண்டிற்குரிய வரவு – செலவுத் திட்டம் தோற்கடிக்கப்படுவதற்கானதொரு சந்தர்ப்பம் ஏற்பட்டதொரு சூழலில் கிழக்கு மாகாண சபையின் அமர்வு 2015 ஜனவரி 12ஆம் திகதிக்கு ஒத்தி வைக்கப்பட்டுள்ளது.

கிழக்கு மாகாண சபையின் அமர்வு கடந்த 01.12.2014 திங்கட்கிழமை கூடியது. இதன் போது கிழக்கு மாகாண சபையின் 2015ஆம் ஆண்டிற்கான வரவு – செலவுத் திட்டம் சமர்ப்பிக்கப்பட இருந்தது. ஆயினும், சபையில் போதிய கோரமில்லை என சபைத் தலைவர் ஆரியவத்தி கலப்பத்தியினால் 02.12.2014ஆம் திகதிக்கு ஒத்தி வைக்கப்பட்டது.

இவ்வொத்தி வைப்பு அறிவித்தலைத் தொடர்ந்து சபையில் எதிர்க்கட்சி உறுப்பினர்கள் பிரச்சினையில் ஈடுபட்டார்கள். சபைத் தலைவரை அவரது ஆசனத்திலிருந்து செல்லவதற்கு தடைகளை ஏற்படுத்தினார்கள். செங்கோலை எடுத்துக் கொண்டு வெளியே செல்லுவதற்கு முற்பட்டார்கள்.

01.12.2014இல் கூடிய கிழக்கு மாகாண சபை அமர்வுக்கு அகில இலங்கை மக்கள் காங்கிரஸின் 03 உறுப்பினர்கள் சமூமளிக்கவில்லை. இவர்கள் கிழக்கு மாகாண சபையில் தனித்து இயங்க இருப்பதாக ஏற்கனவே அறிவித்ததன் பிரகாரம் சபை அமர்வுக்கு வந்திருக்கவில்லை. இதே வேளை, மு.காவின் உறுப்பினர்கள் 02பேரும் சமூகமளிக்கவில்லை. கிழக்கு மாகாண சபையில் ஆளுந் தரப்பில் சபையின் தலைவர் உட்பட 22 உறுப்பினர்களும், எதிர்க்கட்சியில் 15 உறுப்பினர்களும் உள்ளார்கள்.

சபை 02.12.2014இல் மீண்டும் கூடிய போது, அ.இ.ம.காவின் 03 உறுப்பினர்களும், மு.காவின் 07 உறுப்பினர்களும் சபை அமர்வுக்கு வருகை தரவில்லை. இதனால், கிழக்கு மாகாண சபையின் வரவு – செலவுத் திட்டம் தோற்கடிக்கப்படுவதிலிருந்து பாதுகாப்பதற்காக சபையின் அமர்வு எதிர்வரும் 2015 ஜனவரி 12ஆம் திகதிக்கு ஒத்தி வைக்கப்பட்டுள்ளது.

கிழக்கு மாகாண சபையின் அ.இ.ம.காவின் 03 உறுப்பினர்களும் தனித்து இயங்குவதற்கு எடுத்த முடிவு மு.காவின் உறுப்பினர்களின் மீது தாக்கத்தை ஏற்படுத்தி இருந்தது எனலாம். ஏற்கனவே, மு.காவின் கிழக்கு மாகாண சபையின் உறுப்பினர்களின் குழுத் தலைவர் ஏ.எம்.ஜெமீல் தங்களது கட்சியின் கோரிக்கைகளை அரசாங்கம் நிறைவேற்றத் தவறும் பட்சத்தில், அரசாங்கத்திற்கு கிழக்கு மாகாண சபையில் வழங்கிக் கொண்டிருக்கும் ஆதரவை வாபஸ் வாங்க வேண்டியேற்படும் என்று எச்சரிக்கை செய்திருந்தார். இந்த எச்சரிக்கை கட்சியின் மூலமாக  உத்தியோகபூர்வமானதொரு அறிவித்தலாக விடுக்கப்படவில்லை. அது ஜெமிலின் தனிப்பட்ட அறிவித்தலாகவே அமைந்திருந்தது.

ஆயினும், அ.இ.ம.காவின் உறுப்பினர்களின் முடிவு சமூகம் சார்ந்த பிரச்சினைகளுக்கு தீர்வு காண்பதற்குரியதாக இல்லாது, தனிப்பட்டதொரு நபரின் அரசியல் வாழ்வுக்கானதொரு (அரசியல் வாழ்வாதாரப்) போராட்டமாகும். இருப்பினும், இவர்களின் முடிவு சாதாரண மக்களிடையே பேசப்படுவதாகவே இருந்தது. தாங்கள் தனித்து இயங்க கட்சியினால் முடிவு எடுக்கப்பட்டுள்ளது எனத் தெரிவிக்கப்பட்டு, மறுநாள் அக்கட்சியின் நாடாளுமன்ற உறுப்பினர் ஹுனைஸ் பாறூக் ஐ.தே.கவில் இணைந்து கொண்டார். அவர் பொதுபல சேனா போன்ற அமைப்புக்கள் முஸ்லிம்கள் மீது மேற்கொண்ட அடக்கு முறைகளை சுட்டிக்காட்டி, அதனை கட்டுப்படுத்துவதற்கு அரசாங்கம் நடவடிக்கை எடுக்காதிருக்கும் நிலையில் அரசாங்கத்தோடு தொடர்ந்து இருக்க முடியாதென்று தெரிவித்திருந்தார்.

நாடாளுமன்ற உறுப்பினர் ஹுனைஸ் பாறூக்கின் இந்த அறிக்கை முஸ்லிம்களிடையே பேசுபொருளாக மாறியது. மறுபுறத்தில் மு.காவினைப் பற்றி அதிக விமர்சனங்கள் முன் வைக்கப்பட்டன.

இந்தப் பின்னணியில் மு.காவும் ஏதாவது செய்தாக வேண்டும். ஆனால், அதற்கு மு.காவின் தலைமையோ அல்லது உயர்பீட உறுப்பினர்களோ துணியவில்லை. கிழக்கு மாகாண சபையின் ஒரு சில மு.காவின் உறுப்பினர்களின் வற்புறுத்தலுக்கு அமைவாக, மு.காவின் உறுப்பினர்களும் சபை அமர்வினை பகிஸ்கரிக்க வேண்டி ஏற்பட்டதனால்தான் 02.12.2014இல் கூடிய அமர்விற்கு அக்கட்சியின் 07 உறுப்பினர்களும் சமூகமளிக்கவில்லை.

மாகாண சபையில் தனித்து இயங்குவதன் மூலமான அரசாங்கத்தை பணிய வைத்து, அமீர்அலிக்கு பிரதி அமைச்சருடன் நாடாளுமன்ற உறுப்பினர் பதவியை அல்லது கிழக்கு மாகாண சபையின் முதலமைச்சர் பதவியை பெற்றுக் கொள்வதற்கு அ.இ.ம.கா ஆடிய நாடகம், மு.காவின் உறுப்பினர்கள் மேற்கொண்ட மற்றுமொரு நாடகத்தினால் சபை அமர்வு ஜனாதிபதித் தேர்தலுக்கு பின்னர் 12.01.2015இற்கு ஒத்தி வைக்கப்படுவதற்கு காரணமாயிட்டு. அரசாங்கத்தின் இந்த அதிரடி நடவடிக்கை கிணறு வெட்டப் போய் பூதம் கிளம்பிய கதையாக அ.இ.ம.காவுக்கு ஏற்பட்டுள்ளது. ஏன் தொடங்கினோம்? எந்த முடிவுக்கு போவதென்று தெரிந்தாலும், வெளியில் சொல்ல முடியாதவர்களாக அக்கட்சியினர் உள்ளார்கள். ஆப்பு இழுத்த குரங்கின் நிலை என்றும் சொல்லலாம்.

இந்த ஒத்தி வைப்பின் மூலமாக ஜனாதிபதித் தேர்தலை பயன்படுத்தி, அரசாங்கத்தை அடிபணியச் செய்து தாங்கள் நினைப்பதனை சாதித்துக் கொள்ளலாம் என மு.காவும், அ.இ.ம.காவும் போட்ட கணக்கை அரசாங்கம் தகர்த்துள்ளது. ஆளுந்தரப்பில் இருந்து நாடாளுமன்ற உறுப்பினர்கள் எதிர்க்கட்சிக்கு சென்று கொண்டிருக்கும் நிலையிலும், நாளை யார் அரசாங்கத்திலிருந்து விலகி பொது வேட்பாளர் மைத்திரிபால சிறிசேனவுக்கு ஆதரவு வழங்குவார்கள் என்று சொல்ல முடியாத சூழல் இருந்து கொண்டிருக்கும் நிலையிலும், அரசாங்கம் மேற்படி இருகட்சிகளினதும் கோரிக்கைகளுக்கு செவிசாய்க்கவில்லை.

தங்களது கோரிக்கைகளுக்கு அரசாங்கத்தை செவிசாய்க்க வைத்து, அரசியல் இலாபம் அடைந்து கொள்வதற்கு இக்கட்சிகள் நினைப்பதனைப் போன்று, சிறுபான்மைக் கட்சிகளின் கோரிக்கைகளுக்கு தலைசாய்க்காது இருப்பதன் மூலமாக அரசியல் இலாபம் அடைந்து கொள்வதற்கு அரசாங்கம் எண்ணுகின்றது.

மேலும், மு.காவினதும், அ.இ.ம.காவினதும் கோரிக்கைகளை நிறைவேற்றிக் கொடுத்தாலும், இக்கட்சிகள் மஹிந்தராஜபக்ஷவுக்கு ஆதரவு அளித்தால் கூட, முஸ்லிம்கள் இவ்விரு கட்சிகளின் விருப்பத்திற்கு ஏற்றவாறு தேர்தலில் நடந்து கொள்வார்களா என்பதும் சந்தேகமாகும். இந்த சந்தேகம் அரசாங்கத்திற்கும் இருக்கின்றது. ஆதலால், ஜனாதிபதித் தேர்தலுக்காக இக்கட்சிகளின் கோரிக்கைகளை நிறைவேற்றிக் கொடுப்பதன் மூலமாக எதிர்பார்க்கும் நோக்கத்தை ஜனாதிபதி வேட்பாளர்களினால் அடைந்து கொள்ள முடியாது.

கிழக்கு மாகாண சபையின் அமர்வினை ஜனாதிபதித் தேர்தலுக்குப் பின்னர் ஒத்தி வைக்கப்பட்டுள்ளதன் மூலமாக அரசாங்கம் மிகவும் தந்திரமானதொரு அரசியல் நகர்வை மேற்கொண்டுள்ளது. அதாவது, ஜனாதிபதித் தேர்தலில் மஹிந்தராஜபக்ஷ வெற்றி பெற்றால், கோரிக்கைகளை முன் வைத்துக் கொண்டிருக்கும் இக்கட்சிகள் தமது சகல கோரிக்கைகளையும் உதறித் தள்ளிவிட்டு, காலடியில் கிடக்கும் என்று எதிர் பார்க்கின்றது. இது இக்கட்சிகளின் கடந்த கால அனுபவத்தின் மூலமாக அரசாங்கம் கற்றுக் கொண்டதாகும். ஜனாதிபதித் தேர்தலில் தங்களுக்கு ஆதரவு வழங்கி, வெற்றியும் பெற்றால் அமைச்சர் பதவிகள் போன்ற துண்டுகளை போட்டுவிட்டால் கவ்விக் கொள்வார்கள். அதனொடு அடங்கிவிடுவார்கள் என்பதே மஹிந்தராஜபக்ஷவினரின் கணிப்பாகும்.

கடந்த பல தேர்தல்களில் முஸ்லிம் கட்சிகளும், தலைவர்களும், ஏனைய உபரிகளும் மக்களிடம் முன் வைத்த கோரிக்கைகளை அடையாது, வேறு கோரிக்கைகளை நிறைவேற்றிக் கொண்டமை முஸ்லிம் வாக்காளர்கள் அறியாததல்ல.

தாங்கள் ஜனாதிபதித் தேர்தலில் தோல்வியடைந்தால் கிழக்கு மாகாண சபையின் அதிகாரத்தை தக்க வைத்துக் கொள்ளவும் முடியாது. இவையை கருத்திற் கொண்டுதான் அரசாங்கம் கிழக்கு மாகாண சபையின் அமர்வினை ஒத்தி வைத்துள்ளது.

இதே வேளை, அ.இ.மு.காவின் உறுப்பினர்களின் நடவடிக்கைகளினால் உந்துதலான மு.காவின் கிழக்கு மாகாண சபை உறுப்பினர்களின் சபை பகிஸ்கரிப்பு நடவடிக்கைகள் ரவூப் ஹக்கிமை இன்னும் சிக்கல்களுக்குள் மாட்டியுள்ளது.

ஜனாதிபதிக்கும், கட்சியிலுள்ள மக்கள் பிரதிநிதிகளுக்கும் நல்ல பிள்ளையாக தோற்றமளித்துக் கொண்டிருந்த ரவூப் ஹக்கீமின் முகத்திரை கிழிக்கப்பட்டுள்ளது. அளுத்கம, பேருவளை, தர்ஹா நகர் போன்ற இடங்களில் முஸ்லிம்களின் மீது மேற் கொள்ளப்பட்ட தாக்குதல்களை நேரில் பார்த்த ரவூப் ஹக்கீம் குழுவினர் கண்ணீர் விட்டு அழுத்தார்கள். அதன் பின்னர் நடைபெற்ற மு.காவின் உயர்பீடக் கூட்டத்தில் கட்சியில் உள்ள அமைச்சர் பதவிகளை இராஜினாமாச் செய்துவிட்டு, அரசாங்கத்தில் இருப்பதென்று தீர்மானிக்கப்பட்டது. ஆனால், ரவூப் ஹக்கிம் கூட அமைச்சர் பதவியை இராஜினாமாச் செய்யவில்லை. அன்று உயர்பீடத்தின் முடிவு நிறைவேற்றப்பட்டிருந்தால், இன்று மு.காவின் கோரிக்கைகள் வலுவுள்ளதாக இருந்திருக்கும். அமைச்சர் பதவிகளை இராஜினாமாச் செய்தவர்கள் அரசாங்கத்தினை விட்டு வெளியேறவும் தயங்கமாட்டார்கள் என்றாகியிருக்கும். அன்றைய சூழலில் மு.காவின் நிலைப்பாட்டை அரசாங்கம் உதாசீனமாகக் கருதி, எந்த மாற்றத்தையும் தமக்குள் ஏற்படுத்திக் கொள்ளாதிருந்தாலும், மைத்திரிபால சிறிசேன பொது வேட்பாளராக அரசாங்கத்திலிருந்து வெளிக்கிளம்பிய போது, மு.காவின் அவசியத்தை அரசாங்கம் உணர்ந்து இருக்கும். அமைச்சர் பதவிகளை துறந்து, அரசாங்கத்தில் இருந்தாலும், ஜனாதிபதித் தேர்தலில் பொது வேட்பாளருக்கு ஆதரவு அளித்துவிடும் என்ற அச்சம் மஹிந்தராஜபக்ஷவுக்கு ஏற்பட்டிருக்கும். இந்த அச்சம் மு.காவின் கோரிக்கைகளை நிறைவேற்றிக் கொள்வதற்கு உதவி இருக்கும்.

மேலும், மு.கா அன்று உயர்பீடத்தில் எடுத்த தீர்மானத்தை நிறைவேற்றிருந்தால், கட்சியின் ஆதரவாளர்கள் கட்சியோடு இருந்திருப்பார்கள். கட்சியின் செல்வாக்கும் அதிகரித்து இருக்கும். ஆனால், கட்சியின் ஆதரவாளர்கள் பெரும் அதிருப்தியில் உள்ளார்கள். ஜனாதிபதித் தேர்தலில் எந்த வேட்பாளரை ஆதரிப்பதென்பதில் முடிவினை எடுப்பதற்கு பல சாட்டுப் போக்குகளை சொல்லிக் கொண்டிருக்க வேண்டிய துர்ப்பாக்கிய நிலைக்கு மு.கா உட்பட்டுள்ளது.

கரையோர மாவட்டம், மேலதிக அரசாங்க அதிபர் போன்றவற்றை பெற்றுக் கொண்டால் முஸ்லிம்களை திருப்திப்படுத்த முடியுமென்று மு.கா நினைக்கின்றது. மு.காவின் இந்த அளவீடு கட்சியின் அடிமட்ட ஆதரவாளர்களின் உணர்வுகளுக்கு மாற்றமாகவே இருக்கின்றது. கரையோர மாவட்டம், மேலதிக அரசாங்க அதிபர், முதலமைச்சர் என்பன நிம்மதியைக் கொண்டு வராது. தமது பாதுகாப்பு, மதச் சுதந்திரம் போன்றவற்றிக்கு உத்தரவாதமும், தம்மை நசுக்க முற்படும் சக்திகளுக்கு எதிராக சட்ட நடவடிக்கையையுமே இன்றைய சூழலில் எதிர் பார்க்கின்றார்கள். இதனை செய்வதற்கு மறுக்கும் தரப்பு யாராக இருந்தாலும், எந்த முஸ்லிம் கட்சியும், தலைவரும் கேட்டுக் கொண்டாலும், அதனை கேட்டு செயற்படுத்தும் நிலையில் முஸ்லிம்களில்லை.

முஸ்லிம்களிடம் இன்று ஏற்பட்டுள்ள இந்த மாற்றம் ஒரு அமைப்பினதோ அல்லது கட்சியினதோ செயற்பாடுகளினால் ஏற்படுத்தப்பட்டதல்ல. தானாகவே ஏற்பட்டதாகும். முஸ்லிம்களிடம் ஏற்பட்டுள்ள இந்த மாற்றம் வெற்றியை இலட்சியமாகக் கொண்டதல்ல. அவர்களின் விருப்பு வெற்றியும் பெறலாம். சில வேளை, தோல்வியிலும் முடியலாம். 

ஆனால், தங்களை நோக்கி வீசப்பட்ட இனவாத அடக்கு முறைக்கு எதிராக வாக்குகளை பயன்படுத்த எண்ணுகின்றார்கள். தமது மக்கள் பிரதநிதிகளும், கட்சிகளும் கையாளாகாதவாறு செயற்பட்டதனைப் போன்று தாமும் செயற்படக் கூடாதென்று எண்ணுகின்றார்கள். இவ்வாறு மக்கள் மத்தியில் சொல்லாமல், கொள்ளாமல் வரும் மாற்றங்களை கரையோர மாவட்டம், மேலதிக அரசாங்க அதிபர், அமீர் அலிக்கு நாடாளுமன்ற உறுப்பினருடன் பிரதி அமைச்சர் பதவி, முதலமைச்சர் பதவி போன்றவற்றைக் கொண்டு மாற்றியமைத்து விட முடியாது. முஸ்லிம்கள் எதிர்பார்க்கும் மாற்றங்களே, அவர்களிடம் மாற்றங்களை ஏற்படுத்தும் என்பதுதான் உண்மையாகும்.

1:00 PM